Coses que (me) pasen

Apuntes del natural III

2012-01-31T17:53:00.003+02:00

El testu d'esta entrada tien más de cuatro años. Dedicáu a los y les que anden perehí cerca.

Caminando pela avenida General Dávila (el kilómetru y mediu que separó la mio casa provisional del mio trabayu provisional nos caberos díes de 2007) sentíame como un microbiu percorriendo'l cantu d'un toblerone. Vas andando per una camín absurdamente pandu mentanto Santander se tira de cabeza a la mar a una y otra mano (nun ye casualidá que la palabra montañesa meyor conservada seya "pindio"), albidrando con mayor o menor conformismu que tolo que baxes pa llegar vas tener que subilo a la vuelta, y hasta les paraes del autobús tán colocaes estratéxicamente pa que naide escape a tal badagüeyu.

Sicasí, el destín final de Santander, la mar, sólo apaez de ralo en ralo, ente pisos nuevos, pisos vieyos, cases vieyes con xardín, palacetes d'usu institucional, colexos de cures y monxes, cases cayendo, chabolismu vertical de xugu y fleches (coses que nun se suelen mencionar cuando se comparen les nobles ciudaes de Santander con Uviéu y que son verdá , pues a mi polo menos resultábame mui asemeyao a la Ciudá Naranco que yo conocí nos noventa) y un campu de fútbol onde los xugadores puen llegar a sentise dioses ensin pasar de categoría cadete o tercera rexonal, corriendo penrriba l'agua de la bahía.

Apuntes del natural II

2012-01-26T01:03:00.003+02:00

Interior, nueche: Un sábadu cualquiera, al filu la medianueche, nun conocíu chigre mierense onde suel haber siempre muncha xente a cenar. Nel bañu de muyeres, una paisana d'unos 55 años charra animao (con unes botellines al llombu, polo que paez) con otres muyeres más moces mientras espera'l turnu pa entrar.

-Nun sabéis lo que facéis. Yo empecé de mocina y agora yá, colos años que llevo, nun lo voi dejar, pero sí dejar lo dejo y dempués me véis otra vez per ehí con unu, pegáime con hachu porque entós sí que ye de ser gilipollas.. ¡pero gilipollas perdía! - Ai, yá me toca...

Al abrise la puerta'l bañu y interrumpise'l discursu, la oyente accidental queda ensin saber si taba falando del tabacu o del home...

Un poema galés (pero casi asturianu)

2011-06-20T18:02:00.001+02:00

Paisaxe galés
Vivir en Gales ye ser consciente
Al atapecer del sangre arramao
que llevó facer esti cielu xabaz,
tiñendo los ríos nidios
en tolos sos cursos.
Ye tar al tantu
penriba del turullu del tractor
y el ruxerux de la máquina
De batalles na biesca de cuerdes
vibrando coles fleches aventaes.
Nun se pue vivir nel presente,
polo menos non en Gales.
Ehí ta la llingua, por exemplu,
eses consonantes suaves
estrañes al oyíu.
Hai glayíos na escuridá de la nueche
cuando los cárabos-y retruquen a la lluna
y una engatada de solombres
amatagaes nes esquines de los praos.
Nun hai presente en Gales,
nin futuru:
solo hai el pasáu
fráxil de reliquies,
torres y castiellos mordíos pol aire
con pantasmes falses,
canteres y mines podreciendo
y un pueblu impotente,
enfermu d’endogamia
mansuñando el cadabre d’una vieya canción.

R.S. Thomas

The company men

2011-05-16T23:58:00.003+02:00

Esta entrada ye una reedición de otra que se publicó por accidente anueche, que taba modificando cuando me marchó l'interné. Equí va la bona.

Full Monty, Pídele cuentas al rey, Billy Elliot, Los lunes al sol, Hoy empieza todo, Carne de gallina, casique toes les Ken Loach d'ambiente británicu, Recursos Humanos... son un pordicir de les más conocíes. La llista de películes sobre obreros en crisis ye llarga nes filmografíes nacionales europees (menos, que yo sepa, na estadounidense: asina a botepronto sólo se m'ocurre Las uvas de la ira y el documental de Michael Moore sobre la desapaición de la industria del motor). Asina foi que cuando propusieron dir a ver The Company Men yo pensaba que diba ser dalgo d'eso. Sicasí, namás entamó la película ye evidente de que va d'otru palu. Señores: ¡los executivos tamién lloren!

La peli nun ta mal, hai delles interpretaciones notables y hasta Ben Affleck y Kevin Costner aprueben, pal mio gustu. Anque'l guión seya bastante clásicu y previsible, un poco Frank Capra, un tantu pijo-progre. Resulta que los executivos foron malos, avariciosos, esbardiones. Amás de too eso, pecaron de soberbia: pensaron que por cobrar sueldos de seis cifres taben per enriba, a años lluz del proletariáu (eso ye una cosa que se ve mui bien na película: pa la resolución del final son clave les persones que controlen los medios de producción). Pasen les de Caín, purguen los sos pecaos de capitalismu xabaz, redescubren que la familia ye lo primero y les perres nun dan la felicidá, vuelven a xugar colos sos fíos y a lo último topen un trabayu honráu onde cobren la metá qu'enantes pero duermen tranquilos y van pa casa a la hora de cenar cola familia. Broteverdismu a sacu, como se pue ver. Pero ye hasta simpático conocer esa cara de la crisis. Vamos, ye que da la risa. Al entamu. La historia quier dar a entender que sufre tanto el que gana 800 euros y queda al paro como el que gana 8.000 y de repente dexa d'ingresar. Ya tien la película que s'esforzar abondo pa provocar la empatía y alloñar el pensamientu de "díi a la mierda, pijos refalfiaos".

Sicasí, el puntu más destacáu de la película pa mi ye l'allabanza del pequeñu empresariu que produz bienes tanxibles, frente a los xugadores de golf-catadores de güiski-vendedores de fumo de los mercaos financieros, como los verdaderos axentes que saquen a los obreros de la crisis. Nun digo que nun tenga parte de verdá, pero como se nota que ye made in América. Voi poner un exemplu esclarecedor: na película un autónomu de la construcción con empleaos al so cargu ta apuráu por acabar una obra, pero nun tien lliquidez pa pagar les hores extra a los trabayadores, colo que los manda pa casa y queda él echando hores solu. Igual igual que nesti país...

(Machupichu, despídete de la muyer y de los fíos pa dos selmanes y yá te contaré cuándo te pago les hores, que si nun cobro yo vas cobrar tu polos *******)

Aparte, menuda ironía que'l empresariu modelo d'honradez seya precisamente d'esi sector...

Coles cames ensin facer

2011-03-28T22:44:00.005+02:00

Qué coses, oye, pasó un añu y volvemos a tar d'evaluación... Bono, supongo que tendré que dar dalguna esplicación a esta ausencia, y nun tengo nenguna más qu'esta...

(Mauro Entrialgo ye'l meyor)

Pues sí, la comparación paezme enforma acertada. El blogue ye como la casa, pónesla al to gustu, tas a los tos deleres y presta (como mui bien dixo tamién el mio gran amigu ya filósofu de caleya Diestru), pero hai que cuidala, llimpiala, pintala dacuandu, reteyar, qué se yo. Cuando hai más telarañes de la cuenta lo más normal (pa mi) ye que en vez de ponese a arreglalo escapes a los bares. Nos chigres pásase bien, escuches música, ves un poco la tele, tienes conversaciones sinsustacia, cotillees sobre los conocíos , conoces xente nuevo y hasta ligues (nun ye'l casu). Pero tarde o temprano llega una hora na que t'apetez volver pa casina...

Nun digo qu'a partir d'agora vaya a tener la casa a xeitu pa tener visites. De fechu, sí que me da un poco la sensación, como lleí que dicíen nel Sidre & Blogues de que'l momentu d'oru de los blogues yá pasó, que vamos cada vez más a lo inmediato y minimalista. Home, de momentu nun esiste otru formatu como esti que permita al común de los mortales esponer idees en profundidá y llegar a una audiencia potencialmente masiva. Pero si tolo más que tienes son ocurrencies y lo que quies ye que los collacios se rían con ello (o te rían les gracies) son muncho más agradecíes les redes sociales. Será según me dea la ventolera, hai veces qu'apetez más quedase en casa caleciendo que salir per ehí, ¿o non?

Munches gracies a toos los que s'interesaron pel estáu de salú d'esti blogue, un saludu pa ellos.

Evaluación

2010-03-25T00:59:00.004+02:00

X. tien catorce años y anque vive cola madre, separada hai cuatro años, veía al pá un fin de selmana de cada dos. Hasta agora, que'l pá marcha a vivir a otru país cola nueva muyer y el nuevu fíu. X. tien carisma a esgaya, bona cabeza, munchos amigos y l'amor de la ma y el compañeru d'ella, pero pesie a too siente'l corazón desgarráu cola marcha del pá porque sabe que, anque se llamen per teléfonu y lu vaya ver en vacaciones, yá nun va ser lo mesmo.

Y. tien quince años y vieno d'otru país hai cinco. La so casa ye una pequeña patria onde se fala, se ve la tele y se vive n'otra llingua. Y. sólo foi quién a facer una amistá nesos cinco años, una criatura venenosa y igualmente marxinada. Agora tán en clases distintes y Y. boicotéase académicamente pa ver si consigue volver a la so vera antes de perder la intimidá pa siempre.

Z. tien dieciséis años y tien a la madre trabayando fuera per entre selmana porque yá sabe que Z. yá ye mayorina y siempre foi mui madura y responsable. Z. plancha la ropa dempués de clase y mientres espera al pá pa cena preocúpase pensando qu'esti trimestre nun va sacar tantos sobresalientes como l'anterior y a ver qué-y van a dicir tol mundu.

Y a mi, probe de mi, tócame pone-yos la nota a X, Y y Z mientres me llamento pola sorrisa que nun-y devolví a X. cuando salía de clase, enfurruscada porque perdió la fueya d'exercicios, la bronca que-y eché a Y por nun atender pa mi y el sarcasmu que-y espeté a Z por nun acertar con una entruga que "tenía que saber de sobra". Trabayu fácil, dicen.

El primer milagru

2010-03-20T16:41:00.005+02:00

Si dalgun de los llectores d'esti blogue tien cuerda cola Conferencia Episcopal (yo con esos señores nun me trato), creo que puen dir avisando pa que vayan proponiendo la canonizacion Delibes: ayeri fizo el so primer milagru dempues de muertu. Taba yo ayeri colos mios alumnos de 3º de diversificacion mirando la biografia d'el y dizme un de los mios rural boys: "Oye, esti de Diario d'un cazador, ¿tara bien? ¿podemos lleelu pa la tercera evaluacion?". Aleluya, hermanos.

(P.d. perdon poles tildes, tengo la tecla entrampiada)

Tres poemes de Bukowski

2010-03-08T19:45:00.005+02:00

Tengo sinciu (palabra oriental sintida güei a un compañeru de trabayu de Peñamellera) d'actualizar, y por facelo rápido y cómodo tiro d'una entrada ready-made, unes traducciones que fice pal que l'amigu Pablo X. Suárez les recitare na "Timba poética" del 18 d'avientu. Aprovecho amás pa recomendavos estos eventos qu'entama el susodichu nel chigre La Caja Negra d'Uviéu los últimos fines de selmana de cada mes. En febreru nun hubo por obres nel bar, pero tai atentos a la de marzu, que pue haber "espontanees" que salten al ruedu... En fin, nun m'estiendo más, déxovos con tres de los, pa mio idea, meyores poemes del vieyu borrachu.

La xenialidá de la masa

Hai trapacería, odiu, violencia, absurdu abondos nel ser humanu
Mediu como pa suministra-y a cualquier exércitu un día cualquiera

Y los que meyor achuquinen son los que prediquen contra ello
Y los que meyor odien son los que prediquen l’amor
Y los meyores na guerra al final son los que prediquen la paz

Los que prediquen a dios, necesiten dios
Los que prediquen la paz nun tienen paz
Los que prediquen la paz nun tienen amor

Cuidáu colos que prediquen
Cuidáu colos que saben
Cuidáu colos que yá tan lleendo llibros
Cuidáu colos que odien la probeza
O tan orguyosos d’ella
Cuidáu colos d’afalagu fácil
Porque necesiten que-yos lu devuelvas
Cuidáu colos que censuren fácil
Tienen mieu de lo que desconocen
Cuidáu colos que siempre busquen la masa pues
Nun son nada solos
Cuidáu del home mediu la muyer media
Cuidáu col so amor, el so amor ye mediocre
Busca al mediocre
pero hai xenialidá nel so odiu
hai xenialidá a esgaya nel so odiu como pa matate
pa matar a cualquiera
como nun quieren la soleda
nun entienden la soledá
tratarán de destruir cualquier cosa
distinta a lo d’ellos
como nun puen crear arte
nun entienden l’arte
van considerar el so fracasu creador
como un fracasu del mundu
como nun puen querer plenamentevan creer que’l to amor ye incompletu
y van odiate
y el so odiu va ser perfectu

como un diamante que rescampla
como un cuchiellu
como un monte
como un tigre
como la cicuta
la más bella de les sos artes

***********

Paxarín

Tengo un paxarín nel corazón que
Quier salir
Pero yo soi mui duru
Digo-y, quédate aquí, nun voi dexar
Que te vea nadie

Tengo un paxarín nel corazón que
Quier salir
Pero yo écho-y whiskey per él y
Fumu de pitos
Y ni les putes ni los chigreros
Ni los de les tiendes d’ultramarinos
Saben nunca qu’él
Ta ehí.

Tengo un paxarín nel corazón que
Quier salir
Pero yo soi mui duri,
Digo-y
Para quietu, ¿qué quies, entamámela?
¿Quies jodeme la obra?
¿Quies escoyoname les ventes de los mios llibros
N’Europa?

Tengo un paxarín nel corazón que
Quier salir
Pero yo soi mui llistu, namás lu dexo
Salir un poco de nueche
Cuando tol mundu duerme.
Digo-y, sé que tas ehí
Nun teas murniu
Dempués vuelvo a metelu
Y canta un poco
Ehí dientro, tampoco quiero dexalu
Morrer
Y dormimos xuntos
Asina, col nuestru pactu secretu
Y ye tan guapo como
Pa facer a unu
Llorar, pero yo nun
Lloro, ¿qué ye, que tu
Sí?

**********

Hai que ser amable

Siempre se nos pide
Qu’entendamos al otru
Y el so puntu de vista
Por mui
Pasáu de moda
Fatu o
Asquerosu
Que seya.

A ún se-y pide
Que vea
Los errores de los otros
L’esbardiu de la so vida
Con amabilidá
Sobremanera si son
Vieyos

Pero la vieyera ye’l total
De los nuestros fechos
Ellos avieyaron
mal
porque vivieron
descentraos,
y negáronse a velo.

que nun ye culpa d’ellos?

¿Entós de quién?
¿Mía?
A mi pídenme que-yos escuenda
El mio puntu de vista
Por mieu al so
Mieu.

La edá nun ye un crimen

Pero la vergoña
D’una vida
Marafundiada
Adréi

Ente tantes vides
Marafundiaes
Adréi

Sí.

Premiu Kreativu

2010-03-03T18:07:00.005+02:00

Noticies: El blogue Coses que (me) pasen recibe un premiu Kreativu de la mano d'un home qu'allorió.

(asina s'esplica)

Sr Alloriáu, munches gracies pol detalle, sobre too porque aceptar esti premiu conlleva la redacción d'una entrada contando siete coses personales sobre l'autora y ésta siempre precisa un emburrión pa ponese a escribir, poro, cualquier "compromisu" en que la pongan ye bienveníu.

Ehí van les siete coses:

1. Nací y viví tola vida en Mieres del Camín, sacando'l cursu 2004-2005 que tuvi d'Erasmus en Leeds, un par de meses que tuvi trabayando en Santander y onde toi agora, anque vuelvo casique tolos fines de selmana.

2. La mio familia ye, por parte paterna, enteramente de la parte d'Uxo y per parte materna, caún d'un sitiu de fuera d'Asturies: madrileños castizos y vascos maketos.

3. Nesti momentu dedícome a la enseñanza, toi dando inglés en 3º y 4º d'ESO y l'ámbitu sociollingüísticu en diversificación. Préstame la enseñanza, pero la mio rellación colos adolescentes ye una montaña rusa. Cuando daba clase a adultos yera too sorrises y bon rollu y agora veome a veces como la malvada bruxa del oeste y tolos vienres m'atopo una cana más. Sé que me tengo que dar una oportunidá, pero si veo que nun valgo déxolo y yá veré qué faigo, naide va tener que pagar polos mios errores si m'enquivoqué al escoyer la carrera.

4. Soi una compradora compulsiva de material de papelería, especialmente llibretes, que compro cola esperanza d'enllenar con cuentos y poemes. Ehí tán, en caxón. Tamién guardo tou tipu de papeles que tean escritos solo por una cara "p'a sucio".

5. D'un tiempu a esta parte soi incapaz de llevantame más d'una hora enantes de tener que salir de casa pa la primera obligación de la mañana. Por esi motivu les mañanes de los sábados y los domingos pa min nun esisten.

6. Soi Aries dafechu, entamo les coses con tol entusiasmu del mundu y emociónome coles idees nueves, pero soi incapaz de mantener esa enerxía munchu tiempu y esos proyectos revolucionarios que me monto en cinco minutos lleguen a olvidáseme por completu. Eso sí, nesos cinco minutos yá-y lo tuve que contar a tol que se me cruzó per delantre.

7. Primero tuvi un blogue nel qu'alternaba castellán y asturianu, con predominiu del primeru, pero nel branu del 2005 tuvi una especie de cayida de caballu (non precisamente camín de Damasco) y fui escribiendo cada vez menos en castellán (con ánimu poéticu-espresivu). Ensin acritú. Tampoco lleo nesta llingua davezu: prefiero la lliteratura anglosaxona en VO o n'asturianu.

Y agora los mios premiaos, a los que convido a facer lo mesmo:

1. Lo que fizo la borona.
2. In tabierna quando summus.
3. Ventanes pequeñes.
4. La verdá ye mentira
5. Trayasgaya.
6. La paciencia del caracol
7. Escucando estrelles

Yo yá voté

2010-01-07T13:02:00.005+02:00

Interrumpimos la sempiterna crónica del viaxe pa comunicar a los amables llectores de Coses que (me) pasen que l'autora d'esti modestu rincón cibernéticu yá votó los que-y paecen los candidatos a Meyor blogue del 2009, y convida al restu de la comunidá asturbloguera a que lo faiga con sinceridá y ensin más interés qu'agradecer el so esfuerzu a la xente que trabaya porque les persones que falamos y lleemos n'asturianu podamos disfrutar de la presencia de la nuesa llingua n'internet inxerta nunos conteníos de calidá que traten de tou tipu de temes d'interés, que faigan pola normalización y dignificación del nuestru idioma.

(Sicasí, l'autora nun niega que la xente que tien un blogue lu abriera pa satisfacer otru tipu d'intereses personales, y nesto inclúise, pero tien claro qu'eso ye una característica típica de los blogueros en cualquier llingua, yá seya inglés, castellán, cántabru o klingon).

