Coses que (me) pasen

2009-06-30T00:29:00.006+02:00

Alcuérdome de tener cinco años y tar sola delantre de la tele, xusto dempués de qu'acabaren los dibuxos y enantes de qu'entamaren les coses de mayores, nuna d'eses pauses onde amás d'anuncios echaben "vídeos musicales" en cuenta de videoclips, y de ver a una panda de rapazos con pinta quinquis bailando nuna estación de metro y al frente un rapaz rizosu con unos güeyos enormes y mui guapu a pesar de tener un poco cara ratonín. Pero lo meyor yera la música y la forma de movese, nun manera de tar viéndolo y nun intentar imitalos.

Alcuérdome de tener diez años y tar viendo un programa tituláu "Pasando", onde se cuntaben coses mui interesantes, y que pusieren el videoclip de "Black or white", otra vez con una música irresistible y un mensaxe tan inxenuamente cursiprogre que nun podía por menos que fascinar a una neña d'esa edá. Alcuérdome de dibuxar el logo de los zapatos negros y los calcetos blancos, de querer disfrazame d'él (nun llegué a facelo) y poner coleta dexando un rizu pela cara.

Alcuérdome de salir al poco d'eso les primeres acusaciones contra él y d'entrugá-y a mio ma "¿Tu dexaríes que me llevare Michael Jackson pa casa si te dan un millón de dólares?". Nótese que yo, nun enterándome de la misa la media, veía esa hipótesis como una situación win-win, too ventaxes, y nun entendí la prisa que se dio ella en dicir "¡De nenguna manera!".

Alcuérdome de que pesie a too, el discu de History sonó ensin descansu nel mio walkman (téngolu en cassette compráu, l'hermanu probe de los formatos d'audio) nel branu de 1996, anque nun me prestaba reconoce-y a mio pá qu'a mi tamien me paecíen abondo meyores les canciones vieyes. Alcuérdome de que me gustaba sobremanera Man in the mirror.

Alcuérdome de qu'un par d'años más tarde, cuando yá nun miraba pa él, una compañera de clase que yera del club de fans traxo al institutu unes fueyes pa recoyer firmes pa pidir que viniere de xira equí. Alcuérdome de qu'eses fueyes acabaron en manes del facha de la clase que-y les arrampuñó al gritu de "¡Que non, que nun quiero negros en España!" (anque d'aquella yá yera más blancu qu'él). Los demás ríimonos (sobre too de la rapaza, que yera la más pringá de la clase).

Alcuérdome de qu'hai unos años un compañeru de facultá me contó que tenía la enfermedá de Michael Jackson y que yo, nun arranque d'humor mierense, contesté: "¿Qué yes, pederasta?". Pero non, tenía vitíligo y quedáben-y manches blanques pel pelleyu, anque notábense-y poco porque yera pálidu a esgaya. Alcuérdome de que yo creí na enfermedá d'él pero non na de MJ, y seguí atribuyéndo-y la blancura a la tontería y el refalfiu.

Alcuérdome de toles veces que lu vi pela tele estos años cola máscara, sacando al guaje pela ventana, colos xuicios, con tola so decadencia física y moral.

Dicía güei un amigu de la que tomábemos el café que-y jode qu'agora tol mundu paez que ye superfan de Michael Jackson y que siempre lo fue, cuando hai dos selmanes namás que se lu amentaba pa facer la risión. Dios nos llibre de la hora de les alabances, pero la verdá que pa los neños de los ochenta Jacko ye una constante nes nuestres vides, un símbolu: una especie de vanitas alvirtiéndonos que les perres nun dan la felicidá y de lo malos que son los escesos. Güei, visto con güeyos un poco más maduros lo que pueo dicir ye que me da muncha pena. Ye'l casu d'un ser humanu instrumentalizáu, creáu dende neñu namás pal espectáculu, ensin habilidaes sociales nin autoestima nenguna y con perres y afalagos entrando per toles puertes... hasta que dexaron d'entrar.

