The artist: l'artista énte la industria en declive

Vi esta película (por ciertu, nun soi pa entender por qué nun-y traducen el nome) el día enantes de que-y dieren los Oscar y la verdá, nun m'estraña nada que llevare tolos galardones que llevó. The Artist ye una obra qu'aparenta ser distinta (¡una peli muda en 2011!) pero nel fondu nun cuenta nada que nun contara yá El crepúsculo de los dioses o Cantando bajo la lluvia y tien el tema estrella de les películes triunfadores: alza, caída y redención del protagonista. Amás ye una película, a imaxen y semeya d'aquelles a les qu'homenaxea, tremendamente blanca (en tolos sentíos: nin un personaxe d'otra etnia, nin faciendo de criáu). Con tolo qu'habría pa contar sobre aquella época (ehí ta Hollywood Babilonia pa falar de los escándalos de sexu, drogues y violencia de les estrelles del cine mudu y la "época dorada"), Hazanavicius prefier contanos una historia pa tolos públicos, dexando los posibles requexos oscuros pal subtextu. Déxovos unos spoilers ocultos nos comentarios pa que los llea quien nun la vea o a quien nun-y dea más.



Sicasí, ye una peli entretenida, "guapa" de ver. Los dos protagonistes tán pa comelos colos sos primeros planos y la so forma de reíse moviendo los costazos y les escenes de baille dexen un saborín dulce qu'efectivamente ye d'otra época.


Agora prestaríame facer otra reflexón. Como l'argumentu de The Artist, tampoco ye que seya una novedá, pero nun pasa nada por da-y otra vuelta. Analicemos los fechos que marcaron el pasu del cine mudu al sonoru:

1) La tecnoloxía avanza imparable y permite coses qu'enantes nun se podíen.
2) La xente tien curiosidá pela novedá, que s'entiende como interesante, y una vez probada pasa a entendese como irrenunciable no sucesivo (salvo contaes esceiciones).
3) Los empresarios entienden que'l públicu demanda lo nuevo y que tienen que poner medios pa dá-yoslo (puesto que'l públicu ye'l que paga'l tingláu), polo que-yos esixen a los artistes que s'adapten.
4) Los artistes entienden que nun hai vuelta atrás nel nuevu paradigma y aquel que nun quiera, sepa o pueda adaptase tien que resignase a quedar atrás nel favor del públicu y la industria, por muy n'alta estima que tenga al so arte.

¿Por qué la industria del entretenimientu comercial -música, cine, etc...- d'anguañu nun ve les coses tan clares como hai un sieglu?