Y pa que se vea que l'autora d'esti blogue nun escuende nada (y asina-y va), déxavos cola so votación del añu 2008 (cuidáu, non la d'esti añu, que va per otru camín):

Bones tardes, compañeros:

Les mios votaciones como autora de Coses que me pasen:

5 puntos pa La verdá ye mentira

3 puntos pa Mimi de Ribono

2 puntos pa Venerable Perru
Les razones son compartíes nos tres casos: conteníos cien por cien orixinales (non corta y pega) , desarrollaos n'entraes d'una cierta complexidá y de gran calidá llingüística.

http://www.votalmeyorblogue.webcindario.com/

Diariu de viaxe 3: Spanish bombs

2009-11-26T13:45:00.011+02:00

Bono, ye evidente que yá cásique van cuatro meses del viaxe de marres pero tando entamada la crónica nun me presta dexala empantanada asina que voi intentar siguir y dexala yá per escrito dempués d’habela contao tantes veces a tanta xente distinto (al puntu de que nun sé si quedará dalguién n’Asturies que la quiera lleer)
Sigo entós.
Volvemos a amanecer nel Astor Kensington al son de los vagones del metro. Güei ye’l día que nos va venir a ver Laurina, qu’exerce d’embaxadora mierense en Gales. Pa ella son unes tres hores de viaxe y va venir y tornar nel día, por venos… y por garrar el regalu de cumpleaños que-y traigo na maleta. Tenemos que dir a buscala a la estación de Paddington, y aprovechamos p’atravesar Hyde Park, anque como nun ye domingu nun vamos dir a ver a los qu’echen perorates. Fai un día bastante curiosu pa caminar.

Pel camín atopamos una estatua n’homenaxe a la caballería coles típiques amapoles de mentira que tanto-yos presten a los británicos y alcordámonos de los nuestros collacios amantes de la parafernalia militar.

En fin, llegamos, reunímonos con ella y vamos a buscar un pub con terraza, actividá na que calculo yo que gastemos aproximadamente un terciu del tiempu del viaxe. Non, a ver, en serio, ta complicao porque la terraza ye necesaria pa poder fumar, pero non en toles terraces vienden alcohol, porque hai munchos establecimientos que paecen chigres ¡pero resulta que son cafés y nun hai birra! Esta triste realidá diba costanos parte del nuesu preciáu tiempu de turistes, sobremanera al día viniente.
Dempués de tomar dalgo, da-y el regalu y tomar testimoniu audiovisual de la entrega pal restu de les participantes empobinamos pa Portobello, más cola intención de ver eso que viera na prensa como La Biblioteca Pública del Rock and Roll que pol famosu mercadillu (yá quedáremos escarmentaos del día anterior). Sicasí Portobello sorprendiónos gratamente. Tampoco yera día de mercáu, pero les sos tiendes d’antigüedaes y caxigalines “trendy” paeciéronnos muncho más prestoses que la cutrería de Camden. A la fin atopamos una llibrería de segunda mano (na

Nos anticuarios de Portobello Road dalgunos puen atopase hasta pruebes de ciertes teoríes panasturianistes.

qu’atiende un puntu que yo creo que foi contratáu pol so notable paecíu con Hugh Grant) que nos secuestra a los tres un cachu llargu. Volvemos pa la cai a buscar onde xintar. Fai un chornu impresionante. La xente de los puestos comenta que nun suelen salir entre selmana pero que con aquel tiempo apeteció-yos. Enjoy the heat, dícennos. Comemos una patata asada con fabes y quesu nuna terraza y vamos a buscar la biblioteca esa, que ye una especie d’instalación temporal que viera yo anunciada na prensa española. Al final resulta ser un pisín con tola moralla que coleccionaben Mick Jones y Joe Strummer per casa: cazadores vieyes, revistes de música, xuegos de soldaos… nun yera exactamente lo que teníemos en mente pero bono, ta simpático.

Al salir, sicasí, a la vuelta d’una esquina esperábanos una sorpresa cola que nun contábemos: un mosaicu mural enorme dedicáu a la guerra civil y a los comités d’apoyu a España qu’había nel barriu. Yá nos chocara enantes qu’atopáremos un supermercáu dedicáu exclusivamente a productos españoles (dende colonia Nenuco al Diez Minutos, pasando pelos clásicos Cola-Cao y Casera) y ye que polo visto’l barriu debió de ser una zona d’acoyida de refuxaos n’aquella época. Seguimos el camín un tantu emocionaos (sobre too L. pola visión de la comida española).

Entramos nun pub a tomar una pintuca y el tiempu cambia radicalmente de cara: el chornu nun aguanta más y tresfórmase en bastiazu.

Entre tantu decidimos qué facer y la decisión ye dir hacia’l centru a echar una güeyada a lo más típico de les postales de Londres: pa Trafalgar Square. El tiempo paez que va aguantando. ¿Arriesgarémonos a averanos un poco más a Westminster? Venga va. Y tenía que pasar: al dir averándonos a la zona de los monumentos, entama a llover si Dios tien agua. Y sólo un pub a la vista, enllenu de xente de traxe y corbata. Pero non traxe y corbata en plan comercial de Telecable: traxe y corbata en plan secretariu de Gordon Brown. Yo faigo por entrar pero la mio compañía nun considera apropiao entrar nel tal llugar coles nuestres mochiles, la nuesa pinta de pringaos y la soberana moyadura que yá llevábemos enriba. Yá toparémos otru chigre… o non. Caleyando coles nuestres sandalies empapaes nun atopábemos más que parques, edificios oficiales ensin soportales siquiera y agua, agua, agua. Al final lleguemos a Charing Cross fechos una llaceria y metímonos pal Pret-à-manger ensin saber que’l tal establecimientu non sólo nun tenía bañu (yo que soñaba con meteme embaxo un secador de manes d’aire) sinón que tenía l’aire acondicionao a cerca de 15 graos (la cuenta pal que lleva una chupa como si se metiere a la ducha vestíu). Una anécdota pa cuntar. Quedemos ellí hasta qu’escureció (si ye que podía tar más escuro) y entamaron a cerrar, tomando café y charrando los tres y tiremos pal metro, medio inundáu, pa que Laurina garrare el tren de vuelta a Swansea. Nosotros volviemos pa albergue moyaos y frayaos, yo nun estáu cásique catatónicu. ¿Quies salir o non?, repetíame V. Pasapalabra. Aquella nueche había un conciertu de ska de Brixton nel club escondíu y ¿fuéremos a L.luendres pa quedar en casa?

Si. Non. Vamos. Nomenón, si nun quies nun vamos. Vamos. Salir de casa con esti tiempu… Nun vamos tener ropa seco… Repunancies. Non, agora que yá salimos yo yá nun vuelvo. Ente tanto llegamos al club escondíu, pagamos la entrada pal conciertu y al baxar pa la sala descubrimos que nun hai nun dios y que tán pinchando salsa. ¡Arrancamos d’equí! Pónennos el cuñu del club y salimos d’ehí. Males cares. Esto va ser una mierda. Nun teníemos qu’haber salío. Vamos a comer un cachu de pizza a ver si entramos en razón. Al cabu una hora y picu volvemos y yá hai xente y ambiente skatalíticu. Incluso nos vino bien dir primero porque al pagar enantes de les once paguemos menos. El local, que dempués díbemos descubrir que ye del fíu de John Mayall, ta enllenu rapazos/ces postadolescentes guapos vistíos en plan mod. De repente entra un cuarentón nel club y digo: “menos mal, yá nun somos los más vieyos del llugar”. V nun me cree na penumbra del chigre, pero al salir a echar un pitu dame la razón a la lluz de les faroles. Un públicu mui mozu pa una música que nun ta de moda nun local que nun ye precisamente baratu… ¿pijos escuchando ska? Definitely like London.
Escuchamos a los Rude Boy Rascals from Brixton versionar clásicos del ska y el so particular homenaxe a Benidorm (“all I ever wanted to do was to go to Spain”) y volvemos pa casa en taxi (como volver d’Uviéu pa Mieres, en perres, que non en distancia) .

Diariu de viaxe 2: Cemetry gates

2009-08-25T01:13:00.009+02:00

Albergue Astor Kensington 8:30. Esconsonamos enantes de que suene’l despertador por mor d’un pequeñu detalle que nun venía na web del albergue. Resulta que la nuesa habitación da pa la vía del metro y a partir de ciertes hores tenemos el placer d’oyer el tracatrá del tren durante unos trenta segundos n’intervalos d’unos siete minutos. Un –chu-pi-to, cas-trón; un-chu-pi-to, cas-trón, ye como si dixere. En fin, ajo y agua. Tampoco hai muncha priesa por llevantase porque’l billete pa tol día sal muncho más baratu a partir de les 9:30 y ye meyor esperar hasta entós. Voi sola pal almuerzu porque V. nun gasta d’eso, pero naide quier conversación a eses hores.

Decidimos tirar pa Camden Town pa dar rienda suelta al consumismu socultural. Sicasí’l tema ye bastante decepcionante, muncho más de lo que yo recordaba. Ye casi too puestos de morralla que se pue encontrar en cualquier mercáu d’Asturies, inclusive tienda de chinos (que nun esistíen equí la última vez que tuviera). Y lo que ye peor, munchos de los vendedores son unos trileros que nos ven un billete de cincuenta llibres na cara. Entramos pa un sitiu y vemos un mecheru que-y presta a V. y que’l tío nos vende como zippo cuando nun yera más que “cheapo”. La sensación de tangue ye quémame per dientro, pero vamos dexalo tar. Hai que tar en guardia.
Damos una vuelta pa localizar coses que nos interesen. Camisetes de futbol pa mediu Mieres, barates a pesar de tener tolos sellos de calidá oficiales. Caeríen d’un camión. Ye bona compra, digo yo, porque si quedamos ensin perres a lo llargo del viaxe podemos poner un puestín en cualquier llau: “’¡camisetes del Celtic!, ¡camisetes del West Ham!, ¡Marlboro a cinco pounds!”. Vemos dalguna tienda de cómics y de discos (en particular una especializada en rockabilly y afines) interesantes. Primer choque sociollingüísticu: cuando’l dependiente entruga a V. si quier una bolsa pa los discos diz él: “yes, yes”.Corríxolu a la oreya: “yes, please”, y el rapaz de la tienda ríese. Dempués vamos por una Harrington pa V. La tienda ye como la cueva d’Ali-Babá de la ropa socultural, hai chupes de cuero, Harrington, pantalones de cuadros escoceses y de too, too apilao poles esquines. El tío faise’l simpáticu chapurreando l’español y mándanos baxar pal suétanu a probar la chupa, y cuando preguntamos el preciu diznos: “eso tenéis que falalo col xefe”. Huy madre. Entrugo a V. polo baxo “¿Cuánto cuesta n’España?” pero nun me lo sabe dicir. Mázcase’l timu. Vamos p’allá y el xefe, un vieyu de rasgos medio-orientales (y non precisamente de L’Infiestu) diznos: “45, por ser pa vosotros 35”. A V., feliz de la vida cola cazadora, faltá-y tiempu pa dicir que val, contraviniendo toles riegles establecíes del regatéu (el regatéu nun ta fechu pa la xente la cuenca, pa mio idea). La chupa, dempués d’un esamen exhaustivu, nun presenta marca comercial alguna, asina que yo doi en llamala Júrrinton. En fin. Pa la siguiente nun me pillen. Vamos a un puestu a mercar un sombreru negru, sombreru bluesman como diz V. y el tío diz que 15 llibres. Yo digo que tenemos muncha priesa y retruca: si tenéis muncha priesa déxovosla yá en 10. Hala, venga, vamos acabar con esto yá. Lo único que merco yo ye un par de camisetes na tienda de ropa de cáñamo qu’hai na esquina del Camden Lock, que tien una relación calidá preciu coyonuda, cinco llibres por prenda, y eso sí que ye ropa que nun s’atopa na plaza de Mieres. Conclusión: a Camden nun paga la pena dir si nun yes góticu/a o bakaleta. Nun creo que me vuelvan a ver per ehí

Terminaos los negocios decidimos dir a exorcizar el consumismu visitando la tumba de Marx, nel cementeriu de Highgate, que ta a unes paraes de metro de Camden, hacia’l norte. Seguimos el mapa qu’atopamos a la salida la estación pero pa variar la correlación cola distancia real ye engañosa. Hai que atravesar tou un barriu residencial de lladriyu colorao y cuando yá tamos pensando que nos equivocáramos vemos la llende d’atrás del cementeriu, enllena tumbes abandonaes, mediu fechu monte y con estes estatues d’ánxeles que meten tantu mieu. Pa detrás hai unos cartelos de película de terror, unos tablones onde se llee escrito a stencil: Danger unsafe, keep away. De toes maneres, ente les tumbes hai basoria y botes de cerveza (seguramente tamién condones y otres coses). Vamos bordeándolu un bon cachu, sacando fotos y pensando no que sería andar per ehí de nueche (con V. añorando los sos instrumentos de trabayu) hasta que llegamos a la entrada, onde un señorín mayor nos cobra 3 llibres por entrar y llegamos. Na tumba de Marx (Karl) hai un peazu bustu enorme a unos dos metros del suelu, y na peana les inscripciones: Trabayadores de toles tierres, axuntaivos y Los filósofos dedicáronse a interpretar el mundu de diverses maneres, la cuestión ye cambialu. Esperamos a que marchen otros turistes pa sacanos fotos puñu n’altu pa nun dar muncho’l cante y cotilleamos los mensaxes que dexó otra xente mientres mando un mms a Pablo cola foto y V. dexa la nuesa güelga nel ticket d’entrada (si vais ellí y atopáis un mensaxe n’asturianu yá sabéis quien foi). Al poco diemos la vuelta. La visita foi un poco friki, un poco mitómana, idólatra pue ser, pero prestosa. De vuelta pol cementeriu saco dalguna foto pa enseñá-y a Carmen, que-y presten los epitafios y ellí los hai bastante curiosos. Fulanito de tal, cineasta, que nunca dixo una palabra fosca y Fulanita de tal, una bona muyer (qué felices sedríen). A la torna echo una güeyada n’honor a Jesús a la biblioteca del barriu, piquiñina y galana como la de Turón. Tamién hai guarderíes y neños de tolos colores. Lleva tol día faciendo calor. Tomamos una pintuca nuna terraza y escribimos nel cuadernu bitácora, qu’acaba bañáu en cerveza; y cuando nos damos cuenta acabó la hora’l pinchu (o del té) de los obreros. Vémonos arrodiaos pol ruíu de les obres y marchamos (curiosamente, nun sedría la última vez que nos pasara eso).
Gloucester Road otra vez, dempués d’un leve despiste nel metro. Mercamos dalgunes coses pa col embutíu y el quesu de los beyos que triximos y comémoslo na cocina l’albergue, al son d’un capítulu de Friends. Dempués vamos pal cuartu a descansar un ratu y pensar qué facer de nueche. Busco n’internet onde queden tanto’l club de blues que nos recomendó Lisa como’l sitiu onde diba haber al día siguiente un conciertu de ska, y resulta que queden los dos nel soho y bastante cerca ún d’otru.

A la tardiquina tiramos p’allá. Baxamos en Picadilly pa que Vitor lo vea y n’homenaxe a La Polla Records. Vuelve a vese too animao. “Mira como me mira la xente pa la camiseta de Clint Eastwood que pon ¿Cómo ye, ho?”. A saber qué camentarán. Vemos les carteleres de los teatros colos musicales: Billy Eliot, Les Miserables… Hamlet protagonizao por Jude Law y Judy Dench, casi ná. Hai infinitos restauranes . V. ta emperráu en localizar el club de ska enantes de cenar pero nun hai nin rastru. Aparentemente nun ta onde dicía la dirección. Andamos d’un llau a otru, metémonos nun ciber pa comprobar qu’apuntáramos bien les señes. Al final acabo entrando nel restaurán qu’hai onde debería tar el dichosu club y too tien una explicación: el club ta nel suétanu del restaurán y entá nun abrió. La puerta ye enforma discreta y nun tien cartelu (si llega dir un paisanu solu ta tovía buscándolu, yá se sabe como son ellos pa entrugar). Yá podemos dir a cenar y escueyo un sitiu piquiñín que ta faciendo esquina. Llámase Vitaorganics y ye un sitiu veganu, ecolóxicu ya hipermegasanu de la muerte, pero bien asequible pa ser el putu centru: 1,80 per persona y una llibra por cada garciellada qu’eches de los distintos cazos qu’hai per ehí. La comida ye una obra d’arte visual y tien bona pinta, anque de lo meyor yá queda poco: tienen que rebañanos el cazu d’espaguetis d’escanda. Pa detrás tomo un tancáu de café con xelu con sirope d’agave (el zucre, pesie a ser vexetal, tamién ta proscrito por dalguna razón) nun vasu tamañu cocacola y a siguir. El club discretu paez que nun abre güei, asina que vamos pa Ain’t nothing but the blues. Hai un grupu tocando, un camareru mulatu mui gayasperu y una camarera clónica de Lisbeth Salander, tamién mui agradable. Ye sorprendente l’amabilidá de los trabayadores de la hostelería, nun te perdonen la vida nin te llamen maricón como los de Mieres (anque seyan códigos de comunicación asumíos pola sociedá). La mayor parte de la xente tien una sorrisa na boca pa falar contigo, por munchos tópicos de frialdá británica que circulen. Lo malo vien cuando te pones a tomar dalgo y te decates con horror de que nun se pue fumar nin siquier salir fuera, porque ye un chigre de los que dempués hai cola pa entrar (otru vezu británicu que de mano da por culo pero dempués s’agradez: nos bares de copes el porteru va cuntando a la xente qu’entra y cuando llega’l puntu en que’l sitiu peta y nun se pue tar a gustu nun te dexen entrar hasta que nun salgan los que tan dientro). Entreténgome sacando fotos al empapeláu de les paredes, que son partitures de blues, y grabando al grupu que toca. Tomamos un par d’elles y volvemos pal albergue como la Cenicienta, enantes de que zarre’l metro.