Mecigaya poética

2009-06-27T02:16:00.004+02:00

Nel cursu avanzáu d'asturianu de l'Academia de la llingua (Ibias 2005) ficimos un esperimentu lliterariu que consistía en garrar versos de distintos poemes y autores y mezclalos intentando da-yos dalgún sentíu o polo menos ritmu, amestando siacasu dalguna palabra propia o cambiando dalgún elementu. La materia prima, creo recordar, yeren poemarios de la segunda xeneración del Surdimientu. Yo daquella nun lleera casi poesía y garré los versos atendiendo mayormente a los que más casaben col ambiente de selmana y media de nueches en caldia que llevábemos (un estímulu pa la creatividá coyonudu, la verdá). Agora faime gracia dame cuenta de que dalgún d'ellos ye de ilustre pluma. Güei alcordéme del poema que saliera y petecióme ponelu equí. Si dalgún que llea esto reconoz dalgún versu y s'ufiende, reclamaciones a Marta Mori, que foi la envizcadora. Si dalgún que llea esto reconoz dalgún versu y tien a bien dicime d'ónde ye, agradézo-ylo.

Nueche de miércoles xabaz*

Enterré na poza que nun cierra

la povisa ayeno na sangre enceso.

De tierra nuevo fartuquéme.

Nun me vengas agora cola refugaya

de la música del agua que retumba

como una fola en to verde playa.

¿Pretendes redimimime con estética?

Calla, enchipémonos de tarranches necies

como bébedos calabres de xerez y whisky

y esfutemos del vómitu y la risa.

*El títulu sí ye míu.

Apuntes del natural

2009-06-12T00:38:00.004+02:00

Un xiblíu tresportó la noticia dende'l fondu de la plaza Requexo, multiplicándose nel aire de la tardiquina al so pasu. Pero, como si se reproduciere por mitosis, yá nun yera'l mesmu xiblíu, sinón munchos iguales, producíos por boques distintes. Al llegar estos soníos, les manes posaben los vasos nes meses de madera y les cabeces volvíense buscando l'aniciu de too aquello. La voz de "¡cabrones!" axuntosé a les notes de la melodía desfinada. Al cabu descubrióse l'oxetivu de la ira del pueblu en dos coches blancos con fraxes azules. El glayaríu aumentaba cola colaboración de los que sabíen de qué iba'l tema y la de los que sólo sabíen de los sos protagonistes, nesti casu los eternos villanos, presuntos culpables.

-¡A onde tenéis que dir nun vais, cabrones!

-¿Qué pasó? ¿Qué pasó?
- Que lleven a un morenín, tío, los hijos de puta.

[Requexo, 11 de xunu de 2009]

Reflexón post-electoral al estilu Pingarates

2009-06-09T10:53:00.002+02:00

Tamos condergaos a que remanen el cotarru aquellos a los que nos val más compra-yos un traxe que convidalos a comer o viceversa.

El síndrome de Mastropiero

2009-05-28T23:48:00.002+02:00

Síndrome de Mastropiero: dizse del que sufren los que cuando se ven obligaos escribir por encargu, producen obres mediocres y inespresives. Pela contra, cuando obedecen namás a la so inspiración, enxamás escriben nada.

Sí, será mal de munchos, pero nun me quiero consolar.

Nun dexéis de documentavos sobre la apasionante vida y obra del maestru Johan Sebastian Mastropiero.

Cuántu... y yo qué vieya

2009-05-26T22:29:00.004+02:00

Santiago Niño Becerra diz munches coses. De fechu lleva diciéndoles dende 2005, cuando'l mundu capitalista vivía na eterna primavera y los pisitófilos creditófagos salíen trunfantes a los balcones de los zulinos creyéndose más clientes del bancu qu'esclavos, aquella época na que una colomina nun yera un pisu, sinón una inversión que nunca baxaba y el paru una alcordanza entrañable de los ochenta como Naranjito. Solo unos pocos atendieron pa elles.

Agora diz que pal 2070 vamos vivir nun mundu onde lo individual pierda sentíu en favor de lo colectivo, basáu na collaboració, el repartu y el aprovechamientu racional de recursos y onde la xente viva d'alcuerdu coles sos necesidaes, non de los caprichos. Pa mio idea qu'esti tipu de sociedá tien un nome, pero nun ye cuestión d'asustar a la xente.

Lo que yo pienso al respectu recuérdame al personaxe d' Andamios, la novela de Benedetti na qu'había un rapacín al que-y contaren que la próxima revolución diba a ser nel 2017 y él creyólo, contentu con solo pensar que tovía diba ser mozu desa pa disfrutalo. Curiosamente, naide piensa que puea ser de los que caen pola causa.

¡Y onde voi dir yo yá con 88 años!

Manifiestu xeneracional

2009-05-25T21:53:00.004+02:00

Soi de la primer xeneración que tien a los padres nel messenger y una de les últimes en nun tener a los güelos.

Un regalu pa mi mesma

2009-05-24T22:54:00.003+02:00

El 24 de mayu de 2007 diome una vená rara y abrí esti chiringuitu. 2 años y 75 entraes más tarde, pueo dicir que más que contenta de qu'aquel día, pa variar, ficiera casu a la ocurrencia y pa detrás nun dexar el xuguete a los cuatro díes. Porque como dixe más p'arriba, foi un regalu pa mi mesma: facilitóme conocer a muncha xente interesante, permitióme esplorar un poco les mios posibilidaes como escritora y anque me quedaron munchos temes nel tinteru fui capaz de tener un poco disciplina, cosa de la que nunca anduve mui sobrá precisamente.

Podeis dexar felicitaciones y ónde pueo pasar a recoyer regalos y premios nos comentarios.

Nosotres podemos, vosotros podéis

2009-05-14T14:59:00.004+02:00

L'autora d'estes palabruques da la norabona a los practicantes y aficionaos a la ximnasia rítmica masculina pol reciente llogru de conseguir que s'afite la categoría pa homes nos campeonatos d'España, al tiempu que recuerda a tol mundu que pa consiguir la igualdá ente sexos nel deporte queda tovía muncho por andar y que les victories contra les torgues de xéneru nun son regalaes nin pa unos nin pa otres.

Porque la igualdá nel deporte inconscientemente identificábase con "que les muyeres faigan coses de paisanu, que son les interesantes", incorporándose estes a la competición n'actividaes que taben diseñaes pa otros cuerpos, nos que difícilmente puen batir récors; al tiempu que se pensaba "qué paisanu va querer facer eso" no que tocaba a los deportes afayaos a les condiciones físiques de la muyer (los pocos qu'hai).

Agora sólo falta dir equiparándose n'atención mediática y repercusión na sociedá. Hai que siguir.

Dedicao a la plantiya del Llosalín CF de La Ribera y a tolos que lluchen por facer lo que-yos presta, ensin más.

Publicidá dempués de Fukuyama

2009-05-12T19:41:00.003+02:00

Taba yo viciándome na páxina d'Amazon y faciendome payes (¿deos?) mentales con escritores cantantes ingleses de la mio edá cuando, de repente, pela esquina del güeyu veo ceguñar una frase inquietante: ¡NAZ L'INTERNET COMUNISTA!

¿De cuándo p'acá comunista ye una palabra pa usar en publicidá? ¡Y con connotaciones positives!

Tamos perdíos... y con eso tará d'alcuerdu tanto los d'una ideoloxía como los de la contraria.

Agora solo falta l'anunciu de Mahou cola música de la internacional y la miles de chinos coreando: Mahou, Mahou, Mahou

P.D. Sres de Mahou: alviérto-yos que si veo un anunciu asemeyáu al arriba descritu en televisión pienso denuncialo por plaxu y qu'esti testu val de prueba al mio favor.

P.P.D En fin, doime cuenta de que si l'anunciu lo que quería yera llamar poderosamente l'atención, consiguiólo. Y yo pa detrás faciéndome ecu. Nun te digo.