La lluna enllena sobre París... digo... sobre Londres

Diariu de viaxe 1: London calling

2009-08-20T15:12:00.003+02:00

Xueves 16:00 hora inglesa
Llegamos a London Stansted ensin mayor noveda. El mieu de V. a volar (supuestu mieu, porque como nunca enantes se viera neses en realidá tampoco podía saber si lo tenía o non, dicía yo) resultó ser too una pose. Un trámite como otru cualquiera, páselo yo peor col mio dolor d’oyíos nel aterrizaxe. Montamos nel bus de Terravisión, onde sorprendentemente yá somos los únicos españoles. La falta de costume a esto faime proferir un comentariu sobre los italianos bastante poco afortunáu teniendo en cuenta la composición nacional mayoritaria del autobús. Bien. Pásame por dir de guai. Vamos apiñotaos contra la ventana (pídomela yo, que pa eso foi V. del llau d’ella nel avión), “pues nun ye tan raro esto, hai fresnos, umeros, paleros…”. Tamos a la expectativa d’entamar a ver nomes conocíos nos cartelos. El primeru d’ellos, Bow: “sábese si yes Cockney si escuches les campanes de la ilesia de Bow dende la ventana”. L’East End, como yera d’esperar, obreru y multicolor. Hermoses llavanderíes, kioscos, take aways. Mozos de sudadera charrando ente ellos cola capucha subida y pinta de nun tar faciendo nada bono nin malo. Primera parada en Liverpool Street y entama lo mil veces visto en fotos y pelis. La verdá que paga la pena’l viaxe en terravision, ye dalgo más barato qu’otres compañíes y dante un tour pel centru de propina: enantes de posate en Victoria Station yá visti tolo que se supón qu’hai que ver de la City (con mayúscula). La estación, apaeció, triste y oscura como la recordaba. Pal metro, rápido, rápido, rápido. Primer sustu: la máquina de sacar los billetes pal metro nun me garra la tarxeta de creitu, pegoyu de tol nuesu bientar nos próximos ocho díes. Cagontal, como nun me la garren nel albergue a ver qué coyones facemos. Mala hostia. El chornu de Londres y del metro nun ayuda, y la prisa d’haber quedao con Lisa a les siete y media tampoco. Doime cuenta de que venimos d’otru mundiu onde les distancies y el tiempu tienen otra correllación.
Gloucester Road. Según el mapa l’albergue tien que tar dando la vuelta la esquina, pa la otra cera. Equí nun s’estilen los pasos de cebra y cruzar ye una odisea, yá nun m’alcordaba. La entrada del albergue ye cutre a maza, ábrenos un tío que taba pasando la aspiradora pela escalera (“oye, polo menos llimpien”). La tarxeta furrula y el cuartu priváu qu’acuté ye sorprendentemente grande, muncho más que’l del hotel que tuvi la otra vez, y eso que yera de los caros. Amás tienennoslu fresquín d’aire acondicionao y eso, xunto cola colcha blanca nuclear y la ducha (metida nun armariu empotráu) restaura l’optimismu. ¡Siete y cuartu! “Oi, Lisa, perdona pero acabamos de llegar tovía,…” “Joder, Laura, qué española eres…” Pero ye broma, nun-y da más porque ella tamién ta azacanada comprando coses pa la boda de la hermana, que ye’l sábadu. Quedamos pa les ocho y media y asina podemos llegar goliendo a llimpio y mudaínos.
Leicester Square. El Soho animáu. ¿Será p’aquí, p’allá? Ensin saber cómo yá llegamos tarde otra vez, son cásique menos cuartu. Lisa dame un abrazu y les aguyes del reló, una pieza antigua que lleva al pescuezu, quéden-y enganchaes na mio camisa y suéltense. Anque fai por echa-y flema inglesa veo-y l’enfastiu na cara. Entamamos bien. Pónemonos a buscales y anque al momentu hai como cuatro o cinco desconocíos a la gueta les aguyes, sólo apaez una. Coses que pasen, pero a Lisa dúra-y tovía un cachu la rabia y a min una vergoña que nun ye del too propia porque tampoco ye que fuere culpa mía.
Lisa llévanos a cenar a un restaurán malayu. Debe ser bonu, porque somos cásique los únicos occidentales ellí. Dexamos que fale ella y pidi tres platos pa compartir. Anque los ingredientes son conocíos (fideos, verdures, pitu) , les testures son distintes: too esmigayao o amasao con apariencia de picadiyu, pero sabor mui distintu y la sopa cásique con más sólido que líquido. “¿Pero tu nun yeres vexetariana?” “Ya non, dexélo”. Manca la maera, un añu viviendo n’Asturies, cola d’ellí ensin probar la fabada y agora ponse a comer carne. Lisa ye una apasionada de la comida, de fechu fizo la tesis sobre la comida na lliteratura, “les mios dos coses favorites”. A los llectores comunes ye un aspectu que nos pasa desapercibíu pero tolos personaxes lliterarios tienen que comer y beber ¿nunca lo pensastis? Agora dedícase a la crítica gastronómica cuando pue y pa sobrevivir fai talleres de tiempu llibre pa Young carers, neños que se tienen que facer cargu de responsabilidaes en casa que nun-yos correspuenden. Vive nun almacén reformáu con otres cuatro persones nel norte de la ciudá, na parte que yá nun sal nos mapes, y fala un castellán mui curiosu y simpáticu. Ella identifica falar fluío con meter un tacu cada dos pallabres y V. y yo escoyonámonos: ¿falamos realmente asina o ye como nos ven los estranxeros?
Pago yo la cena, pol reló esgonciáu y pol carácter asturianu. Salimos a tomar la primer pinta nun pub llamáu French House, onde’l camareru lleva camiseta a rayes reglamentaria y bigote de forzudu de circu antiguu. O non, pa ser esactos, porque cola llei del tabacu local la xente sal a chumar na cai, cosa que nun recordaba que se ficiere hai cuatro años. Lisa escríbenos nel cuadernu de bitácora un poema y fai memoria de sitios de Londres y Edimburgo que nos podríen prestar. Como somos subnormales traximos la maleta llena de tabaco, y ellí quedó, na maleta, asina que tengo qu’averame a un kioscu a comprar una caxa de diez, de les que yá nun hai equí. Préstame cada momentu a caramelu, noto una emoción que diba tiempu que nun sentía y doime cuenta de lo que me gusta viaxar y compartir la vida con xente que t’acueye como Lisa. Tomamos otra n’otru llau y marchamos pal metro enantes de que zarrare. Despedímonos cola promesa de venos n’Asturies y de facer con ella coses que cuando ella vivió equí nun podíemos poles estrecheces de la vida estudiante. Amás, pa ella yá nun va pasar más el tiempu.
Gloucester Road otra vez. Fáisenos raro tar de vacaciones y volver pa casa a les doce. Ponémonos a andar y atopamos cais medio vacies, y dalguna terraza onde se vía a un matrimoniu cuarentón y un rapazucu adolescente tomando dalgo, “mira, como en Mieres, deben ser prexubilaos tamién”. A les poques cais dámonos cuenta de que tamos andando na dirección contraria y damos vuelta pa topar el albergue. Una y bones nos ubicamos ocúrresenos dir a buscar la terraza esa pa tomar la última. Damos la vuelta y nin rastru d’ella. ¿Sería un espeyismu?

Normalización nel sector servicios

2009-07-27T11:28:00.003+02:00

Nun censuro los datos personales porque siempre vien bien tener el teléfonu d'un fontaneru asturfalante a mano.

2009-06-30T00:29:00.006+02:00

Alcuérdome de tener cinco años y tar sola delantre de la tele, xusto dempués de qu'acabaren los dibuxos y enantes de qu'entamaren les coses de mayores, nuna d'eses pauses onde amás d'anuncios echaben "vídeos musicales" en cuenta de videoclips, y de ver a una panda de rapazos con pinta quinquis bailando nuna estación de metro y al frente un rapaz rizosu con unos güeyos enormes y mui guapu a pesar de tener un poco cara ratonín. Pero lo meyor yera la música y la forma de movese, nun manera de tar viéndolo y nun intentar imitalos.

Alcuérdome de tener diez años y tar viendo un programa tituláu "Pasando", onde se cuntaben coses mui interesantes, y que pusieren el videoclip de "Black or white", otra vez con una música irresistible y un mensaxe tan inxenuamente cursiprogre que nun podía por menos que fascinar a una neña d'esa edá. Alcuérdome de dibuxar el logo de los zapatos negros y los calcetos blancos, de querer disfrazame d'él (nun llegué a facelo) y poner coleta dexando un rizu pela cara.

Alcuérdome de salir al poco d'eso les primeres acusaciones contra él y d'entrugá-y a mio ma "¿Tu dexaríes que me llevare Michael Jackson pa casa si te dan un millón de dólares?". Nótese que yo, nun enterándome de la misa la media, veía esa hipótesis como una situación win-win, too ventaxes, y nun entendí la prisa que se dio ella en dicir "¡De nenguna manera!".

Alcuérdome de que pesie a too, el discu de History sonó ensin descansu nel mio walkman (téngolu en cassette compráu, l'hermanu probe de los formatos d'audio) nel branu de 1996, anque nun me prestaba reconoce-y a mio pá qu'a mi tamien me paecíen abondo meyores les canciones vieyes. Alcuérdome de que me gustaba sobremanera Man in the mirror.

Alcuérdome de qu'un par d'años más tarde, cuando yá nun miraba pa él, una compañera de clase que yera del club de fans traxo al institutu unes fueyes pa recoyer firmes pa pidir que viniere de xira equí. Alcuérdome de qu'eses fueyes acabaron en manes del facha de la clase que-y les arrampuñó al gritu de "¡Que non, que nun quiero negros en España!" (anque d'aquella yá yera más blancu qu'él). Los demás ríimonos (sobre too de la rapaza, que yera la más pringá de la clase).

Alcuérdome de qu'hai unos años un compañeru de facultá me contó que tenía la enfermedá de Michael Jackson y que yo, nun arranque d'humor mierense, contesté: "¿Qué yes, pederasta?". Pero non, tenía vitíligo y quedáben-y manches blanques pel pelleyu, anque notábense-y poco porque yera pálidu a esgaya. Alcuérdome de que yo creí na enfermedá d'él pero non na de MJ, y seguí atribuyéndo-y la blancura a la tontería y el refalfiu.

Alcuérdome de toles veces que lu vi pela tele estos años cola máscara, sacando al guaje pela ventana, colos xuicios, con tola so decadencia física y moral.

Dicía güei un amigu de la que tomábemos el café que-y jode qu'agora tol mundu paez que ye superfan de Michael Jackson y que siempre lo fue, cuando hai dos selmanes namás que se lu amentaba pa facer la risión. Dios nos llibre de la hora de les alabances, pero la verdá que pa los neños de los ochenta Jacko ye una constante nes nuestres vides, un símbolu: una especie de vanitas alvirtiéndonos que les perres nun dan la felicidá y de lo malos que son los escesos. Güei, visto con güeyos un poco más maduros lo que pueo dicir ye que me da muncha pena. Ye'l casu d'un ser humanu instrumentalizáu, creáu dende neñu namás pal espectáculu, ensin habilidaes sociales nin autoestima nenguna y con perres y afalagos entrando per toles puertes... hasta que dexaron d'entrar.

Mecigaya poética

2009-06-27T02:16:00.004+02:00

Nel cursu avanzáu d'asturianu de l'Academia de la llingua (Ibias 2005) ficimos un esperimentu lliterariu que consistía en garrar versos de distintos poemes y autores y mezclalos intentando da-yos dalgún sentíu o polo menos ritmu, amestando siacasu dalguna palabra propia o cambiando dalgún elementu. La materia prima, creo recordar, yeren poemarios de la segunda xeneración del Surdimientu. Yo daquella nun lleera casi poesía y garré los versos atendiendo mayormente a los que más casaben col ambiente de selmana y media de nueches en caldia que llevábemos (un estímulu pa la creatividá coyonudu, la verdá). Agora faime gracia dame cuenta de que dalgún d'ellos ye de ilustre pluma. Güei alcordéme del poema que saliera y petecióme ponelu equí. Si dalgún que llea esto reconoz dalgún versu y s'ufiende, reclamaciones a Marta Mori, que foi la envizcadora. Si dalgún que llea esto reconoz dalgún versu y tien a bien dicime d'ónde ye, agradézo-ylo.

Nueche de miércoles xabaz*

Enterré na poza que nun cierra

la povisa ayeno na sangre enceso.

De tierra nuevo fartuquéme.

Nun me vengas agora cola refugaya

de la música del agua que retumba

como una fola en to verde playa.

¿Pretendes redimimime con estética?

Calla, enchipémonos de tarranches necies

como bébedos calabres de xerez y whisky

y esfutemos del vómitu y la risa.

*El títulu sí ye míu.

Apuntes del natural

2009-06-12T00:38:00.004+02:00

Un xiblíu tresportó la noticia dende'l fondu de la plaza Requexo, multiplicándose nel aire de la tardiquina al so pasu. Pero, como si se reproduciere por mitosis, yá nun yera'l mesmu xiblíu, sinón munchos iguales, producíos por boques distintes. Al llegar estos soníos, les manes posaben los vasos nes meses de madera y les cabeces volvíense buscando l'aniciu de too aquello. La voz de "¡cabrones!" axuntosé a les notes de la melodía desfinada. Al cabu descubrióse l'oxetivu de la ira del pueblu en dos coches blancos con fraxes azules. El glayaríu aumentaba cola colaboración de los que sabíen de qué iba'l tema y la de los que sólo sabíen de los sos protagonistes, nesti casu los eternos villanos, presuntos culpables.

-¡A onde tenéis que dir nun vais, cabrones!

-¿Qué pasó? ¿Qué pasó?
- Que lleven a un morenín, tío, los hijos de puta.

[Requexo, 11 de xunu de 2009]

Reflexón post-electoral al estilu Pingarates

2009-06-09T10:53:00.002+02:00

Tamos condergaos a que remanen el cotarru aquellos a los que nos val más compra-yos un traxe que convidalos a comer o viceversa.

El síndrome de Mastropiero

2009-05-28T23:48:00.002+02:00

Síndrome de Mastropiero: dizse del que sufren los que cuando se ven obligaos escribir por encargu, producen obres mediocres y inespresives. Pela contra, cuando obedecen namás a la so inspiración, enxamás escriben nada.

Sí, será mal de munchos, pero nun me quiero consolar.

Nun dexéis de documentavos sobre la apasionante vida y obra del maestru Johan Sebastian Mastropiero.

Cuántu... y yo qué vieya

2009-05-26T22:29:00.004+02:00

Santiago Niño Becerra diz munches coses. De fechu lleva diciéndoles dende 2005, cuando'l mundu capitalista vivía na eterna primavera y los pisitófilos creditófagos salíen trunfantes a los balcones de los zulinos creyéndose más clientes del bancu qu'esclavos, aquella época na que una colomina nun yera un pisu, sinón una inversión que nunca baxaba y el paru una alcordanza entrañable de los ochenta como Naranjito. Solo unos pocos atendieron pa elles.

Agora diz que pal 2070 vamos vivir nun mundu onde lo individual pierda sentíu en favor de lo colectivo, basáu na collaboració, el repartu y el aprovechamientu racional de recursos y onde la xente viva d'alcuerdu coles sos necesidaes, non de los caprichos. Pa mio idea qu'esti tipu de sociedá tien un nome, pero nun ye cuestión d'asustar a la xente.

Lo que yo pienso al respectu recuérdame al personaxe d' Andamios, la novela de Benedetti na qu'había un rapacín al que-y contaren que la próxima revolución diba a ser nel 2017 y él creyólo, contentu con solo pensar que tovía diba ser mozu desa pa disfrutalo. Curiosamente, naide piensa que puea ser de los que caen pola causa.

¡Y onde voi dir yo yá con 88 años!

Manifiestu xeneracional

2009-05-25T21:53:00.004+02:00

Soi de la primer xeneración que tien a los padres nel messenger y una de les últimes en nun tener a los güelos.

Un regalu pa mi mesma

2009-05-24T22:54:00.003+02:00

El 24 de mayu de 2007 diome una vená rara y abrí esti chiringuitu. 2 años y 75 entraes más tarde, pueo dicir que más que contenta de qu'aquel día, pa variar, ficiera casu a la ocurrencia y pa detrás nun dexar el xuguete a los cuatro díes. Porque como dixe más p'arriba, foi un regalu pa mi mesma: facilitóme conocer a muncha xente interesante, permitióme esplorar un poco les mios posibilidaes como escritora y anque me quedaron munchos temes nel tinteru fui capaz de tener un poco disciplina, cosa de la que nunca anduve mui sobrá precisamente.

Podeis dexar felicitaciones y ónde pueo pasar a recoyer regalos y premios nos comentarios.

Nosotres podemos, vosotros podéis

2009-05-14T14:59:00.004+02:00

L'autora d'estes palabruques da la norabona a los practicantes y aficionaos a la ximnasia rítmica masculina pol reciente llogru de conseguir que s'afite la categoría pa homes nos campeonatos d'España, al tiempu que recuerda a tol mundu que pa consiguir la igualdá ente sexos nel deporte queda tovía muncho por andar y que les victories contra les torgues de xéneru nun son regalaes nin pa unos nin pa otres.

Porque la igualdá nel deporte inconscientemente identificábase con "que les muyeres faigan coses de paisanu, que son les interesantes", incorporándose estes a la competición n'actividaes que taben diseñaes pa otros cuerpos, nos que difícilmente puen batir récors; al tiempu que se pensaba "qué paisanu va querer facer eso" no que tocaba a los deportes afayaos a les condiciones físiques de la muyer (los pocos qu'hai).

Agora sólo falta dir equiparándose n'atención mediática y repercusión na sociedá. Hai que siguir.

Dedicao a la plantiya del Llosalín CF de La Ribera y a tolos que lluchen por facer lo que-yos presta, ensin más.

Publicidá dempués de Fukuyama

2009-05-12T19:41:00.003+02:00

Taba yo viciándome na páxina d'Amazon y faciendome payes (¿deos?) mentales con escritores cantantes ingleses de la mio edá cuando, de repente, pela esquina del güeyu veo ceguñar una frase inquietante: ¡NAZ L'INTERNET COMUNISTA!

¿De cuándo p'acá comunista ye una palabra pa usar en publicidá? ¡Y con connotaciones positives!

Tamos perdíos... y con eso tará d'alcuerdu tanto los d'una ideoloxía como los de la contraria.

Agora solo falta l'anunciu de Mahou cola música de la internacional y la miles de chinos coreando: Mahou, Mahou, Mahou

P.D. Sres de Mahou: alviérto-yos que si veo un anunciu asemeyáu al arriba descritu en televisión pienso denuncialo por plaxu y qu'esti testu val de prueba al mio favor.

P.P.D En fin, doime cuenta de que si l'anunciu lo que quería yera llamar poderosamente l'atención, consiguiólo. Y yo pa detrás faciéndome ecu. Nun te digo.

Ascu

2009-05-11T15:06:00.005+02:00

Acabo de ver el vídeo del asesinatu de Carlos Palomino en contra de la mio voluntá. ¡Gracies, Antena 3!
Gracies por retresmitir la muerte violenta d'una persona como si fuere un gol del Madrid.
Gracies por tratar al asesín pol nome y a les víctimes como "antisistemes" (xente chunga y belicoso qu'anda buscando guerra).
Gracies por recordame que a esi monu con navaya vosotros lu consideráis "del sistema" yo nun quiero ser parte d'él.
Gracies por recordame qué telediariu nun ver.

Yo 1- 0 Capitalismu (lo meyor de la crisis)

2009-05-09T18:46:00.006+02:00

A lo meyor hai llectores, si ye que cai perequí dalgún, que piense que lo más afechisco ye que fale de la manifestación d'ayer, l'actu de l'Academia o dalgún otru aspeutu de la Selmana de les Lletres. Pero non, paso. Nun m'apetez. Hai aconteceres que me piquen la gana d'escribir y otros que non, y como nun obedezo a más llinia editorial que la que me sal de cierta parte, si quiero escribo y si no non. Y tampoco tien que ver con que la cosa seya más o menos memorable o importante, ye dalgo qu'apaez ensin nengún tipu de criteriu.