Ascu

2009-05-11T15:06:00.005+02:00

Acabo de ver el vídeo del asesinatu de Carlos Palomino en contra de la mio voluntá. ¡Gracies, Antena 3!
Gracies por retresmitir la muerte violenta d'una persona como si fuere un gol del Madrid.
Gracies por tratar al asesín pol nome y a les víctimes como "antisistemes" (xente chunga y belicoso qu'anda buscando guerra).
Gracies por recordame que a esi monu con navaya vosotros lu consideráis "del sistema" yo nun quiero ser parte d'él.
Gracies por recordame qué telediariu nun ver.

Yo 1- 0 Capitalismu (lo meyor de la crisis)

2009-05-09T18:46:00.006+02:00

A lo meyor hai llectores, si ye que cai perequí dalgún, que piense que lo más afechisco ye que fale de la manifestación d'ayer, l'actu de l'Academia o dalgún otru aspeutu de la Selmana de les Lletres. Pero non, paso. Nun m'apetez. Hai aconteceres que me piquen la gana d'escribir y otros que non, y como nun obedezo a más llinia editorial que la que me sal de cierta parte, si quiero escribo y si no non. Y tampoco tien que ver con que la cosa seya más o menos memorable o importante, ye dalgo qu'apaez ensin nengún tipu de criteriu.

Una d'estes coses ensin importancia (aparente) pasóme'l vienres, na caxa d'una sucursal mierense de cierta cadena asturiana de supermercaos que tien un logo onde predominen el blanco y el mariello (lo que hai que facer por nun facer publicidá). De la que salgo de trabayar suelo pasar per ehí tolos díes pa mercar el pan y/o dalguna cosuca que faiga falta pa la comida. Podría imaxinar que les caxeres, cuando me ven entrar, piensen "mira, yá ta ehí la pesá de Numedesbolsaqueyeestonamás". Efectivamente, hai dellos meses que'l mio enfotu en nun morrer sepultada embaxo una montaña de bolses de plástico y aforrar recursos del planeta tienme ganáu l'odiu y la incomprensión de les trabayadores de les medianes superficies. Non poques veces tuvieron que trabayar doble porque cola inercia yá metieren les coses na bolsa, o-yos tengo parao la cola intentando desatar el ñudu de la bolsa con dos llechugues y un cuartu de freses que tien pol tique de la frutería, pa poder garrala peles ases y nun necesitar una bolsa de plásticu pa llevar otra bolsa de plásticu esactamente igual (y a veces aprétenlu con ganes). Y a mi dame hasta un poco vergüenza alterá-yos la dinámica de movimientu y tamién (anque menos) aguantar la solombra de la güeyada estrañada de "pa qué nun la garrará, si ye gratis". Como si fuere obligatorio rapiñar tolo que ye gratis. Como si les coses nun tuvieren más costu que l'económicu.

En fin, qu'ayer llego yo p'ahí pa la caxa con dos quilos de coses de la frutería y una bolsina aparte de quivis asturianos* pensando "bono, güei nun la voi armar, garro la bolsa como puea ensin desatar, salgo del xaréu y yá-y quitaré el ñudu onde nun tapone la circulación". Pues pa la mio sorpresa, nun fizo falta: según pasaron les coses por caxa la moza mui amablemente quitóme'l ñudu (sensiblemente menos apretáu qu'otres veces), metióme la bolsa quivis na de les otres coses y más amablemente entá esplicóme que lo sentía, pero que yá nun-yos dexen dar bolses pa eso, que-yos mandaron desatar les ases y nun dar más que les imprescindibles.

-Ah, qué ye, por "reciclar "¿eh?- dixo la paisana que diba detrás, enanchando'l significáu de reciclar pa tolo que tien que ver colo ecolóxico.

-No, ho, ye pa controlar los gastos - aclarónos la moza.

Ta claro que l'ecoloxismu nun ye dalgo que preocupe a les grandes empreses y que cuando la cosa va bien hai que gastar y consumir como si nun hubiera mañana. Pero mira, yá nun me voi tener que preocupar más de desfacer ñudos. Apúntomelo como una victoria.

Yá veis, hipotéticos llectores, qué parrafada sobre un tema tan trivial, en vez de comentar lo d'ayer, que si unu dixo, que si la otra dixo, que si aquellos ficieron o dexaron de facer o fueron o dexaron de dir a nun sé onde... ¿Por qué me siento como obligada a facer referencia a ello?

Paezme que si lo que quiero ye normalidá lo meyor que pueo facer ye apurrir el mio granín de coses normales que (me) pasen y que me pasen pela cabeza, ensin importar el día que seya, mayu o febreru, vienres o miércoles, de comedia o funeral (o una mezcla d'entrambes)?

*Otru apunte ecolóxicu: nun se deberíen mercar alimentos que viaxaren más que tu en tola to vida. Si hai que contaminar l'aire coles emisiones d'un avión nel trayectu Nueva Zelanda-España prefiero que seya por dir yo ellí, y mentanto aforro y non comer quivis de la vega'l Nalón.

Pa saber más sobre les bolses y por qué son males calcái equí.

¡Y nun vos olvidéis de supervitaminavos y supermineralizavos con kiwis asturianos, que son lo más rico y sano que hai!

Agora que queda poco pa San Bable Mártir...

2009-04-27T00:02:00.002+02:00

... o dalgún asoma la patuca o quieren tenenos contentos. Hai que reconocer que quedó guapo.

Más claro, agua.

2009-04-21T23:52:00.005+02:00

Mirái esti anunciu. Qué guapo, publicidá con mensaxe ecoloxista. Qué importante y saludable ye l'agua. Y que conste que nos dicen que beber agua del grifu ye igual de bono que lo de botella, pero lo d'ellos ye ecolóxico y natural a más nun poder. Cásique da la sensación de que si nun-yos compres a ellos tas faciendo-y mal al planeta.

¿Y cuándo teníen pensao dicir que fabricar una botella de plásticu d'eses gasta el triple d'agua o más de lo que lleven?

Lo más gordo ye que nos tienen por tontos o inorantes, colo que sabe'l Google y lo fácil que ye pregunta-y. Qué se pue esperar de Coca-cola.

Tenemos la suerte de vivir nun sitiu onde tenemos agua potable dientro casa, llibre d'enfermedaes y a la temperatura que queramos, por un preciu razonable y bono de beber (n'otros llugares, mesmamente en Santander, nun ye asina). Nun caigamos nestes engañifes.

Nun sigo más, otru día falo de la estafa del agua nos bares y restauranes y de cómo n'Inglaterra te lo dan del grifu gratis cola comida ensin mirate con despreciu.

Bailla (y escuca) la crisis

2009-04-16T23:56:00.009+02:00

Como casique ye tovía'l mio cumpleaños (anque de xuru que nun lo será cuando lleas esto), voi convidavos a unes cuantes. Nin rondes de sidra nin fartures de chipirones, pero sustancioso igualmente. Ehí vos van, delles coses que van dexar a la mulina al paru un tiempucu, ensin dexar de disfrutar gratis y nel intre de tola música, cine y TV del mundu mundial y mui importante, keeping it legal, pa que nun vos prinde la nueva ministra.

1. Spotify.L'inventu del sieglu. Descárgueslu, busques el últimu discu del to grupu preferíu, calques (hasta ehí como nel emule)... et voilà ¡escúcheslu! ¡Darréu! ¡Jódete y bailla, SGAE! Lo malo ye que nun lo pues meter pal ipod, pero equí como toos baxamos música pa ver si nos gusta y dempués dir a mercalo (¿o non, neños?), nun pasa nada. Otra pega que tien ye que nun ta "too", y de música asturiana nun ta "la mayoría", pero bono, nos P2P tampoco y son malvaos y maléficos y van a quitate'l trabayu a poco que te confíes (¿o esos yeren los inmigrantes?). Bono, y otra más, que te meten publicidá, pero mui mui poco (igual un anunciu a la hora, y dos siguíos como muncho, eso sí, casi siempre de vodafone).

2. Surf the channel. Pasa de la tele yá, que ye too puxarra. Lo poco qu'hai bueno pues baxalo d'internet... o velo al momentu. Esta ye la web que yo uso pa ver Muyeres Desesperaes enantes que na FOX. Nun fai falta nin rexistrase, solo calcar nos enllaces. Lo malo: ta too n'inglés (bono, asina practicáis). Hai películes y series (dende ALF a lo más nuevo de Perdíos).