Una d'estes coses ensin importancia (aparente) pasóme'l vienres, na caxa d'una sucursal mierense de cierta cadena asturiana de supermercaos que tien un logo onde predominen el blanco y el mariello (lo que hai que facer por nun facer publicidá). De la que salgo de trabayar suelo pasar per ehí tolos díes pa mercar el pan y/o dalguna cosuca que faiga falta pa la comida. Podría imaxinar que les caxeres, cuando me ven entrar, piensen "mira, yá ta ehí la pesá de Numedesbolsaqueyeestonamás". Efectivamente, hai dellos meses que'l mio enfotu en nun morrer sepultada embaxo una montaña de bolses de plástico y aforrar recursos del planeta tienme ganáu l'odiu y la incomprensión de les trabayadores de les medianes superficies. Non poques veces tuvieron que trabayar doble porque cola inercia yá metieren les coses na bolsa, o-yos tengo parao la cola intentando desatar el ñudu de la bolsa con dos llechugues y un cuartu de freses que tien pol tique de la frutería, pa poder garrala peles ases y nun necesitar una bolsa de plásticu pa llevar otra bolsa de plásticu esactamente igual (y a veces aprétenlu con ganes). Y a mi dame hasta un poco vergüenza alterá-yos la dinámica de movimientu y tamién (anque menos) aguantar la solombra de la güeyada estrañada de "pa qué nun la garrará, si ye gratis". Como si fuere obligatorio rapiñar tolo que ye gratis. Como si les coses nun tuvieren más costu que l'económicu.

En fin, qu'ayer llego yo p'ahí pa la caxa con dos quilos de coses de la frutería y una bolsina aparte de quivis asturianos* pensando "bono, güei nun la voi armar, garro la bolsa como puea ensin desatar, salgo del xaréu y yá-y quitaré el ñudu onde nun tapone la circulación". Pues pa la mio sorpresa, nun fizo falta: según pasaron les coses por caxa la moza mui amablemente quitóme'l ñudu (sensiblemente menos apretáu qu'otres veces), metióme la bolsa quivis na de les otres coses y más amablemente entá esplicóme que lo sentía, pero que yá nun-yos dexen dar bolses pa eso, que-yos mandaron desatar les ases y nun dar más que les imprescindibles.

-Ah, qué ye, por "reciclar "¿eh?- dixo la paisana que diba detrás, enanchando'l significáu de reciclar pa tolo que tien que ver colo ecolóxico.

-No, ho, ye pa controlar los gastos - aclarónos la moza.

Ta claro que l'ecoloxismu nun ye dalgo que preocupe a les grandes empreses y que cuando la cosa va bien hai que gastar y consumir como si nun hubiera mañana. Pero mira, yá nun me voi tener que preocupar más de desfacer ñudos. Apúntomelo como una victoria.

Yá veis, hipotéticos llectores, qué parrafada sobre un tema tan trivial, en vez de comentar lo d'ayer, que si unu dixo, que si la otra dixo, que si aquellos ficieron o dexaron de facer o fueron o dexaron de dir a nun sé onde... ¿Por qué me siento como obligada a facer referencia a ello?

Paezme que si lo que quiero ye normalidá lo meyor que pueo facer ye apurrir el mio granín de coses normales que (me) pasen y que me pasen pela cabeza, ensin importar el día que seya, mayu o febreru, vienres o miércoles, de comedia o funeral (o una mezcla d'entrambes)?

*Otru apunte ecolóxicu: nun se deberíen mercar alimentos que viaxaren más que tu en tola to vida. Si hai que contaminar l'aire coles emisiones d'un avión nel trayectu Nueva Zelanda-España prefiero que seya por dir yo ellí, y mentanto aforro y non comer quivis de la vega'l Nalón.

Pa saber más sobre les bolses y por qué son males calcái equí.

¡Y nun vos olvidéis de supervitaminavos y supermineralizavos con kiwis asturianos, que son lo más rico y sano que hai!

Agora que queda poco pa San Bable Mártir...

2009-04-27T00:02:00.002+02:00

... o dalgún asoma la patuca o quieren tenenos contentos. Hai que reconocer que quedó guapo.

Más claro, agua.

2009-04-21T23:52:00.005+02:00

Mirái esti anunciu. Qué guapo, publicidá con mensaxe ecoloxista. Qué importante y saludable ye l'agua. Y que conste que nos dicen que beber agua del grifu ye igual de bono que lo de botella, pero lo d'ellos ye ecolóxico y natural a más nun poder. Cásique da la sensación de que si nun-yos compres a ellos tas faciendo-y mal al planeta.

¿Y cuándo teníen pensao dicir que fabricar una botella de plásticu d'eses gasta el triple d'agua o más de lo que lleven?

Lo más gordo ye que nos tienen por tontos o inorantes, colo que sabe'l Google y lo fácil que ye pregunta-y. Qué se pue esperar de Coca-cola.

Tenemos la suerte de vivir nun sitiu onde tenemos agua potable dientro casa, llibre d'enfermedaes y a la temperatura que queramos, por un preciu razonable y bono de beber (n'otros llugares, mesmamente en Santander, nun ye asina). Nun caigamos nestes engañifes.

Nun sigo más, otru día falo de la estafa del agua nos bares y restauranes y de cómo n'Inglaterra te lo dan del grifu gratis cola comida ensin mirate con despreciu.

Bailla (y escuca) la crisis

2009-04-16T23:56:00.009+02:00

Como casique ye tovía'l mio cumpleaños (anque de xuru que nun lo será cuando lleas esto), voi convidavos a unes cuantes. Nin rondes de sidra nin fartures de chipirones, pero sustancioso igualmente. Ehí vos van, delles coses que van dexar a la mulina al paru un tiempucu, ensin dexar de disfrutar gratis y nel intre de tola música, cine y TV del mundu mundial y mui importante, keeping it legal, pa que nun vos prinde la nueva ministra.

1. Spotify.L'inventu del sieglu. Descárgueslu, busques el últimu discu del to grupu preferíu, calques (hasta ehí como nel emule)... et voilà ¡escúcheslu! ¡Darréu! ¡Jódete y bailla, SGAE! Lo malo ye que nun lo pues meter pal ipod, pero equí como toos baxamos música pa ver si nos gusta y dempués dir a mercalo (¿o non, neños?), nun pasa nada. Otra pega que tien ye que nun ta "too", y de música asturiana nun ta "la mayoría", pero bono, nos P2P tampoco y son malvaos y maléficos y van a quitate'l trabayu a poco que te confíes (¿o esos yeren los inmigrantes?). Bono, y otra más, que te meten publicidá, pero mui mui poco (igual un anunciu a la hora, y dos siguíos como muncho, eso sí, casi siempre de vodafone).

2. Surf the channel. Pasa de la tele yá, que ye too puxarra. Lo poco qu'hai bueno pues baxalo d'internet... o velo al momentu. Esta ye la web que yo uso pa ver Muyeres Desesperaes enantes que na FOX. Nun fai falta nin rexistrase, solo calcar nos enllaces. Lo malo: ta too n'inglés (bono, asina practicáis). Hai películes y series (dende ALF a lo más nuevo de Perdíos).

3. Cine directo. Idem eadem idem pa películes n'español y V.O.S.E. (comerciales y de calidá).

Oh, you know, downloading is so 2008...

(De)Xeneración del pogu

2009-04-13T23:24:00.007+02:00

Llevo diez años diendo a conciertos de Dixebra, cumpliéronse l'otru día na Folixa na Primavera. Dende entós veríalos en direutu tengo mieu que más de 20 veces: en Mieres, en Uviéu, en Xixón, en Turón, en Carbayín, en Santo Adriano, n'Avilés, en Soto d'Ayer, en La Pola L.lena, en Los Mártires, en Candás... hasta nel Campoamor . Y hai un fenómenu del que tenía gana de dar fe. En realidá ta emparentao con dalgo que yá diz Xune d'hai un tiempu p'acá, enantes de cantar Rapaza nacionaliega. Enantes, la presencia femenina nes files d'alante yera mui escasa. Había que ser atrevida. Yo tengo visto reventar llabios, resgar camisetes, facese moretones, etc... na batalla. Habíalos qu'aprovecharon la ocasión pa vengase discretamente d'enemigos que nin siquiera yeren conscientes de selo. Y anque aprendíes a sacar los coldos y defender el to espaciu, tengo pasáolo mal y visto'l cielu al ser rescatada por dalgún amigu más grande d'aquellos forfugos nos que se convertíen los pogos (menos nel Campoamor, anque intentáremos inventar daquella el pogu de salón). Pero siguíemos entrando al trapu, porque como ellí nun se viven los conciertos en nengún sitiu.

Poco a poco, pémeque que sobre too nos últimos cinco años, fueron allegándose más moces al escenariu (y non precisamente a tira-yos bragues), y el col cambéu demográficu paez que foi camudando tamién el fechu pogueru. Nun sé, ye una percepción personal, igual otra xente lo achaca a que yá nun hai coyones o a que sube la media d'edá ente'l públicu. El casu ye que a mi dame qu'agora hai menos hosties gratuites, menos coldos en punta, menos secueles físiques. Emburriones y ambiente folixariu sigue habiendo, pero agora cabe más xente nél. Camiento qu'habrá quien lo vea como una pérdida de les esencies. Pa mi meyor asina.

Odiu normalizáu

2009-03-30T23:27:00.006+02:00

Cómo presta ver l'asturianu na cai, usáu espontánemente y ensin subvenciones de por mediu...

(Visto en Mieres, cai Reinerio García, enfrente del IES Sánchez Lastra, vulgo Maestría).

Homes y muyeres

2009-03-08T22:03:00.004+02:00

Ye qu'hai coses que solo una muyer pue llegar a conocer... Por exemplu la indescriptible sensación de despertase un domingu baxo los efectos combinaos del dolor menstrual y la resaca, alternando los sos síntomes de munchu fríu o munchu calor, o too ello xunto... Gloria. ¡Alegríes del metabolismu femeninu!

Agora en seriu. Hai quien diz que'l día de la muyer trabayadora ye'l 1 de mayu. Ye complicao. Lo que nun se pue negar ye que esti día ta convirtiéndose d'añu n'añu nuna historia cada vez más despolitizada, decorativa y sinsustancia (cosa de la que tampoco se llibra'l Primeru de mayu, por ciertu). Yo dende equí invítovos a toos y a toes a celebrar esti día dexando fuera lo que vien darréu:

Análisis desfasaos que nun entiendan la lliberación de xéneru como cosa de los dos sexos

Demagoxa institucional

Simplificaciones interclasistes

Palabros como "hembrista" o "feminazi"

Los australopitecus que les acuñaron

Mamonaes moxigates

Alderiques oligofrénicos sobre l'usu de la palabra miembru.

Así qu'así, yo lo que más celebro ye l'nacimientu de la muyer más importante del mio mundiu, y la más trabayadora: mio ma.

Remanecer

2009-03-06T19:17:00.014+02:00

Unos coríos nalen nuna llamarga, pesie a la inverná. La foto vese mal porque ta sacada dende mui lloñe, pa nun perturbar l'estáu natural de la escena.

Los coríos nun podíen imaxinar lo que-yos esperaba... que namái unos instantes dempués diba apaecer n'escena el so mayor enemigu y depredador...

... Ninoninoninonino.... (música de Tiburón)

... Ñi Ñi Ñi Ñi... (música de Psicosis)

... Ninono ninoninono ninoninoniiiii... (la danza l'osu)

Bah, yá sabía que nun engañaba a naide. La foto ta fecha dende mio casa, nel cascu urbanu de Mieres (cerca d'esa franxa conocida como La Mayacina, tierra de naide durante más de venti años)

Per onde va la carretera pasaba'l tren, y al llau un regatu que tengo visto baxar negru, marrón (en díes como güei), verde (por mor de les algues que salen pol escesu de fósforu nel agua procedente del consumu humanu) y a lo cabero irrealmente claru. Cuando yera neña xugábemos en medio la cai y cuando pasaba un coche apartábemonos; y tirábemos la pelota contra la muria de Maestría poniendo cuidao pa nun pega-y a nengún coche aparcáu (eso güei diba ser un milagru, como podéis ver)...

En fin, toi poniéndome señardosa y nun diben per ehí los tiros. Lo que m'impactó al mirar pela ventana foi'l poder rexenerador de la naturaleza. A lo llargo del sieglu XX, camiento que seya Mieres la villa asturiana que más cambios esperimentara, dende la so configuración llinial de los barrios históricos (de los que poco queda en La Villa y cásique nada n'Oñón) al cogollu urbanu de güei, el doble d'anchu que va 150 años. El ríu vendió'l so poderíu por una cara llimpia; y tardaron en paga-y. Yá nun pue amenazar con llevar lo meyor de Mieres. Surdió el colexu Prau Llerón y quedó la cai La Vega, anque los nuevos nun sabrán por qué (a lo meyor nin siquiera saben por qué sos pas la llamen cai El Viciu). Pero'l llerón nun se conforma y nun lu van quitar de conocer el sieglu XIX. Ehí ta, hasta que llegue'l formigón.

Dicen que pa la parte Chernobil los osos y los llobos caciplen a los sos deleres ente los edificios destartalaos, llibres de l'amenaza humana. Equí tengo mieo que marchemos de vacaciones y los atopemos d'okupes en casa.

Dudes que m'asaltaron lleendo "Los homes que nun queríen a les muyeres"

2009-02-23T19:45:00.004+02:00

¿Por qué hai xente que cree que gastar un ordenador Apple ye un rasgu de carácter, del que, amás, hai que tar orgullosu? ¡Mackeros, frikis!
(o ¿cuánto-y pagó Steve Jobbs pola publicidá subliminal?)
El mocín de la historia ¿nun debería tener dalgún defectu pa que nos lu creamos un poco? Nun sé, tirar dalgún peu de vez en cuando, por exemplu. Colos de la mocina bien que s'esplaya.
Dame la sensación de que los suecos "se quieren muncho" muncho más que los hispanofalantes ¿nun conoz el traductor les espresiones "téngote apreciu", "caesme bien" y otres pol estilu, que nun faen pensar que'l que les diz ye inocente perdíu?
¿Por qué nun dexaron el títulu literal que ye "Los homes qu'odiaben a les muyeres"? A mi paezme que queda claro que los homes que nos ocupen facíen dalgo más que "nun querer" a les muyeres...
(Hasta la páxina 200) Qué aburríos son los suecos
(De la páxina 200 p'alantre) Qué retorcíos son los suecos
¿Cómo se les apañó Larsson pa que l'editor nun tirare'l tochu a la basura nes 200 primeres páxines?
¿Tan importante ye en Suecia'l fechu de tomar un café qu'hai que señalalo cada vez que los personaxes lo faen (cuidáu, y tamién si ye con lleche o solo)? ¿En cuántes páxines quedaría la novela si quiten toles veces que'l protagonista va al Konsum (Alimerka suecu)?
¿Será verdá eso de qu'en Suecia hai periodismu fechu pa seres adultos y racionales?

Cursu prácticu d'asturianu: Llección 34

2009-02-19T23:55:00.002+02:00

L'Antroxu ye una época perbona pa practicar el neutro de materia:

- Ponme un metru de tela negro.
-¿De cuálo? ¿De lo de carnaval?
-Paezme mui ruino. Dámelo d'eso otro.

Amor normalizáu (o "Normalización pastelera")

2009-02-12T11:59:00.004+02:00

P'aquellos que crean nes fiestes inventaes pol capitalismu pa reactivar el consumu dempués de la cuesta de xineru /mou cinicu off.

Visto na bombonería Flor de Cacao, C/Manuel Llaneza 13, Mieres del Camín.

La fiebre los autobuses

2009-02-02T22:26:00.008+02:00

Vese que ta de moda esto de los mensaxes nos buses. Andando pela rede atopé unos cuantos modelos de próxima apaición nes calles de les villes asturianes:

Esti ye l'encargáu pola FSA (mui previsible):

Esti otru fináncialu la federación asturiana de güelos y güeles:

L'asamblea de muyeres insatisfeches tien previsto sacar esti otru pa mayo:

P'avientu del añu que vien, l'asociación d'hermanos mayores yá tien encargáu esti otru:

Y al final, como en too, siempre apaecen los típicos oportunistes:

Bah, paez que nun toi mui inspirada. A ver vosotros.

Una rapacina de 26 años

2008-12-01T23:49:00.002+02:00

Atención: escribo esta entrada cola sola intención d'aforrar en psicoanalista. Interés pa l'audiencia xeneral: baxu tirando a nulu.

Esta última temporada vengo faciendo coses que, miraes en conxuntu y con perspectiva, paez que nun tienen otru fin qu'asemeyame a la que yera yo va diez años (ai, si valiera tamién pa poder meteme nos vaqueros que gastaba daquella, o naquel petu de pana...). Atópome a mi mesma escuchando la música que me prestaba y descubro que me sigue prestando. Vuelvo a dexar el pelo llargo. Entamo coses que me recuerden a los enfotos que podía tener entós. Hasta'l tranlará paez que vuelve a ser como naquel tiempu (más información). Solo me falta volver a ser virxe (yá que tampoco faigo lo contrario, por desgracia).

¿Qué quier dicir esto? ¿Que nun toi a gusto colo que fice na cabera década? Nun me paez. Quiero creer que lo que me pasa ye que nesta época de transiciones que toi pasando quiero recuperar aquella ilusión, aquella gana de facer coses, de viaxar, deprender, conocer xente y pasalo bien que tenía (anque a veces me quedara en casa estudiando tamién, eh, que tampoco yera Amy Winehouse). Y que si me viera aquella me reconociera orguyosa como la so personalidá adulta (con más arte pa la vida y perres).

Y si con dieciséis años colé pa París yo sola dos selmanes, ¿qué se pue poner per delantre agora?

La pantorilla ye lo que me gusta...

2008-11-30T03:37:00.003+02:00

Ladies and gentlemen, equí tenemos al nuevu aspirante a sucesor de Freddie Mercury: Mika.

Nun conocía a esti rapaz, pero esti cantar púsome sobre la pista (toi fartuca escuchalu na radio porque lu ponen muncho en RNE como cortinilla nel programa de la fin de selmana).

Sonábame un poco a Queen (como Lazing on a Sunday Afternoon), pero con un aquél dalgo más modernu. Google sacóme de la duda.

L'afán de asemeyalu a Mercury ye atrevíu, polo grande d'unu y lo novatu del otru d'un llau; del otru, ta claro que nun-y falten intereses comerciales sospechosos a la calificación. Pero anque les comparances son odioses, nesti casu son cásique inevitables: orixe mediooriental (Mika libanés, Freddy iraní), traces andróxines, rangu vocal ablucante (cerca de cuatro octaves en entrambos casos) y común almiración poles muyeres que tienen onde garrar.

Compárese;

Y

Préstenme enforma los dos cantares, pero sobremanera'l segundu, llevanta la moral que da gustu.

Yo serví al rei d'Inglaterra (Jirí Menzel, República Checa, 2006)

2008-11-18T00:44:00.003+02:00

O por qué a los probes nunca-yos valdrá de nada combayar colos ricos y poderosos.

Equí ta'l protagonista, que se les apaña pa caer bien al públicu (polo menos a mi) pesie a ser un peseteru desclasáu y trepa ensin chapeta nenguna. De toes maneres, la película ufierta un espectáculu visual magníficu y una puesta n'escena áxil y simpática.