3. Cine directo. Idem eadem idem pa películes n'español y V.O.S.E. (comerciales y de calidá).

Oh, you know, downloading is so 2008...

(De)Xeneración del pogu

2009-04-13T23:24:00.007+02:00

Llevo diez años diendo a conciertos de Dixebra, cumpliéronse l'otru día na Folixa na Primavera. Dende entós veríalos en direutu tengo mieu que más de 20 veces: en Mieres, en Uviéu, en Xixón, en Turón, en Carbayín, en Santo Adriano, n'Avilés, en Soto d'Ayer, en La Pola L.lena, en Los Mártires, en Candás... hasta nel Campoamor . Y hai un fenómenu del que tenía gana de dar fe. En realidá ta emparentao con dalgo que yá diz Xune d'hai un tiempu p'acá, enantes de cantar Rapaza nacionaliega. Enantes, la presencia femenina nes files d'alante yera mui escasa. Había que ser atrevida. Yo tengo visto reventar llabios, resgar camisetes, facese moretones, etc... na batalla. Habíalos qu'aprovecharon la ocasión pa vengase discretamente d'enemigos que nin siquiera yeren conscientes de selo. Y anque aprendíes a sacar los coldos y defender el to espaciu, tengo pasáolo mal y visto'l cielu al ser rescatada por dalgún amigu más grande d'aquellos forfugos nos que se convertíen los pogos (menos nel Campoamor, anque intentáremos inventar daquella el pogu de salón). Pero siguíemos entrando al trapu, porque como ellí nun se viven los conciertos en nengún sitiu.

Poco a poco, pémeque que sobre too nos últimos cinco años, fueron allegándose más moces al escenariu (y non precisamente a tira-yos bragues), y el col cambéu demográficu paez que foi camudando tamién el fechu pogueru. Nun sé, ye una percepción personal, igual otra xente lo achaca a que yá nun hai coyones o a que sube la media d'edá ente'l públicu. El casu ye que a mi dame qu'agora hai menos hosties gratuites, menos coldos en punta, menos secueles físiques. Emburriones y ambiente folixariu sigue habiendo, pero agora cabe más xente nél. Camiento qu'habrá quien lo vea como una pérdida de les esencies. Pa mi meyor asina.

Odiu normalizáu

2009-03-30T23:27:00.006+02:00

Cómo presta ver l'asturianu na cai, usáu espontánemente y ensin subvenciones de por mediu...

(Visto en Mieres, cai Reinerio García, enfrente del IES Sánchez Lastra, vulgo Maestría).

Homes y muyeres

2009-03-08T22:03:00.004+02:00

Ye qu'hai coses que solo una muyer pue llegar a conocer... Por exemplu la indescriptible sensación de despertase un domingu baxo los efectos combinaos del dolor menstrual y la resaca, alternando los sos síntomes de munchu fríu o munchu calor, o too ello xunto... Gloria. ¡Alegríes del metabolismu femeninu!

Agora en seriu. Hai quien diz que'l día de la muyer trabayadora ye'l 1 de mayu. Ye complicao. Lo que nun se pue negar ye que esti día ta convirtiéndose d'añu n'añu nuna historia cada vez más despolitizada, decorativa y sinsustancia (cosa de la que tampoco se llibra'l Primeru de mayu, por ciertu). Yo dende equí invítovos a toos y a toes a celebrar esti día dexando fuera lo que vien darréu:

Análisis desfasaos que nun entiendan la lliberación de xéneru como cosa de los dos sexos

Demagoxa institucional

Simplificaciones interclasistes

Palabros como "hembrista" o "feminazi"

Los australopitecus que les acuñaron

Mamonaes moxigates

Alderiques oligofrénicos sobre l'usu de la palabra miembru.

Así qu'así, yo lo que más celebro ye l'nacimientu de la muyer más importante del mio mundiu, y la más trabayadora: mio ma.

Remanecer

2009-03-06T19:17:00.014+02:00

Unos coríos nalen nuna llamarga, pesie a la inverná. La foto vese mal porque ta sacada dende mui lloñe, pa nun perturbar l'estáu natural de la escena.

Los coríos nun podíen imaxinar lo que-yos esperaba... que namái unos instantes dempués diba apaecer n'escena el so mayor enemigu y depredador...

... Ninoninoninonino.... (música de Tiburón)

... Ñi Ñi Ñi Ñi... (música de Psicosis)

... Ninono ninoninono ninoninoniiiii... (la danza l'osu)

Bah, yá sabía que nun engañaba a naide. La foto ta fecha dende mio casa, nel cascu urbanu de Mieres (cerca d'esa franxa conocida como La Mayacina, tierra de naide durante más de venti años)

Per onde va la carretera pasaba'l tren, y al llau un regatu que tengo visto baxar negru, marrón (en díes como güei), verde (por mor de les algues que salen pol escesu de fósforu nel agua procedente del consumu humanu) y a lo cabero irrealmente claru. Cuando yera neña xugábemos en medio la cai y cuando pasaba un coche apartábemonos; y tirábemos la pelota contra la muria de Maestría poniendo cuidao pa nun pega-y a nengún coche aparcáu (eso güei diba ser un milagru, como podéis ver)...

En fin, toi poniéndome señardosa y nun diben per ehí los tiros. Lo que m'impactó al mirar pela ventana foi'l poder rexenerador de la naturaleza. A lo llargo del sieglu XX, camiento que seya Mieres la villa asturiana que más cambios esperimentara, dende la so configuración llinial de los barrios históricos (de los que poco queda en La Villa y cásique nada n'Oñón) al cogollu urbanu de güei, el doble d'anchu que va 150 años. El ríu vendió'l so poderíu por una cara llimpia; y tardaron en paga-y. Yá nun pue amenazar con llevar lo meyor de Mieres. Surdió el colexu Prau Llerón y quedó la cai La Vega, anque los nuevos nun sabrán por qué (a lo meyor nin siquiera saben por qué sos pas la llamen cai El Viciu). Pero'l llerón nun se conforma y nun lu van quitar de conocer el sieglu XIX. Ehí ta, hasta que llegue'l formigón.

Dicen que pa la parte Chernobil los osos y los llobos caciplen a los sos deleres ente los edificios destartalaos, llibres de l'amenaza humana. Equí tengo mieo que marchemos de vacaciones y los atopemos d'okupes en casa.

Dudes que m'asaltaron lleendo "Los homes que nun queríen a les muyeres"

2009-02-23T19:45:00.004+02:00

¿Por qué hai xente que cree que gastar un ordenador Apple ye un rasgu de carácter, del que, amás, hai que tar orgullosu? ¡Mackeros, frikis!
(o ¿cuánto-y pagó Steve Jobbs pola publicidá subliminal?)
El mocín de la historia ¿nun debería tener dalgún defectu pa que nos lu creamos un poco? Nun sé, tirar dalgún peu de vez en cuando, por exemplu. Colos de la mocina bien que s'esplaya.
Dame la sensación de que los suecos "se quieren muncho" muncho más que los hispanofalantes ¿nun conoz el traductor les espresiones "téngote apreciu", "caesme bien" y otres pol estilu, que nun faen pensar que'l que les diz ye inocente perdíu?
¿Por qué nun dexaron el títulu literal que ye "Los homes qu'odiaben a les muyeres"? A mi paezme que queda claro que los homes que nos ocupen facíen dalgo más que "nun querer" a les muyeres...
(Hasta la páxina 200) Qué aburríos son los suecos
(De la páxina 200 p'alantre) Qué retorcíos son los suecos
¿Cómo se les apañó Larsson pa que l'editor nun tirare'l tochu a la basura nes 200 primeres páxines?
¿Tan importante ye en Suecia'l fechu de tomar un café qu'hai que señalalo cada vez que los personaxes lo faen (cuidáu, y tamién si ye con lleche o solo)? ¿En cuántes páxines quedaría la novela si quiten toles veces que'l protagonista va al Konsum (Alimerka suecu)?
¿Será verdá eso de qu'en Suecia hai periodismu fechu pa seres adultos y racionales?