Manual pa entender a la xente ( y a ti mesmu)

2008-11-14T20:40:00.007+02:00

Una de les coses que más me presta de saber inglés ye navegar pela rede ente conteníos que d'otra manera son inaccesibles. Una de les coses que más me presten de falar asturianu ye poder avera-yles a otres persones.

El testu que vien darréu ta sacáu d'un blogue n'inglés que suel falar sobre cómo ser más eficiente nel trabayu y na vida en xeneral (filosofía GTD, get things done, por si vos interesa saber más). L'autor ye Scott Young, un americanu mui mozu qu'aspira a vivir del blogue; cosa por ciertu que pa mi, qu'escribo estes palabruques nuna llingua que malpenes esiste y pa quien tener venti visites diaries yá me paez "tener audiencia" quédame a años lluz y faime decatame de lo humilde (que non menos digno) de los mios "llogros".

En fin, al granu. Decídome a publicar esti artículu porque últimamente una persona que m'importa muncho ta pasando una racha regular no que cinca a relaciones humanes, y dempués de falar con él volví a topar esti testu, que me paez bastante afayadizu. Pero nun sólo ye pa él, paezme que pue ser de provechu pa munchos de nosotros, qu'en xeneral nun andamos mui sobraos de psicoloxía. Tampoco esperéis una panacea: en realidá ye un testu bastante básicu, nada científicu y tampoco cuenta nada de lo que una persona observadora nun se pudiera decatar, pero viéndolo asina espuesto d'esti mou, desgüesao en puntos clave (la manera de redactar que más casa cola filosofía esa GTD, que tolo manda partir en cachinos pa poder avanzar pasu ente pasu), resulta bastante esclarecedor. Perdonái polo chambono de la escritura: la traducción ye d'urxencia y en munchos casos la redacción orixinal tampoco ye pa tirar voladores.

Ehí va, espero que vos seya d'ayuda y vos ayude a meyorar les vuestres relaciones personales (y especialmente a ti, queríu Barón Samedi):

7 regles crítiques pa entender a la xente

Regla Un: Nun culpes a la malicia de lo que pue esplicase fácilmente col egoísmu.
A la xente nun-y da más por ti. Nun ye porque sean malos o dañinos, sinón simplemente porque tan mayormente centraos n’ellos mesmos. Considerando esti gráficu hipotéticu qu’amuesa la variedá de pensamientos que una persona normal tien:

Nesti exemplu, el 60% de los pensamientos van dirixíos a ún mesmu. Los mios enfotos. Los mios problemes. Los mios sentimientos. Otru 30% empobínense a les relaciones, pero na midida que-y afecten a ún. ¿Qué pensará María de mi? ¿Cómo me pondrá el xefe nel informe? ¿Quiérenme los mios amigos o pensarán que soi un cafiante?
Namái un 10% del tiempu nesti modelu s’emplega na empatía. La empatía ye un socesu raru nel que una persona siente de veres les emociones, los problemas y la perspectiva d¡otra persona. En vez de entregase qué piensa María de mi, entrúgome en qué piensa María.
Dientro d’esi 10% del tiempu, la mayoría de la xente divide la so atención entre munches de les persones que conocen. Poro, tu ocuparíes namás un cachín d’esi porcentaxe na mente de les más de les persones y sólo un par de puntos porcentuales nuna relación profunda. Incluso si la otra persona piensa en ti, pensará en cómo la relación-y afecta, non en ti.
¿Qué quier decir esto?
La vergoña nun tien munchu sentíu. Teniendo en cuenta que los demás namái dediquen un cachín pequeñu de los sos pensamientos a xulgate, el xuiciu que t’autoimpones ye descomanadamente mayor
La xente que paez ser malo o dañino nun lo fai intencionadamente. Hai excepciones, pero generalmente el dañu que sientes ye un efeutu secundariu, nun la causa principal.
Ye trabayu tuyu mantener les relaciones. Nun esperes a que te vengan a invitar a fiestas o a que la xente se t’avere.

Regla Dos: Los comportamientos en sociedá nun suelen ser esplícitos
Esto quier dicir básicamente que les más de les intenciones que tan detrás de los nuestros actos tan tapecíes. Si una persona ta deprimida o enfadada, polo xeneral el comportamientu que tien nun diz colos sos sentimientos.
El vieyu cuentu ye que les muyeres dicen “sí”, “val” y “failo” cuando piensen lo contrario. Pero téngome decatao de que los paisanos faen esto tamién en situaciones onde nun hai confianza, anque non siempre nel mismu sen.
La aplicación d’esta regla ye que ye necesario centrase na empatía, non solo escuchar a la xente. Demuestra confianza, afita una complicidá y aprende a calicatiar a les persones un poco. Centrándonos na empatía normalmente puen rompese estes alteraciones y dir al noyu de la cuestión más rápido.
La otra aplicación d’esta regla ye que lo más del tiempu, cuando te pasa dalgo, naide más lo sabe. Asina que nun t’enfades si la xente nun se decata o reacciona. Si contradices a los tos pensamientos coles tos acciones, nun t’enfades si la xente se tracamundia.

Regla Tres: El comportamientu ta dictáu mayormente pol “altruismu egoísta”.
Dicir que tol mundiu ye egoista ye una esaxeración qu’ignora tolos actos de bondá, sacrificiu y amor que faen que’l mundiu furrule. Pero yo diría que muncho (non too, pero muncho) del comportamientu funciona en base a los principios del altruismu egoísta.
Col altruismu egoísta ye too ganancia. Son les situaciones nes que ayudate a ti me beneficia directa o indirectamente. Hai unes cuantes situaciones onde esto se da:
1. Transacciones – Si merco un coche, tanto yo como’l vendedor nos beneficiamos. Yo gano un coche, que ye lo que quiero. El vendedor gana perres pa meyorar la so vida. Esti ye la forma mayoritaria de altruismu egoísta ente xente que nun tien llazos emocionales.
2. Familiar – El sangre ye más gordo que l’agua. Tamos diseñaos pa proteger a la xente que comparte los nuestros xenes. Esto a veces pue treslladase a amigos y seres queríos estremadamente cercanos.
3. Estatus – Ayudar a dalguién ye un signu de poder. Munches especies de primates ofrecen ayuda como signu de dominancia. La xente actúa de mou asemeyáu, ufiertando ayuda pa facer espoxigar la so autoestima y reputación.
4. Reciprocidá Implícita – Munches relaciones tan basaes na idea de que si yo t’ayudo, dalgun día tu tendrás qu’ayudame tamién.
Dacuando los comportamientos sálense d’estos grupos. Hai héroes anónimos que muerren por causes que nun tienen que ver cola so familia, etc. Pero esto ye una minoría. En cambiu, les más de les acciones puen esplicase por una forma o otra d’altruismu egoísta.
¿Cómo aplicamos esta regla? Pues con ella pues entender los motivos de la xente y apelar a ellos como si fueren pal so bien. Encuentra maneres d’ayudar a la xente dientro d’estes cuatro categoríes. Nun esperes que la xente t’ufierte ayuda más alló del egoísmu altruista, nun ye imposible, pero ye poco probable.

Regla Cuatro: La xente tien poca memoria
Otra regla del comportamientu humanu ye que la xente tien problemas pa recordar les coses, especialmente (ver regla un) lo que nun tien que ver con ellos. Ye más probable que la xente recuerde aquello que tenéis en común que les vuestres diferencies (nun siendo que-yos interese especialmente).
La xente ye olvidadizo por naturaleza asina que nun-ylo atribuyas a la maldá o al desinterés si s’escaecen de dalgo. La otra cara ye que tu pues demostrar que yes de fiar si tú si recuerdes les coses.

Regla cinco: Tol mundu ye sentíu
Esto pue ser una esaxeración, pero’l fondu de la cuestión ye que la xente suel tener sentimientos más fuertes de lo qu’amuesen. Esto ye porque la mayor parte de les cultures desaprueben los estallíos d’enfadu, depresión o entusiasmu, especialmente nos homes.
La aplicación d’esta regla ye que nun supongas que too-y va bien a dalguién simplemente porque nun tenga un ataque de nervios. Toos tenemos los nuestros problemes, les nuestres ansiedaes y disgustos que contenemos. Nun ye necesario que-y saques a la xente los sos asuntos privaos, pero siendo sensible a eses corrientes subterránees date una ventaxa pa intentar ayudalos.
Otra aplicación amestada d’esta regla ye asemeyada a la regla dos. La xente polo xeneral asume que tas bien nun siendo que te vean dándolo a voces.

Regla seis: La xente siéntese solo
Esta ye otra xeneralización polo alto, pero ye ablucante cuánta xente que paez que lo tien too sufre momentos de soledá. Como animales sociales, creo que la xente ye especialmente sensible a que la escluyan. Nos tiempos de les cavernes, la exclusión significaba la muerte, asina que la soledá y el deséu de tar con otra xente ye mui fuerte.
La aplicación d’esta regla ye que la soledá ye bastante común, asina que nesi sentíu nun tas solu. [N.T. Camiento que nesti puntu l'autor quier dicir que'l sentise solu y lluchar contra eso ye un instintu común a la especie y poro parte de la condición humana, y non "mal de munchos, consuelu de tontos"].

Regla siete : ¿Dixi yá que la xente ta volcao en sí mesmo?
Esto pue sonar como una repetición de la regla un, pero creo que les aplicación van más p’allá de les relaciones y estaos emocionales. El fechu de que la xente tiende a tar demasiao preocupao por ellos mesmos como pa facete munchu casu, que la xente tiende a ser más sentío, a sentise más solo y a actuar distinto de lo que siente tien qu’aplicase a como ves el mundu.
En tou casu esta perspectiva debería facete más independiente y proactivu/a. Poniendo la to felicidá individual nes manes d’otra persona o persones, tas ignorando estes regles y lo faes pal to mal.
A mí préstame ser optimista, ensin dexar de ser realista, cola xente. Polo xeneral tol mundiu fai lo que pue, pero equivóquense y sufren ensin querer por mor de tar somorguiaos nellos mesmos. N’otres pallabres, son básicamente como tu.

El francés, llingua minorizada

2008-11-10T23:51:00.004+02:00

Esti poema quedóme na alcordanza dende los mios tiempos na escuela d'idiomes (hai seis o siete años) pola empatía que llevantó en mi. Tradúzolu (les partes en francés) como buenamente pueo.

I will not speak French on the school grounds.
I will not speak French on the school grounds.
I will not speak French...
I will not speak French...
I will not speak French... A! Nun son tontos, estos castrones.
Depués de mille veces, entama a trescalar
Nel espíritu que seya.
Manca, da vergoña.
Y on ne speak pas French on the school grounds
Y nin anywhere else tampoco.
Enxamás colos estraños.
Nunca se sabe quien tien l'autoridá
De ponete escribir eses bendites llinies
A la edá que seya.
Sobre too non colos neños.
Ellos nun tienes por qué pasar el tiempu del recréu
Escribiendo eses bendites llinies.

I will not speak French on the school grounds.
I will not speak French on the school grounds.

Nun tienen qu'escribir eso
Porque nun tienen por qué falar francés pa nada.
Eso amuesa que nun somos más que Cadiens.
Don't mind us, we're just poor coonasses,
De clase baxa, hai que lo esconder.
Hai que lo superar.
Hai que falar inglés
Como bonos americanos.
Why not just go ahead and learn English.
Don't fight it, it's much easier anyway.
No bilingual bills, no bilingual publicity.
No danger of internal frontiers.
Deprendéi-yos inglés a los neños.
Ponéi-yoslo tol tiempu,
Tol tiempu hasta nes discoteques,
Hasta'l Million Dollar Man.
Ye qu'en realidá nun fai falta falar francés pa nada.
Esto ye Estaos Xuníos,
Land of the Free.
Siempre vamos ser poor coonasses y namái.

I will not speak French on the school grounds.
I will not speak French on the school grounds.

Coonass, non, non, nun ofiende.
Ye un nomatu namái.
Nun significa nada.
Ye broma, nun ofiende.
Préstanos, ye cute.
Nun nos enfoscamos.
Danos la risa,
Pero cuando hai que rir, ¿en qué llingua rimos?
Y pa llorar, ¿en qué llingua lloramos?
¿Y pa berrar?
¿Y pa cantar?
¿Y pa querer?
¿Y pa vivir?

Paez mentira qu'una llingua, como'l francés, falada en tol mundiu por millones de persones, respaldada por una consideración de llingua d'alta cultura a un nivel que mui poques llingües algamen, fuere perseguida al tiempu qu'impuesta n'otros llugares. Y nun me refiero solo a les colonies franceses: mientres a estos guah.es-yos cutíen en culo por decir "oui" otros millones d'americaninos lluchaben coles conxugaciones.

Nun sé cuantos falantes de francés habrá nos Estaos Xuníos (que por ciertu nun tán solo en Louisiana, tamién los hai en Maine, igualmente reprimíos). Comentaben n'un foru que l'huracán Katrina nun sólo traxo la muerte y destrucción material: tamién la de la llingua, porque la mayor parte de los francófonos vivíen na costa del Golfu de México y los que nun callaron pa siempre foron treslladaos, colo que quedaron ensin el so ambiente propiciu pa falalo.

Estos ellí siguen. Ellos alcuérdense d'Obama, nun sé si él s'alcordará d'ellos (little chance of change in linguistic policies, I presume).

Música: Zydeco, son tradicional de Louisiana onde la curdión ye la protagonista.

Últimamente

2008-11-10T03:03:00.003+02:00

Hai años yá qu'esti home nun ye santu de mio devoción, pero esti cantar siempre me prestó y amás da xustamente en clavu de cómo me siento estos díes...

... menos poles muyeres comprometíes.

Quiero la lluna, non la nueche y menos esta nueche.

Apúntate a la llista

2008-10-28T23:36:00.003+02:00

Hala, yá ta, ya-y dixe a l'Alministración que me pue llamar pa dar clase d'asturianu en Secundaria cuando-y venga en gana, que voi; anque previsiblemente nun seya hasta dempués de les próximes oposiciones y pa entós espero yá llevar tiempu dando clase de la llingua de Shakespeare (el mio oficiu seriu).

Ye parajódico (d'estes paradoxes que joden) que los filólogos especialistes en llingua asturiana llevemos tres años comiendo los mocos, ensin topar sitiu en nengún llau, y agora venga too darréu: llista d'interinos y places en servicios municipales de normalización perdayuri (tres en tres meses y dalgunes más por llegar, hopefully).

En fin, becaria fui, personal llaboral soi y pasín a pasín llegaré a ser interina nesta carrera hacia'l cume de la pirámide evolutiva que ye'l funcionariáu, como dixo Milio Rodríguez Cueto.

Y pa quien nun s'enterare tovía hai de plazu hasta la selmana que vien.

Garage (Irlanda, Lenny Abrahamson, 2007)

2008-10-28T15:31:00.006+02:00

La historia d'un paisanón inocente como un perrín recién nacíu nesti mundiu fíuputa y malpensáu. Ta ambientada na Irlanda rural, pero bien podría ser en Candamu o Piloña.

Vuelve'l ciclu de Caxastur, coles sos pelis "rares" y "de lleer".

Si ye que cuando nos ponemos, somos mundiales

2008-10-24T12:55:00.003+02:00

Camiento que vos llegaría a vosotros tamién, y a media Asturies. Dende'l martes lleven llegándome correos electrónicos con non menos d'ocho ringleres de destinatarios y un mensaxe: Vota por Asturies pa Capital Europea de la Cultura 2016. Y oye, dixo y fecho, en tres díes 60000 votos y encabezando la encuesta. ¡Uuueueueue! ¡Puxa Asturies!

Y digo yo:

¿Qué ye ser Capital Europea de la Cultura? Sonar suena de puta madre, pero ¿cuántos de los que votaron tienen idea de lo que ye, pa lo que val y lo que pue costar (y quién lo paga)?
Hai que reconocer que ye almirable la capacidá de convocatoria que tuvo la iniciativa esta. Claro qu' axunta delles carauterísitiques que la faen irresistible: ye gratis, danos oportunidá de prauticar esi grandonismu faltusu que tantu presta per equí (véase'l foru de la páxina onde se vota) y amás vien revestida con esa palabra máxica de cultura, cultura, cultura... La cultura ye bueno ¿non?

Yo tengo que reconocer que voté por inercia, foi abrir el corréu, calcar nel link et voilà, a votar por Asturies, ensin echar más tres d'ello. En fin, nun dexo d'alcordame de la lletanía semi-pagana que me cruzaba la mente esti branu cuando fui a la Espo de Zaragoza: "Santina de Cuadonga, nun quieras nunca que s'entame una d'estes n'Asturies, p'autobombu de políticos y choricéu a gran escala yá nos val colo que tenemos".

Arriba, paria de la tierra (sí, tu, a ti te digo)

2008-10-15T17:27:00.004+02:00

Güei ye'l Día de l'Aición Bloguera. Supónse que ye pa que tolos blogs que quieran falen del mesmu tema dende'l puntu de vista acostumáu nél. El tema d'esti añu ye la probeza, asina que si un blog fala normalmente de, por exemplu, moda, lo suyo yera que l'autor atopare la manera de amestar los dos temes, por exemplu analizando la esplotación de la industria de la moda nel tercer mundiu, o por qué la moda pue xenerar riqueza o por qué los probes tienen mal gustu vistiendo polo xeneral. Dalgo d'eso.

Nun acabo de comulgar del too con esti asuntu, de mano paezme una bona idea que podría asoleyar idees interesantes, pero mieu me da en que la mayor parte de la xente quede en publicar una entrada diciendo "ai, qué penina, los probes, habría que facer dalgo, bueno, yá amosé la mio solidaridá, hasta l'añu que vien". La verdá confieso que tovía nun vi nenguna entrada de nengún blogue participante nesti asuntu, pero paez que nun abunden nin n'asturianu nin en castellán. De momentu paez que la idea entusiasmó a los blogueros oficiales del PSOE y nun sé por qué me da que les conclusiones a les que llegarán serán les de unes llinies más p'arriba (tengo poques esperances na orixinalidá de los políticos, qué se va facer).

En fin, el casu ye qu'esti blog titúlase "Coses que (me) pasen" o seya, coses que pasen nel mundiu o que me pasen a mi personalmente, y como lo que pasa nesti mundiu globalizáu cola probeza ye de sobres conocío y muncha xente lo podrá esplicar meyor que yo, güei voi escribir namás de la mio relación personal con ella. O seya, la vuestra y la de muncha xente, cásique seguro.

Alcuérdome d'una frase d'un cantar de Bon Jovi (toos fuimos adolescentes) que dicía "we're two paychecks away from living out on the streets". Y quien non. A dos nómines de la cai. Ye una cosa que tengo mui presente. Munchos de nosotros saltamos con rede, pola familia que tenemos. Pero si imaxino por un momentu que mio pa y mio ma muerren o me dan de llau (nun quiera Dios o Mandinga que pase nenguna de les dos coses), ¿cómo me diba dir solo col mio sueldu quasi-mileurista? ¿Y si quedara ensin trabayu, yo que teo cotizáu l'estraordinariu periodu de 89 días en tola mio vida llaboral (a tiempu parcial, ¿eh?, que yo probe sí pero vaga non)? Eso nun ye vivir bien. Eso nun ye ser clase media. Nun nos engañemos. Soi tan probe como lo yera mio güelu, anque yo cague a sotechu y non detrás de la pitera y m'entretenga tecleando esto en vez d'una curdión.