Cursu prácticu d'asturianu: Llección 34

2009-02-19T23:55:00.002+02:00

L'Antroxu ye una época perbona pa practicar el neutro de materia:

- Ponme un metru de tela negro.
-¿De cuálo? ¿De lo de carnaval?
-Paezme mui ruino. Dámelo d'eso otro.

Amor normalizáu (o "Normalización pastelera")

2009-02-12T11:59:00.004+02:00

P'aquellos que crean nes fiestes inventaes pol capitalismu pa reactivar el consumu dempués de la cuesta de xineru /mou cinicu off.

Visto na bombonería Flor de Cacao, C/Manuel Llaneza 13, Mieres del Camín.

La fiebre los autobuses

2009-02-02T22:26:00.008+02:00

Vese que ta de moda esto de los mensaxes nos buses. Andando pela rede atopé unos cuantos modelos de próxima apaición nes calles de les villes asturianes:

Esti ye l'encargáu pola FSA (mui previsible):

Esti otru fináncialu la federación asturiana de güelos y güeles:

L'asamblea de muyeres insatisfeches tien previsto sacar esti otru pa mayo:

P'avientu del añu que vien, l'asociación d'hermanos mayores yá tien encargáu esti otru:

Y al final, como en too, siempre apaecen los típicos oportunistes:

Bah, paez que nun toi mui inspirada. A ver vosotros.

Una rapacina de 26 años

2008-12-01T23:49:00.002+02:00

Atención: escribo esta entrada cola sola intención d'aforrar en psicoanalista. Interés pa l'audiencia xeneral: baxu tirando a nulu.

Esta última temporada vengo faciendo coses que, miraes en conxuntu y con perspectiva, paez que nun tienen otru fin qu'asemeyame a la que yera yo va diez años (ai, si valiera tamién pa poder meteme nos vaqueros que gastaba daquella, o naquel petu de pana...). Atópome a mi mesma escuchando la música que me prestaba y descubro que me sigue prestando. Vuelvo a dexar el pelo llargo. Entamo coses que me recuerden a los enfotos que podía tener entós. Hasta'l tranlará paez que vuelve a ser como naquel tiempu (más información). Solo me falta volver a ser virxe (yá que tampoco faigo lo contrario, por desgracia).

¿Qué quier dicir esto? ¿Que nun toi a gusto colo que fice na cabera década? Nun me paez. Quiero creer que lo que me pasa ye que nesta época de transiciones que toi pasando quiero recuperar aquella ilusión, aquella gana de facer coses, de viaxar, deprender, conocer xente y pasalo bien que tenía (anque a veces me quedara en casa estudiando tamién, eh, que tampoco yera Amy Winehouse). Y que si me viera aquella me reconociera orguyosa como la so personalidá adulta (con más arte pa la vida y perres).

Y si con dieciséis años colé pa París yo sola dos selmanes, ¿qué se pue poner per delantre agora?

La pantorilla ye lo que me gusta...

2008-11-30T03:37:00.003+02:00

Ladies and gentlemen, equí tenemos al nuevu aspirante a sucesor de Freddie Mercury: Mika.

Nun conocía a esti rapaz, pero esti cantar púsome sobre la pista (toi fartuca escuchalu na radio porque lu ponen muncho en RNE como cortinilla nel programa de la fin de selmana).

Sonábame un poco a Queen (como Lazing on a Sunday Afternoon), pero con un aquél dalgo más modernu. Google sacóme de la duda.

L'afán de asemeyalu a Mercury ye atrevíu, polo grande d'unu y lo novatu del otru d'un llau; del otru, ta claro que nun-y falten intereses comerciales sospechosos a la calificación. Pero anque les comparances son odioses, nesti casu son cásique inevitables: orixe mediooriental (Mika libanés, Freddy iraní), traces andróxines, rangu vocal ablucante (cerca de cuatro octaves en entrambos casos) y común almiración poles muyeres que tienen onde garrar.

Compárese;

Y

Préstenme enforma los dos cantares, pero sobremanera'l segundu, llevanta la moral que da gustu.