Humor negro sotana

2008-10-07T18:14:00.003+02:00

Hai unos doscientos ochenta años, un cura anglicanu publicó un panfletu que dicía que p'acabar cola miseria n'Irlanda lo meyor yera que los ricos comieren a los neños probes, cola ventaya amestada de reducir la población católica del país. ¡Negociu reúndu pa los ingleses!.

Esti día, otru cura anglicanu publicó nel so blog que los gais teníen que tatuase en culo una alvertencia como la de les caxes de tabaco que dixere que la sodomía pue matar. El reverendu alega que'l testu yera namás una actualización de la tradición satírica inglesa.

Pue que sea verdá, pero paezme que lo orixinal tenía más gracia.

Crónica d'una movilización inesperada

2008-10-06T03:06:00.007+02:00

Non fíos, non, esto nun va ser un artículu sobre la manifestación del sábadu. Camiento que otros la fadrán, pero a mi nun me dan ganes, aparte de que'l títulu sedría una trafulla porque aquello foi de too menos inesperao.

Por primer vez, creo, voi da-y al mio blog esi aquel de periodismu ciudadanu que se-yos supón a estos bichos. Esto de lo que voi falar presenciélo yo al día siguiente, nel Festival de l'Ablana de Piloña. Fuera con unos collacios que se lo curren como pocos, pañando les ablanes, y faciendo por participar d'un mou de vida cada vez más difícil, sobre too porque en pocos llaos se pue yá vender nada de lo que da la tierra ensin que te desixan tres o cuatro carnés y dar cuentes al rei. Sicasí, nesti festival tovía pue dir ún a ufiertar con dignidá pero humildemente lo que te produz el llegáu de to güelu. El casu ye que too marchaba según lo previsto: mercáu, puestos d'ablanes, pasucáis de la banda gaites y la banda municipal y demás. Estrañábanos la bultable presencia de distintos representantes de los cuerpos y fuerces de seguridá, sobre too cuando la mio collacia escuchó a dos d'ellos comentar: "¿Qué fai menganito per equí?" "Ná, ta de secreta. Hai unos cuantos per equí". L'españíu vieno poco dempués .

Un tremendu estruendu de megáfonos y xiblatos amató l'intentu de proceder a la entrega de premios del certame. Na picota, la conseyera de Mediu Rural (mui conocida y apreciada por tracamundiar Nava con Navia nel Festival de la Sidra d'una de les mentaes localidaes) y la so xestión de la crisis de la llingua azul. La Migoya y l'Alcalde, cola sorrisa xelada na cara, ella tratando de facese la Hillary Clinton, faciendo que saludaba a conocíos dende l'escenariu. Dicía la mio collacia: "Míralos ehí, acostumbraos a que los aplaudan, nun saben qué cara poner". Nes pancartes lleíase: "La mosquita de Belén pica muy bien. Firmado: laboratorios farmacéuticos" y tamién...

Y munches más. El mio collaciu garró el cartelu de los precios de les ablanes, dio-y la vuelta a la cartulina y collaboró cola causa

Ehí quedó la cosa. Nun sé si la veréis nos periódicos, pero esistió. Que la xente yá ta farto d'aguantar. Que nun se creen los cuentos que-yos cuenten. Que queremos vivir equí, comer de la tierra y si cada vez nos lo ponen más difícil nun faltará quien, polo menos, -yos amargue la fiesta. Y esa xente, aparte de llingua azul, son los que más saben de llingua asturiana. Nun lo olvidemos.

Bat the situeision cheins

2008-10-03T14:39:00.002+02:00

(Como dixera Fidel Castro)

Nun me diera cuenta, pero dende qu'entamó el blog hasta güei (un añu, cinco meses y cuarenta y picu entraes más tarde) nun camudara el mio perfil (lo que sal ehí a la derecha embaxo del títulu "Hola"). Y nun ye que nun seya una ciudadana desocupada y ocurrente, teniendo en cuenta que trabayo 17 hores y media a la selmana, pero de repente nun me siento identificada con esos axetivos.

Five aces and four cats

2008-10-01T14:27:00.003+02:00

¡Tremendu conciertu ayeri nel Savoy! Una pena que nun fuere apenes xente. Llegamos p'allá a les 21:15, un cuartu d'hora enantes de l'apertura de puertes y ni Ruto había. Nosotres toes estrañaes porque nun había entraes anticipaes, había que comprales ehí nel momentu y hubo un pequeñu momentu de pánicu hasta que nos percatemos de la presencia de flequillos nel chigre d'enfrente...
Resulta qu'ellos mesmos se ficieron de rogar porque había que ver a los Glasgow Celtic... ( de repente lo de apertura de puertes 21:30 - conciertu 22:30 cobró sentíu). Ehí nos tuvieron viendo vidios de The Beat y la so bella estética en technicolor, yo arrepintiéndome un poco de haber decidío dir nun día d'entre selmana, garrando el coche pa dir a Xixón y pa detrás convenciendo a una amiga pa pagar doce charlies pa sacudinos la depre a ritmu de twist. Pero, ai amigo, eso duró hasta que salieron p'allá los rapazos estos, toos traxeaos que si los ve una paisana pela cai diría "estos van de boda o a vender seguros" y col tipín spaghetti de los mod que se precien (l'únicu mod gordu del que se tien noticia foi Miqui Puig nos sos años mozos). Y a dalo too con clasicazos como Wooly bully, The hippy hippy shake, Money (that's what I want) y otros cantares que o nun conocí (porque nun soi tan esperta) o yeren d'ellos (solíen dicilo cuando tocaben una propia, cola ilusión de que-yos compráremos el discu), pa terminar con What I'd say (versión curtia). Mui célebres tamién los bailes supercool del cantante y el metru y mediu de pata que gastaba, madre del amor hermosu. Mirái p'acá qué articulaciones, por favor...

Hailos/les que...

2008-09-28T15:43:00.006+02:00

Hailos/les que pierden dalgo y lo más que se-yos ocurre facer ye sentase en suelu a dicir: "Joder, perdí tal cosa, yá nun la voi atopar, robáronmeles de xuru, fíos de puta". Hasta que a lo meyor tienen la suerte de que llega dalguién y diz, "Venga, ayúdote a buscalo".

Hailos/les que soluciones los problemes de los demás a cuenta de quedar como gilipollas ellos/es mesmos/es, anque los califiquen d' "almirables".

Yo pertenezo a una d'eses categoríes y nun me siento arguyosa. Adivinái a cuál.

Un cantar

2008-09-24T18:19:00.005+02:00

Xente corriente
(Pulp, Different Class, 1995)

Ella yera de Grecia, tenía sede de conocimientu

estudiaba escultura nel Saint Martin's College,
ellí foi onde m'echó'l güeyu.
Contóme que'l pá taba forráu
Yo dixe, "entós voi tomar un ron con cocacola".
Ella dixo "Val" y en cosa de 30 segundos dixo:
"Quiero vivir como la xente corriente,
quiero facer lo que faiga la xente corriente,
quiero echame con xente corriente,
quiero echame con xente corriente como tu"
¿Y qué podía facer yo? Dixi "veré lo que pueo facer"
Llevéla al supermercáu,
nun sé por qué, pero tenía qu'entamar en dalgún sitiu
asina qu'entamé ellí.
Dixi "fai como que nun tienes perres" .
Ella rióse y dixo "Ai, qué célebre yes"
Yo dixi "¿Sí, ho? Nun veo que naide más sorría"
¿De xuru que quies vivir como la xente corriente,
que quies ver lo que ve la xente corriente,
que quies echate con xente corriente,
que quies echate con xente corriente como yo?"
Pero ella nun atalantaba, namái ría y garróme la mano

Arrienda un pisu enriba una tienda,
corta'l pelo y busca un trabayu,
echa unos pitos y xuega al billar
fai como que nunca fueres a escuela.
Pero nin siquiera asina vas pillalo
porque cuando teas de nueche na cama,
viendo les cucaraches esguilar pela parede
si llames a papá él diba solucionalo.

Nunca vas vivir como la xente corriente
nunca vas facer lo que faiga la xente corriente,
nunca vas fracasar como la xente corriente,
nunca vas ver como to vida va a tomar vientos
y bailar, chumar y follar
porque nun hai más que facer.

Canta cola xente corriente
canta porque ye tolo más que pues facer
ríi cola xente corriente
ríi anque se tean riendo de ti
y de les babayaes que faes
porque crees que ser probe mola.

Un normalizador de doce años

2008-09-01T19:08:00.003+02:00

Esti domingu fuimos d'escursión a Redes cola Plataforma contra l'embalse de Caliao (mui recomendable: sitios perguapos, xente prestoso de toles edaes y depréndense un balagar de coses que nun salen na prensa).

Al marxe del tema ecolóxicu y lo bien que lo pasemos hubo una cosa, como dicen los anglofalantes, heartwarming. Nel grupu había unos cinco neñ@s y rapaz@s, quiciabes ente 14 y 9 años: cuatro de Xixón y Miguel, de La Pola Llaviana, y ente les sos conversaciones oyóse lo que vien darréu:

Neñu de Xixón: ¿Y cómo se dice pierna en asturiano?

Miguel: No, pierna, pero si dices les dos ye "piernes". ¿Tu nun vas a llingua nel cole?

Neñu de Xixón: No, porque los de llingua de mi cole pasan el día dibujando y no hacen nada. [El cáncer del asturianu. Facer de llingua la "María" de turnu. Nun preparar les clases adaptaes a los niveles y que dean lo mesmo los de tercero que los de sestu cursu: seronda-pinta la fueya de mariello, iviernu: -pinta los montes ñevaos, etc... ]

Pero les enseñances d'esti guah.e nun cayeron embaxo, porque cuando lleguemos a Orlé, de la que los mayores nos poníemos a echar unos culinos y los neños sacaben la baraxa, el rapacín de Xixón díxo-y: "¿Xuegues, neñu?"

A ver si deprendemos dalgo de Miguel.

Nun callo

2008-07-08T16:06:00.002+02:00

Anque sigo secuestrada pol procesu selectivu d'accesu al cuerpu de profesores de secundaria (especialidá 011 Inglés), hai coses que nun puen quedar ensin respuesta. Anímovos a facer lo mesmo.

http://www.elcomerciodigital.com/gijon/20080708/opinionarticulos/todos-casi-somos-felix-20080708.html

Como la vida mesma

2008-06-10T12:57:00.001+02:00

Por si vos aburrís ente esamen y esamen (los que tengan) o viendo el xunu de ñublu y orbayu que nos vien, equí vos dexo esti xueguín que consiste en dirixir la to propia empresa:

http://obrasocial.bancaja.es/emprendedores/juego-para-emprendedores/juego-para-emprendedores.aspx#

Ayeri tuvi entreteniéndome con él una media hora asina que voi aforravos el trabayu destripándovos los trucos pa ganar (l'oxetivu ye que'l vuesu negociu llegue al primer añu de vida):

-Poner les instalaciones de meyor calidá y el personal más cualificao.

-Poner el productu al mesmu o meyor preciu que la competencia

-Gastar lo que seya en mantenimientu, modernización ya I+D

-Ceder a les xustes reivindicaciones de los trabayadores en materia de seguridá y retribución

-Nun querer abarcar más producción de lo que se pue xestionar

/mou irónicu on/

Vamos, lo que sabe cualquier empresariu español.

Siempre'l mesmu cantar

2008-06-03T21:44:00.004+02:00

Si nun va'l vidiu calcái equí.

Orbayu

2008-05-31T18:51:00.002+02:00

¡Qué pocu tiempu fai falta pa escaecer les esencies! Alíviame saber que tovía se pue redescubrir lo evidente.

N'otru mundu, nel mesmu mundu

2008-05-28T22:51:00.011+02:00

Sigue la temporada cinéfila de Caxastur. ¡Cómo me presta esto de nun dar más clase particular y poder facer coses peles tardes si me da la gana, pesie a la reducción d'ingresos!

Güei tocó Buda españó de vergoña. Esta ye una peli que nos fai ver el mundiu dende un metru d'altura y unos güeyinos rasgaos embaxo d'un pañuelu. Baktay, una neña con una voluntá de fierro, decide un día que quier dir a la escuela "a deprender cuentos simpáticos", y colos sos cinco o seis años alcuentra la manera de arreblagar percima de los mil problemes qu'atopa, y d'escapar de los neños con kalashnikov fechos con palos que sólo saben xugar a matase y a maltratar a les neñes, neños que tan pronto son talibanes "entamándo-yos un nuevu Vietnam a los americanos" como americanos a la gueta terroristes: faen perbién los dos papeles.

La principal virtú de la película, fecha ciertamente por manes de primeriza, ye que te mete na historia y t'envuelve nesos paisaxes afganos d'ocre, ñeve y cielu azul y cares curtíes de tolos colores imaxinables, onde si nun fuere pol helicópteru podría pensase que tamos a primeros del sieglu XX; y te vuelve, por un momentu, tan inocente como la so heroína, que podría ser hermana de les protagonistes de Nin unu menos o El globu blancu.

En definitiva, ye una película de les que te faen querer siguir mirando al mundu.

Los males del primer mundu

2008-05-27T18:56:00.004+02:00

(Autopláxome del fotolog porque m'apetez actualizar equí tamién y nun doi pa tanto).

Dempués de "El declive del imperiu americanu" (que nun vi) y la maraviyosa "Les invasiones bárbares" llega "La edá de la inorancia" pa completar la triloxía de Denys Arcand sobre les miseries de la sociedá moderna nel marcu de la percivilizada y pseudoprogre Canadá francófona.

Esta peli tien más de comedia que "Les invasiones bárbares", que partía d'una premisa yá dramática como ye una enfermedá terminal, pero repasando l'argumentu llego a dubialo. Equí nárrense les desventures d'un funcionariu de servicios sociales atrapáu nun trabayu onde nun ve namás que desgracies y onde lu obliguen a facer cursinos de risoterapia y otres chorraes, con dos fíes adolescentes que nun miren pa el, una muyer que fala pel móvil 18 hores al día y la madre nuna residencia con alzheimer. Con esti panorama ¿cómo nun diba a tar tol día soñando con torturar a la xefa cual César a los cristianos, ganar el premiu lliterariu más importante de la francofonía, ser actor d'exitu o tener un harén formáu por una estrella del cine, una periodista, la compañeru de curro llesbiana y la propia xefa tocacoyones, too ello con eróticu resultáu? La verdá que les coses que-y pasen a Jean Marc Leblanc (l'home esti de los güeyos arremellaos) nun son pa reíse pero consigue que lo faigas y a carcaxada llimpia, asina que di-y a vela a Caxastur si podéis porque merez muncho la pena. A ver si consigo agora ver la primera de la serie.

Viaxe al pasáu

2008-05-20T23:20:00.002+02:00

Al igual que na entrada anterior, paez que m'escuerren los mios diecinueve años. Trastiando con disketes vieyos a la gueta d'unos apuntes de la carrera (sí, fíos, dalgunos apuntes pasélos a ordenador y too, soi asina d'empollona) apaeció esti microcuentu (circa 2001), que procedo a ofrecevos:

(Daquella escribía más en castellán)

LA ENVIDIA

-¡Vete a tomar por el culo, capullo!- dijo el hombre manco, lleno de ira, al desconocido al que acababa de tumbar con un gancho de derecha (el único posible en su situación, por otra parte). El otro le miraba dolorido y estupefacto: ni él ni las otras personas presentes en el bar podían imaginarse qué había enfurecido tanto al agresor de aquél hombre con el que ni siquiera había cruzado palabra, que se limitaba a rellenar tranquilamente una quiniela mientras tomaba un café. Tres días y cuatro peleas más tarde lo supieron: aquél hombre odiaba a los zurdos.

Economía de guerrilla

2008-05-11T22:44:00.003+02:00

Esto traime alcordances d'aquellos tiempos, allá una vezona, cuando nun tenía móvil y los amigos que lu teníen podíen contase colos deos d'una mano. Dempués llegó otra época, cuando cinco duros representaben un porcentaxe nada desdeñable del presupuestu selmanal. Naquella época, les páxines de mandar sms gratis suponíen un aforru y una comodidá considerables, ensin tener que da-y tanto al deu gordu... hasta que dexaron d'esistir o te mandaben dar hasta la talla les bragues pa rexistrate. Güei, nun sé si tendrá que ver cola crisis que s'avera, pero volví a atopar un directoriu de webs de sms de baldre y prestóme pola vida, uno pol aforru y otro porque una yá ta mayor p'andar dándo-y al pulgar como una rapacina. Asina que nada, a comunicase, que ye bono, sobre too cuando sal gratis.

Resurreición

2008-04-27T17:57:00.004+02:00

Día de resaca del Conciertu pola Oficialidá, que ye ún d'esos momentos del añu que podríen ser máxicos nun siendo porque ye la constatación anual de la parálisis que sufre la situación: reencuentros esperaos ya inesperaos, ánimu folixeru, sidra corriendo ensin tasa, música que va dende los himnos xeneracionales hasta lo que sirve de fondu pa les conversaciones, empanada de bonitu... A mi lo que más me presta ye, nos momentos más paraos, dar vueltes pel recintu observando tolo anterior y pasando llista mentalmente de quién me falta por besar, abrazar y pidir un breve resume de lo que-yos pasó caberamente. Porque pa mi hai mui pocos actos qu'axunten a tantu conocíu y amigu embaxo un mesmu techu (quiciabes podíemos pensar nos cursos d'Ibias) y la verdá ye que non tol mundiu tien ocasiones asina una vez al añu y por un preciu asequible, non como un casoriu, por poner un exemplu.
Bono, el casu ye que too perbién, xente a mamplén a pesar de valir 10 euros la entrada y tar el sitiu onde cristo perdió la madreña (asina toi de mayaína) y güei llevántome pa lleer esta noticia en periódicu. Y digo yo... ¿nun taremos subestimando la importancia d'esti fechu pa la supervivencia del asturianu en comparanza cola oficialidá?

La resaca dexóme la boca seca y esta noticia (conocida por demás, per otru llau) un sabor amargu.

Por ciertu, yo yá dende febreru que nun soi lleenda urbana y nun cuento volver a selo pronto. Lo que pasa ye qu'entré nuna época vaga y nun m'apeteció escribir nestos meses. Doi-yos les gracies a tolos que m'animaron a volver a facelo. ¡Hasta bien llueu!

¿La vida ye asina en Santander?

2007-12-08T18:09:00.000+02:00

Mañana voi convertime en lleenda urbana per dos selmanes. Seguiremos informando.

Serán burros (Anuncios de la tele I)

2007-12-06T00:55:00.000+02:00

El mio corazón de profe d'inglés volvió a quedar frayáu en mil cachinos al oyer l'anunciu de la cabera película de dibuxos: Donquei Xote, asina como suena. ¡La madre que los parió! ¿Qué-yos costaba dicir Donqui Xote, que tien más sentíu como xuegu de pallabres en castellán* y de pasu enseñábamos a los neños a pronunciar "pollín" na llingua de Shakespeare? ¿Cómo vamos salir de burros con estes xenialidaes? Dempués echaremos les manes a la cabeza porque l'informe PISA esi famosu diz que d'inglés beri güel fandango. ¡Si los medios de comunicación afiten qu'hai que pronunciar como un garrulu y que intentar dicir les coses n'otra llingua correutamente ye de pijos flipaos!

*Home, lo ideal pa mi, pa nun aculturar más de la cuenta, yera Donkey Jote (pronunciao Donqui Jote) , pero sé perbién que ye munchu pidir que cambien la portada pal mercáu hispánicu. pa que llueu la xente s'enchipe con aquello de la tercera llingua mundial y nun sé qué más. Tol mio respetu y amor pal castellán, pero ta demostrao qu'en términos de mercáu se caga pa ella cuadrao.

Anuncios en faroles I

2007-12-04T00:41:00.000+02:00

Se vende bicicleta extática
.

¿Qué fumará esa bicicleta?

Erja Lyytinen

2007-12-02T14:32:00.000+02:00

Esta muyer sabe facer falar a una guitarra y poner de pie a un auditoriu quitando'l polvu a una escoba. Yo cuando tenía quince años nun la conocía, pero quería ser como ella. Lo malo que tien ye te pue namorar al mozu.

La pasaera

2007-11-30T16:12:00.000+02:00

Pasaera: n'Ayer, herencia.

Una ayalga, una pasaera anónima. Eso foi lo qu'atopemos Vitor y yo na basura el domingu pasáu. Cuarenta y pico llibros en perfeutu estáu, conviviendo con caxes de cartón y bolses de plásticu con otros conteníos menos prestosos. Munches gracies, amante del Antiguu Exiptu, les noveles clásiques y la lliteratura escrita por muyeres. Nun sé por qué lo fadríes o si lo fadríen otros por ti, pero Vitor y yo (y el rapaz presuntamente yonki qu'atopó'l to regalu primero que nos) agradecémoslo muncho.

Faciendo balance

2007-11-26T22:45:00.000+02:00

Bono, pues al final el sábadu hubo... ... pack completu: marcha + manifestación (+ espicha colos collacios + folixa hasta les tantes + coxera persistente), pero por un cúmulu de casualidaes nun pude llegar a...

Consideré que yera necesario llavame pa presentame en sociedá y nun lleguemos a tiempu. Pa detrás, Xaime dexó'l movil en casa y anque sé que s'intentó comunicanos el cambiu de llocal nun hubo manera. Taré atenta a próximes convocatories, de les que espero que salgan coses interesantes y provechoses.

Sobre la marcha y la mani, colos elementos en contra como davezu, déxovos esti enllaz con unes reflexones qu'a mi abúltenme enforma interesantes (sobre too la segunda, la d'Andoscu). ¿Habría que camudar d'estratexa?

Prodesse et delectare

2007-11-22T15:19:00.000+02:00

¿Pienses que la economía española ye un puticiu? Pues nun sabes hasta qué puntu: http://www.burbuja.info/inmobiliaria/showthread.php?t=46239

Visto nel foru que más visito, un foru perinteresante onde se deprenden coses que nun salen nos medios de comunicación (de momentu, yá saldrán)

Reló, nun marques les hores

2007-11-21T13:39:00.000+02:00

Un reló paráu apota dos veces al día, mentanto qu'un reló que furrula da siempre una hora tolo cercana a la verdadera que se quiera, pero inexacta.

Una persona pue llevar un reló y creer saber qué hora ye, y otra llevar dos y tar permanentemente en dubia; pero la primer persona va tar más lloñe de saber qué hora ye realmente que la segunda.

(Visto en Escolar.net a propósitu de les condiciones epistemolóxiques de determinaos collaboradores d'El Mundo. Como siempre, al marxe de la calidá de lo qu'escribe Escolar, lo meyor del blog ta nos comentarios)

De llibros y calcetos (estrelles del mercáu dominical)

2007-11-18T17:32:00.000+02:00

Magar que faiga mil xuramentos anticonsumistes y pro-optimización de los recursos públicos, pasear pola plaza (como llamamos en Mieres al mercáu selmanal) un domingu soleyeru dempués d'una nueche prestosa en casa y nun llevar nenguna de les ayalgues que nos ufierta la pequeña burguesía romaní de les cuenques ye demasiao pa mi.

Voilà les alquisiciones: tres pares de calcetos de rayes, gordinos, pal fríu d'esta seronda (5 euros tres pares, venga aprovecharos) y tres llibros (a un euru caún). ¿Cómo me voi resistir si gasto más nun café que nun llibru?

El primer llibru ye Laura contra el tiempo, pa completar la bibilotece Milio Rodríguez Cueto, ún de los autores que más me presten n'asturianu y del que yá tengo casique tolos llibros. Ye una compra atípica porque ye una novela xuvenil y amás en castellán (anque yá vi yo que sorprendentemente tien frases n'asturianu nel interior). Caberamente dame por lleer dacuando noveles pa rapazos (nun tengo prexuicios). La lliteratura xuvenil tien una ventaya, que ye que tien claro que como se vaya por peteneres el llector oxetivu (o seya, el rapazu o rapaza) garra, azota'l llibru y ponse a xugar a play. L'escritor tien eso más en cuenta que'l llucise como lliteratu, que rescample la so gran cultura o que fale d'él la crítica, lo que ye d'agradecer.

El segundu llibru ye Home Truths, de David Lodge, un autor al que-y tengo ciertu ciñu porque ye'l qu'escribió la primer novela "de verdá", non adaptada, que lleí nesa llingua (Changing places ye llectura obligatoria en primeru de filoloxía inglesa n'Uviéu) y tien cierta responsabilidá en que m'entusiasmare por esa lliteratura. Ye otru de los que siempre presten, entra bien.

Del terceru nun sé muncho, cásique se pue dicir que lu compré porque nun se ven munchos en francés, ta mui bien calteníu y tien un títulu seductor pa una filóloga de pro: La grammaire est une chanson douce. A la estantería a esperar a que tenga vagar y ánimu pa garrar un llibru en francés (hai dellos nesa mesma situación).

Cualquier día tengo que salir yo de casa pa que los llibros tengan sitiu.

Una cita de Doris Lessing

2007-11-15T17:15:00.000+02:00

Siguiendo el conseyu del collaciu A teyavana, a falta d'una idea orixinal, voi meter güei una cita del llibru que toi lleendo El cuadernu doráu, de Doris Lessing. Un parrafu pa una tarde borrinosa de seronda. ¿Paezvos que completa la entrada anterior?

...[aquello] acabó en -diba dicir desastre. Esa pallabra ye ridícula. Porque lo penoso d'aquel tiempu ye que nada yera desastroso. Too taba mal, yera feo, desgraciao y teñío de cinismu, pero nun había nada tráxico, nun había momentos que pudieren cambiar nada o a naide. De ralo en ralo rellumaba un rescamplíu emocional qu'amosaba un paisaxe de tristura personal y dempués -siguíamos baillando.

¡Ta too pagao!

2007-11-14T22:35:00.000+02:00

Asturianía como pa una boda

Asturianía pa esbardiar

Asturianía pa parar un tren

Ensin comentarios

La lliteratura y yo (metáfora escatolóxica)

2007-11-09T14:48:00.000+02:00

Dempués de la sobredosis de lliteratura que fueron los cuatro díes de II Congresu Internacional de Lliteratura Asturiana tengo unes cuantes fueyes más escarabayaes na mio llibreta de dir a les conferencies, una comunicación al mio nome p'amestar al currículum y delles idees nueves más pa trabayar con elles en plan lliterario.

Yo siempre quise escribir y dalgunes veces, les menos, llogrélo. Siento la xestación d'un rellatu como cuando me pinta mal la comida: como una llagatesa nel estómagu que nun para de movese, mordigañando per equí, pegando coletazos ellí y allá. D'esto que sabes que lo meyor ye vomitalo too p'aposentar, anque nun tampoco nun t'apetez un pijo pasar pel trance. Entós, tienes dos salíes: of acer un esfuerzu y ponete a ello (asenoyase ente'l dios Roca y dexar que te suban los caldos hasta que vaya too fuera) o facer un esfuerzu y aneciar en pasar del tema, y quedar cola llagartesa dientro. Por dalguna razón yo faigo davezu lo segundo.

Fundamentos pa una nueva educación

2007-10-18T17:24:00.000+02:00

La cursiva ye cita del llibru de Neil Postman y Charles Weingartner La enseñanza como actividá crítica, del que ya tengo falao. Los comentarios en redonda son míos.

Declara una suspensión de cinco años nel usu del llibros de testu. El que quiera siguir siendo profesor dempués d'eso tendrá derechu a cobrar el doble

Fai que los profesores de llingua enseñen matemátiques, los de matemátiques arte, los de arte ciencies naturales, etc... Asina podríen entender lo que ye pa los alumnos enfrentase a una materia desconocida y dexar de pensar que tienen tola razón siempre.

Tresllada a tolos profesores de primaria a la secundaria y viceversa. Los adolescentes podrán disfrutar de métodos un poco más creativos y entreteníos y los profes d'institutu se darán cuenta de lo poco que sirve saber muncho d'un tema.

Desixe a tolos profesores que crean saber muncho de la so asignatura qu'escriban un llibru sobre ello. Que dexen de dar la brasa a los alumnos colo guays que son y lo que presta lo d'ellos.

Disuelve toles "asignatures", "cursos" y sobre manera los "requisitos pa pasar de cursu". O seya, eses torgues qu'impiden a los profesores ver a los alumnos.

Pon como máximu a cada profesor tres frases declaratives y quince interrogatives.

Prohíbe a los profesores facer preguntes cuando conozan la respuesta. Pa que deprendan a facer entrugues que realmente xeneren interés y conocimientu.

Declara una suspensión de toles pruebes y esámenes.

Desixe a tolos profesores que faigan dalgún tipu de psicoterapia como parte de la so formación práutica

Clasifica a los profesores según les sos capacidaes y fai pública la llista. ¿Qué tal si a los profesores menos intelixentes o más problemáticos los xuntamos nel mesmu centru?

Desixe a los profesores que faigan un esame preparáu polos alumnos sobre coses qu'estos saben. Porque hai quien se permite llamar a los guajes incultos y nun saben lo que ye un blog.

Fai electives toles asignatures y retén-yos la nómina a tolos profesores si los estudiantes quieren dexar la so clase al mes siguiente. La meyor propuesta, ensin dubia.

Desixe a los profesores que dexen la enseñanza un añu de cada cuatro pa dedicase a trabayos d'otru campu. Por aquello de que munches veces pasamos de "pilladores profesionales d'apuntes" a "dictadores profesionales d'apuntes". Cierto ye tamién que nesta sociedá actual los universitarios acabamos faciendo cada cosa que mete mieu, pero la cosa ye que de too s'aprende.

Desixe a cada profesor una prueba de tener una rellación cariñosa con otru ser humanu, a lo menos. Si hai dos persones que nun seyan de la familia que declaren voluntariamente que lu quieren, que-y suban el sueldu. Esto fala por sí solo y ye una traducción lliteral del llibru. ¿A que nunca lo pensarais?

Desixe que toles pintaes feches nos baños de los centros sobre profesores se reproduzan en grande onde lo vea tol mundu.

Y esto, ¿en qué parte de la programación didáctica lo pongo?

El foréu como actividá crítica

2007-10-08T19:17:00.000+02:00

Foréu: actividá que consiste en compartir y recibir información que, yá sea por intrascendente o por peligrosa pal sistema, nun s'atopa en nengún otru mediu de comunicación .

¿Y ónde va una a anunciar un proyeutu revolucionariu pa la lliteratura n'asturianu agora que nun furrulen los foros d'Asturies.com? Quién nos diba dicir que nos díbemos sentir tan vacíos ensin un llugar ónde dir a soltar y a lleer puyes y babayaes impunemente... y que s'enterare d'ello tou asturianista de pro.

La verdá ye que tol mundiu se daba cuenta de que aquel foru taba envenenáu de mala idea, que, digamos el 65% de los participantes sólo diben allí a tocar la moral, a insultar, a echar mal de güeyu a los proyeutos del "rival", pero la mera esistencia d'estos yá yera un síntoma de salú democrática. Esto faime alcordame del llibru que toi lleendo: La enseñanza como actividad crítica (Teaching as a subversive activity) de Neil Postman y Charles Weigngarten.

Como se pue deducir, ye un llibru de pedagoxía (la sutil diferencia ente crítica y subversive débese a que'l llibru se publicó n'España en 1973, cuando la pallabra subversiva nun taba lo que se diz bien vista na portada d'un llibru), pero con un enfoque social. Dempués de too, el camín de la sociedá depende fundamentalmente de la educación del pueblu. Y lo que más-yos preocupaba a esos autores nel añu 1969 yera que se taba cayendo ensin remediu nuna cultura de medios de comunicación de mases onde'l pueblu yera únicamente receptor pasiva d'una información (manipulada y controlada por unos intereses mui claros); y anque a dalgún ciudadanu d'a pie se-y ocurriera una fórmula máxica pa finar colos males del mundiu, nun tendría ningún mou de difundila. Daquella nun podíen imaxinar (yeren un migayu pesimistes) el vuelcu que diba dar esto na cabera década del sieglu XX.

Güei podemos usar la tecnoloxía pa difundir una idea revolucionaria o llamar babayu al vecín (ensin sabelo) o pero'l casu ye poder. Otra cosa ye, como diz'l aforismu modernu, que la xente tenga tol conocimientu del mundiu al alcance d'un clic y sólo lo use pa ver fotos de Britney Spears en porrica.

Festival del humor

2007-10-04T20:51:00.000+02:00

¡Güei: una de peperos y sociates!

Pongo equí'l dichosu video por si dalguién pasó'l día de güei embaxo una piedra y nun lu vio nos informativos.

Yo sólo tengo unes cuantes entrugues:

-¿Por qué ye tan malu? ¿Nun se supón qu'hai perres?
-¿Por qué ye tan ñoñu, sabichiegu y maniquéu? ¿Ónde ta la frescura de la mocedá?
-¿Por qué se piquen tanto los del PP? ¿Comen ayos o qué?

-¿Cómo ye eso de "papel de la muyer na sociedá actual = igualdá"? ¿Falamos de lo que ye o de lo que tien que ser? Porque a ver si va apotar más el rapaz del polu rosa...

Atención, ciudadanos del estáu español, que como haya rempuesta va ser de traca...

NaNo (ninguna relación col protohéroe asturianu n'hores baxes)

2007-10-02T23:02:00.000+02:00

Pongan atención señores: ¡Ya ta abiertu el plazu d'inscripción pal NaNoWriMo 2007!

Pal que quedare como taba, esplico de qué va'l tema. NaNoWriMo ye'l acrónimu de National Novel Writing Month. Trátase d'una iniciativa qu'entamó nos Estaos Xuníos, que consiste n'afalar a la xente pa que faiga'l propósitu d'escribir una novela durante'l mes de Noviembre. Sé yo que dicho asina abulta una xera inabarcable, pero ellos como son yanquis piensen en términos de pallabres y son pragmáticos como ellos solos: si escribes 1700 palabruques (malapenes tres páxines de documentu de Word a espaciu simple, lletra Times New Roman 12 de tola vida) al día, al cabu'l mes tendrás una hermosa al empar qu'inédita novela de 50 000 pallabres (ergo casi cien fueyes).

No que más aporfíen los que lo entamen ye en que nun t'esmolezas si ye una mierda o non: les correcciones yá vendrán dempués, tu simplemente dexa fluyir la prosa y sobre too, disfruta viendo de lo que yes capaz, porque d'otra manera nunca lo fadríes. ¿Cuándo crees que vas tener tiempu/ganes pa escribir una novela? Si nun los busques tu, enxamás. Amás, el poder del amor propiu y el d'una fecha llímite pa cumplir un oxetivu (que me lo digan a mi d'estudiante) ye lo que fai el milagru, que ye posible (muncha xente lo llogra) siempre que a) sacrifiques la to vida más allá de los compromisos ineludibles col trabayu y les tos responsabilidaes, incluyendo hores de sueñu, actividá sexual, participación en marches pola oficialidá de la to llingua, etc; y b) tomes cafés como pa dexar a la burra de Juan Valdés de baxa por estrés.

Lo más probable ye que yo nun lo faiga, pero si dalguién se presenta creo que diba ser el primer NaNo Winner n'asturianu de la historia, y eso siempre tien el so aquél (si cumples coles 50 000 pallabres los de la organización dante namái un distintivu pa poner nel to blog a mou de palmadina na espalda, asina que ye totalmente por amor al arte). La pena ye que nun diba llegar pa presentar el productu final al Xosefa Xovellanos, que son 7000 euros y sé de bona tinta que nun se presenta muncha xente.

Dalgún día lo fadré. De momentu ando esborronando una llibreta, un pocoñín casi tolos díes. Si hai dalgo qu'abunda en mio casa son les llibretes en blanco y los llibros qu'esperen que los llean.

Amiesto: Información en castellán y enllaz de la comunidá livejournal de motivaos hispanofalantes

¿Llunes? Non, vienres yá :P

2007-09-27T23:39:00.000+02:00

Linkeando al debalu atopé esti artículu de la wikipedia sobre la lluna. Según esto, la lluna enllena de cada mes tien un nome, polo menos na cultura americana heriede de los nativos de la tierra, y unes carauterístiques definíes de visibilidá ya influencia sobre la naturaleza (nel hemisferiu norte). Asina tendríemos:

Xineru: Lluna de llobos (¿d'ehí el títulu de la novela de Julio Llamazares?)
Febreru: Lluna de xelu
Marzu: Lluna de tormentes/Lluna de cuervos
Abril: Lluna creciente
Mayu: Lluna de les llebres
Xunu: Lluna del aguamiel? Lluna de los praos? (toi en dubia)
Xunetu: Lluna de la herba
Agostu: Lluna del maíz
Setiembre: Lluna de la collecha/Lluna del vinu/Lluna cantarina
Ochobre: Lluna del cazador
Payares: Lluna de la nieve
Avientu: Lluna del iviernu

Y llueu toi yo, que nun m'alcuerdo de la última vez que vi la lluna nin distingo más que les cuatro fases que t'aprenden nel colexu. Vivimos como robots, joder.

Tal como yéremos

2007-09-26T19:57:00.000+02:00

Esta selmana tuve que baxar al Milán un par de veces, dempués de bastante tiempu. Pasar perhí produzme una sensación estraña. Vaiga per delantre que nun se m'ocurriría meteme n'otra carrera ni anque me fuera la vida nello. No no no no no no no, nin de coña, vamos. La universidá española (diría l'asturiana, pero xente que conozo qu'estudia n'otros llugares del Estáu confirmen la xeneralización) ye la peor manera d'estropia-y la vida a un post-adolescente incautu. Antayeri atopé un diariu de segundu de carrera y yera lliteralmente "morrer de dolor". Creo que nun conozo a una sola persona dafechamente contenta cola so formación universitaria. Da la impresión de que lo más que se pue esperar ye que la universidá te devuelva cinco alos más tarde (nel meyor de los casos) con una mínima capacidá d'adaptación a la vida civil (lléase llaboral y social, nel sentíu de participar nel to entornu). ¿Esaxero?

Pensar lo que yera yo en COU, la creatividá desbordante cola que Marta, Víctor y yo matábemos l'aburrición y el teenage angst mientres sacábemos sobresalientes... Y lo distinto que ye n'Inglaterra, por exemplu. Allí lo normal ye pensar que un rapaz o rapaza enllena vida que lleva tola ídem sentada nuna siella lo que necesita ye salir al mundiu, dir pal tercer mundiu a enseñar a neños pequeños a lleer o xugar a futbol o a construir una escuela. Aquí dí-ylo a to madre, que con 18 añiños quies dir pal Perú, que te manda p'allá d'una patada y dempués-y entra la llorera. Pa detrás podría falar de lo que ye la universidá ellí pero creo que paso, que me da la risa.

Aún así, echo un poco de menos la vida universitaria, magar que nun me falten estímulos intelectuales agora mesmo. L'añu pasáu, nun cursu d'estensión universitaria que tenía horariu de mañana intensivu, dime cuenta de que lo qu'echaba daveres de menos yera'l compañerismu, el pasar cinco o más hores al día con xente con un oxetivu (o enemigu) común. Ye una relación especial, que nun se fragua en nenguna otra circunstancia, pienso yo. Daquella nun tenía compañeros, solo alumnos, que anque ye otra relación prestosa (créalo quien quiera, pa mi sí) nun ye igual. Amás, estos yeren casi toos mayores que yo y la mayoría podíen ser los mios pas, y facíaseme bastante raro.

Güei tengo compañeros y préstame con ellos, pero la vida universitaria (máxime la vida universitaria Erasmus porque pa mi fue la única vez que tuvi fuera casa) dame señaldá. Nun quiero volver a la universidá, quiero volver a aquellos años, pero sabiendo lo que sé agora (caro, home, lo que nun quier naide, nun te digo). Prestaríame escribir un poema sobre aquel tiempu (... cuando comprábemos pitos sueltos /y nos creíemos mui llistos...) pero nun soi pa ello, paezme que nun ye lo mio.

... pero qué guapín ta'l Milán nes mañanines d'ochobre...

Tirando del carru

2007-09-23T13:23:00.000+02:00

En realidá nun tengo muncho que contar, pero yá me taba dando cascancia tener el blog abandonáu tantu tiempu. Los oxetivos pa Ibias 2007 cumpliéronse con nota pero, como saben los que me tienen visto per bares y chiringos, yá volví va mes y mediu.

Tengo una gana de qu'entame'l cursu y garrar la rutina otra vegada que nun veo. Setiembre resultó ser un mes un poco cruel conmigo, por cuenta de l'amestadura d'un plizcu d'estrés llaboral, la marcha de una amiga mui querida, el dormir poco y el volver a fumar (causa y a la vez consecuencia de disgustos). Too esto dexóme nun estáu d'ánimu un poco penosu del que voi saliendo con ayuda d'un migayu de sentíu común (lleer llibros de psicoloxía ye de les meyores coses que se puen facer nesta vida pa salvaguardar esa ayalga que ye la salú mental) y les pequeñes alegríes de la vida (véanse cruasanes recién fechos a les 4:30 de la mañana). Espero que la espicha de los cursos d'Ibias ponga'l broche d'oru a esti mes y yá empiece a ser too d'otra manera.

La bona noticia ye que vuelvo a tener gana d'escribir lliteratura (el microrrelatu, la solución pa escritores poco o nada constantes).

Ehí va una muestra. Dedíco-ylu a Xaime pola inspiración y la charra enriquecedora.

Salio a la cai cola lluz de la mañana na cara. Duró-y l'allegría hasta que cayó en que'l sol tamién brillaba pa los enemigos.

Declaración d'intenciones

2007-08-05T15:06:00.000+02:00

Marcho pa Ibias:

A bañame en ríu

A tar una selmana ensin noticies del mundiu

A beber vinu de la tierra

A beber quintos de Mahou a un euro

A que me paeza raro ver cartelos en castellán

A deprender coses sobre cultura tradicional

A que me regalen llibros

A conocer xente prestoso de tolos llaos d'Asturies y de fuera tamién

A volver a ver a los ibicencos de pro

A pasar un poco calor

A dormir menos de cuatro hores diaries

A salir en fotos con muncha xente

A inventar chistes n'asturianu

A fermentar idees pal cursu qu'entra

A saltame la dieta

A almorzar pan con mantega (cuando me llevante a tiempu pa baxar a almorzar)

A por otra llinia pal currículum

Espero algamar toos estos oxetivos.

Hasta el vienres que vien (polo menos).

Poniendo la oreya

2007-08-02T19:39:00.000+02:00

Escuchar conversaciones ayenes ye'l viciu (in)confesable de cualquier filólogu de profesión y devoción, sobre too nun sitiu como Asturies, onde la realidá llingüística ye tan elástica qu'hai xente que discute que se fale asturianu en nenguna y otros que ven sustratu perdayuri (yo vengo a ser d'estes). Güei apetezme compartir cola rede estos dos casos curiosos...

Suxetu d'estudiu A: señora d'unos 65 años

Reproduzo'l enunciáu en cuestión:

-Pues ahora n'agostu ná, porque marcha de vacaciones el fixo...

Yo pensando: "¿Qué demonios será'l fixo?". Tardé un par de minutos en decatame de que taba falando del que-y fai rehabilitación... el fisio. Llueu dirán que nun hai bonos falantes nes villes.

Suxetos d'estudiu B y C: dos rapacinos d'unos 13 años

Nun pueo poner equí'l diálogu porque fai ya bastantes díes d'esto y amás dexóme tan ablucada que se m'escaparon tolos detalles. Resulta que yo m'averé un poco a estos guah.es pa calicatiar un poco lo que me tocaría llindiar si llegase a dar clase na Secundaria nun futuru próximu y, sobre too, pa ver en qué grau d'amestáu se mueve la mocedá mierense. Nun sé qué me sorprendió más: si lo asturiano que falaben o que nun fui quién a figurame de qué degorriu diba la conversación. ¿Dalguién sabe qué será una cosa que pue ser slim o fat, que tien furacu y que se compra nos chinos?

La maleta al agua

2007-07-25T16:16:00.000+02:00

[Corrixo y amiesto porque la entrada orixinal escribíla con priesa y dempués ocurriéronseme más coses que nun quería dexar nel tinteru]

¡Cómo me presta el caberu discu de Tejedor! Bono, en realidá tengo que precisar que les que me presten son les pieces cantaes, porque a mi el folk instrumental nunca nun me dio nin fríu nin calor. La voz d'esa moza llégame al alma: tien un timbre tan cenciellu -nel bon sentíu-, entrañable y natural (como'l propiu bable, según tienen dicho xeneraciones y xeneraciones de provincianos) que nun me cafia por muncho que lu escuche. De fechu, agora mesmo toi con esos cantares nesa etapa de idiliu obsesivu que me fai poneles una y otra y otra vez.
Daquién podrá dicir qu'Eva Tejedor nun canta gran cosa, que les hai muncho meyores nel folk del país pero ¿y lo asturiano que suena? A mi, por exemplu, tamién me maraviya la voz de Gema la de Corquiéu (que ye tamién, por cierto, una persona encantadora), pero siempre me paeció qu'esi soníu ye como facer un traxe tradicional con tela mercao nel Corte Inglés en vez de con una manta atopada per casa; o como llevantar una "casa rural" de la nada: quedar quedará perguapo, cásique perfeuto, pero falta tolo qu'hai detrás.
Sicasí, lo que más m'ablucó ye lo bien que reflexa la canción que da nome al discu el mio sentir pa con Inglaterra. Amás, recomiéndovosla por tener unos soníos americana de banjo y acordión a lo zydeco que merez la pena descubrir (o dexar que te descubran ellos).

Nun teo vezu de caxes de cartón

nin güeyos por ensuchar

nun ta llueñe'l sitiu onde yo voi

pero nun sé ónde quiero tar.

Yo nun naguo por volver

la mio maleta nun cayó pela mar

yo nun naguo por volver

namás que teo señaldá.

¿Pue tenese señaldá d'una tierra que nun seya la tuya?

2007-07-15T12:51:00.000+02:00

Yo siempre supi que yera rara... Agora resulta que soi mui rara (nel sentíu inglés de 'mala d'atopar'). Polo visto solo hai un 2% de toles muyeres que son como yo (¿del mundiu? ¿del ciberespaciu? ¿d'entre toles folgaes que se decidieron a facer el test?). Diz que soi imaxinativa, pancha y brillante (y eso que nun me vieron con una capa cera). Pa lo de goofy nun tengo una pallabra esacta n'asturianu (seguro que la hai, si daquién me quier ayudar...) pero cualquiera que llea un poco esti blog daráse cuenta del tipu de sentíu del humor que tengo y esa bien a ser más o menos la definición (escéntrico-absurdo-'como una maniega', in short.

Your Personality is Very Rare (INTP)

Your personality type is goofy, imaginative, relaxed, and brilliant.

Only about 4% of all people have your personality, including 2% of all women and 6% of all men
You are Introverted, Intuitive, Thinking, and Perceiving.

How Rare Is Your Personality?

Sicasí soi consciente de qu'estes coses tán feches por y pa frikis, pa consolanos pensando, como diz el títulu d'un llibru que nun lleí, Ello ye too la xente, que nun mos compriende. ¿A quién nun-y presta pensar que ye distintu al 96% de la humanidá? Bono, quiciabes si haya persones con vocación de lladriyu na muria que tuvieren mal a gusto con esta idea...

diálogu (im)posible

2007-07-06T22:45:00.000+02:00

-¿Qué-y regaló to ma a to güela por Navidá?
-Un pastilleru.
-Joer, ¿y nun te paez qu'hai meyores maneres d'arreglar les coses col piraván del to hermanu ensin endilga-ylu a la prubina?

[Dalgunos pensaríen que dempués de la euforia inicial yá diba abandonar esti blog, pero ye, como munchos sabréis, esta ciudadana yá nun ta tan desocupada como al entamu. Lo d'ocurrente ye otru cantar, chorraes como esta viénenme cada poco, pero el problema ye saber cuáles van-y fadrán gracia a más xente qu'a mi. Pémeque se tea fraguando un nuevu xéneru lliterariu. Bueno, ¿qué? ¿Faivos gracia? Nun vos oyo reívos...]

Un casu d'asesinatu

2007-06-20T00:13:00.000+02:00

Güei nel tren (un tren enllenu estudiantes intentando roba-y minutos a la ruta pa intentar pescanciar providencialmente les tesis de Finley sobre economía nel mundiu antiguu), al volver la cabeza, vi por casualidá que la moza que taba nel asientu de detrás tenía fecho CRUCES DE ROTULADOR VERDE FOSFORITO enriba los párrafos del LLIBRU que nun caíen-y pal esame. Dime la vuelta respirando fondo, esperé a que llegara'l tren, dexé la estación nel sentíu contrariu a ella y acurrucada tres de la primer esquina, ensin perdela de vista, llamé a la policía.

Entrada-homenaxe a 4colors.net

2007-06-15T23:09:00.000+02:00

Ayeri perdí un torniellu.

Pa toos aquellos que tean pensando que yá me faltaba hai tiempu, aclararé que ye de los patines.

Death and taxes

2007-06-13T22:42:00.000+02:00

Fai munchos años, la nuestra tutora del ciclu mediu d'EXB (¿sabéis lo que yera eso, yogurinos?)comentó en clase lo que yo llamo agora la paradoxa del contribuyente. Supongo qu'ella nun yera mui consciente de que la so audiencia de diez años nun yera el terrén más fértil p'acoyer esa idea, pero ella semó a voléu y esti comentariu ye testigu de que non too cayó no ermo. La paradoxa ye esta: si tu, como honráu trabayador de los del montón, pagues los tos impuestos relixosamente, tas dando perres pa qu'otros les roben y esbardien (hai que destacar qu'eses pallabres, u otres paecíes, se dixeron na época más caliente de choricéu sociata, cf. casos Roldán, Filesa, etc...); pero si defraudes a Facienda yes un piraván que tas robando a tol mundu, y yes parte del cáncer que nun dexa qu'esti país progrese. Hmmm. ¿Qué facer?

Yo personalmente tengo que dicir que yo declaré con toles de la llei y aun así salióme a devolver 68 euros. ¡Ventayes de ser probe!

P.D. Nun sabéis lo adulta que me siento.

Tán llocos estos asturianos...

2007-06-10T16:51:00.000+02:00

L'otru día, Gibrán atopó por dalgún requexu de la rede una llista escrita por un erasmus/estudiante d'intercambiu retornáu coles coses que-yos sorprenden de la vida n'Asturies (equí en V.O. inglesa). Ta simpático ver cómo nos ven los guiris que estuvieron equí básicamente de foryú (si non mirái cuántes referencies a la universidá, apenes 2 en 81 puntos que tien la llista). Voi comentar un poco les más llamatives (dalgunes nun merecen la pena porque son totalmente obvies: sidra, fabada, etc...), a ver qué vos paecen.

Coses que descubres viviendo n'Asturies

Un bocadillu y patates ali-oli= el paraísu a les 4 de la mañana. (Nun pueo tar más d'alcuerdu, pero n'Inglaterra tamién comen kebabs a la hora de volver pa casa).
Tienes visto xente con abrigu y bufanda a 20 graos de temperatura. (¡Por supuestu! Hasta'l cuarenta de mayu... Esta ye una estampa mui conocida nel campus del Milán: namás qu'en marzo sal una rayadina de sol, los erasmus salen a llucir carne nórdico pensando que ya llegó'l branu, mientres que nosotros vamos tapaos hasta arriba porque ayeri tuviera malísimo. Nun sé qué postura será más absurda, pero la realidá ye que les ingleses son mui aficionaes a quitar ropa y tán curtíes n'eso, y per otru llau, que yo sepa dir abrigáu nun mata nin produz catarros).
Tienes andao per Xixón o Avilés hasta les seis de la mañana porque nun hai autobuses nin trenes primero. (Felicidaes. Realmente esperimentaste una parte fundamental de la esperiencia asturiana).
Tienes visto vieyos y neños pequeños na cai a les 2 de la madrugada. (¿Y? ¿Qué ye, ho? ¿Nun tienen derechu a pasalo bien?).
¡Nun cuelgues una bandera española por nada del mundiu! (Esto sí que tien que ser sorprendente pa cualquier guiri. Reto a cualquier xeniu de la oratoria a que intente esplicá-ylo a un americanu y que lo entienda)
Pegar berríes nun ye pegar berríes, ye namás charrar animadamente (¡Ehí ta! Acabes de descubrir el puntu númberu ún de la pragmática asturiana. Lo siguiente ye conocer lo que la xente-yos llama a los sos colegas nes cuenques).
Tuvisti tomando chupitos colos chigreros del Asturianu/ Trabayasti nel Asturianu. (Cuartel xeneral erasmus n'Uviéu, pal que nun lo sepa).
Tienes salío de casa a la 1 de la mañana pa salir. (Ye verdá, hasta a mi paezme un despropósitu pero, ¿a quien nun-y pasó?)

Y cuidadín, que hai hasta referencies a la nuesa llingua. Bueno, un par namás y bastante ruines, pero polo menos nun ye una realidá invisible:

Asturianu = Xixón. (¿Qué quedrá dicir? ¿Qué ye la única pallabra que compón l'idioma? ¿Qué ye lo único qu'ellos saben? )
¡Puxa Asturies! (Folclorismu que nun falte)

A lo meyor a otra xente-yos paez un montón de topicazos prepotentes, pero nun los culpo. Siendo yo mesma ex-erasmus sé que ye difícil nun cayer na tentación de reíte de la cultura que t'agospia (por dicilo asina). Amás, qué coñu, nótase que lo pasaron como los indios, ¿non? Lo que se nota tamién ye que nun salieron de la zona central, o que si lo ficieron nun-yos dio muncho más. Una vez más, la imaxen de l'Asturies del triángulu urbanu Uviéu-Xixón-Avilés volvió a eclipsar a les otres Asturies.

2007-06-02T17:05:00.000+02:00

El ska en direutu ye un orgasmu musical que pon los pelos de punta y acelera'l corazón.

Ayer, Skalariak. Hoi, The Pepper Pots (anque a estos nun los voi dir a ver). Dientro dos selmanes, The Toasters.

1% d'inspiración...

2007-05-31T23:15:00.000+02:00

Güei, nel momentu más insospecháu, sorprendióme una idea pa un cuentu infantil. ¿Dexaréla escapar como siempre? ¿Apagaráse la bombiel.la? ¡Non! ¡Esta va ser la mio!

El amor en los tiempos del cólera

2007-05-27T17:11:00.000+02:00

Una de crítica lliteraria... Resulta que pola mio formación en filoloxía inglesa y asturiana teo una falta tremenda de llectures en castellán (raro, ¿eh?). El branu pasáu garré la determinación de culturizame un poco na llingua de Cervantes y lleí el mio primer llibru de García Márquez (El coronel no tiene quien le escriba); y va poco qu'acabé con esti d'equí: El amor en tiempos del cólera. L'argumentu en sí nun m'impresiona, ni la construcción de los personaxes (al contrario que n'El coronel...), pero lo que nun se pue negar ye la maestría de García Márquez a la hora de retratar sentimientos y emociones, d'esos que se dan a lo llargo de los distintos estaos d'una relación ente dos persones. Un gran manual d'educación sentimental que yo recomendaría a tolos adolescentes si quieren dir colos deberes fechos y amortiguar (ya que nun se puen evitar) les cayíes que los aguarden na vida y nel amor.

En breve va haber peli (estrénase en Payares nos EEXX), asina que pa abrir boca déxovos una semeya de Javier Bardem caracterizáu de Florentino Ariza (enamoráu insistente y eternamente inmaduru)

2007-05-25T11:48:00.000+02:00

Termina cada día y que termine dafechu. Ficisti lo que pudisti. Delles tochaes y absurdos coláronse; escaezles namás que puedas. Mañana ye un nuevu día. Has entamalu con serenidá y cola moral tan alta que les tos vieyes tontaes nun seyan quien a enllordiala.

Esta guapa cita ye d'Emerson (Ralph Waldo, non el xugador del Real Madrid) y cuando la vi nel fotolog de Laura (en V.O.) sentí que nun solo tenía que ponela n'asturianu sinón que ye lo que toos debiéremos aplicar na nuesa vida diaria. Por ciertu, non, nun tien nada que ver cola mio decisión d'ayeri d'entamar el blog.

2007-05-24T20:00:00.000+02:00

Recuerdo una tira cómica que lleí hai años nun periódicu inglés. La primer viñeta falaba sobre les coses que nos prestaría facer pero nun nos avaga. Na segunda salíen tres persones, dos homes y una muyer y dicía: "A ún d'estos homes prestaría-y manda-y un corréu a la muyer pa saber qué tal-y va y deci-y que ye una gran persona. El otru planea clava-y un cuchiellu en pechu". Na tercer viñeta apaecíen les tres persones otra vez faciendo la so xera diaria y termina diciendo "Por suerte o por desgracia, nengún va topar tiempu pa facelo". Humor inglés.

Güei, yo, por suerte o por desgracia (ta por ver), atopé tiempu pa entamar esti blog.