Coles cames ensin facer

Qué coses, oye, pasó un añu y volvemos a tar d'evaluación... Bono, supongo que tendré que dar dalguna esplicación a esta ausencia, y nun tengo nenguna más qu'esta...

(Mauro Entrialgo ye'l meyor)

Pues sí, la comparación paezme enforma acertada. El blogue ye como la casa, pónesla al to gustu, tas a los tos deleres y presta (como mui bien dixo tamién el mio gran amigu ya filósofu de caleya Diestru), pero hai que cuidala, llimpiala, pintala dacuandu, reteyar, qué se yo. Cuando hai más telarañes de la cuenta lo más normal (pa mi) ye que en vez de ponese a arreglalo escapes a los bares. Nos chigres pásase bien, escuches música, ves un poco la tele, tienes conversaciones sinsustacia, cotillees sobre los conocíos , conoces xente nuevo y hasta ligues (nun ye'l casu). Pero tarde o temprano llega una hora na que t'apetez volver pa casina...

Nun digo qu'a partir d'agora vaya a tener la casa a xeitu pa tener visites. De fechu, sí que me da un poco la sensación, como lleí que dicíen nel Sidre & Blogues de que'l momentu d'oru de los blogues yá pasó, que vamos cada vez más a lo inmediato y minimalista. Home, de momentu nun esiste otru formatu como esti que permita al común de los mortales esponer idees en profundidá y llegar a una audiencia potencialmente masiva. Pero si tolo más que tienes son ocurrencies y lo que quies ye que los collacios se rían con ello (o te rían les gracies) son muncho más agradecíes les redes sociales. Será según me dea la ventolera, hai veces qu'apetez más quedase en casa caleciendo que salir per ehí, ¿o non?

Munches gracies a toos los que s'interesaron pel estáu de salú d'esti blogue, un saludu pa ellos.

Evaluación

X. tien catorce años y anque vive cola madre, separada hai cuatro años, veía al pá un fin de selmana de cada dos. Hasta agora, que'l pá marcha a vivir a otru país cola nueva muyer y el nuevu fíu. X. tien carisma a esgaya, bona cabeza, munchos amigos y l'amor de la ma y el compañeru d'ella, pero pesie a too siente'l corazón desgarráu cola marcha del pá porque sabe que, anque se llamen per teléfonu y lu vaya ver en vacaciones, yá nun va ser lo mesmo.

Y. tien quince años y vieno d'otru país hai cinco. La so casa ye una pequeña patria onde se fala, se ve la tele y se vive n'otra llingua. Y. sólo foi quién a facer una amistá nesos cinco años, una criatura venenosa y igualmente marxinada. Agora tán en clases distintes y Y. boicotéase académicamente pa ver si consigue volver a la so vera antes de perder la intimidá pa siempre.

Z. tien dieciséis años y tien a la madre trabayando fuera per entre selmana porque yá sabe que Z. yá ye mayorina y siempre foi mui madura y responsable. Z. plancha la ropa dempués de clase y mientres espera al pá pa cena preocúpase pensando qu'esti trimestre nun va sacar tantos sobresalientes como l'anterior y a ver qué-y van a dicir tol mundu.

Y a mi, probe de mi, tócame pone-yos la nota a X, Y y Z mientres me llamento pola sorrisa que nun-y devolví a X. cuando salía de clase, enfurruscada porque perdió la fueya d'exercicios, la bronca que-y eché a Y por nun atender pa mi y el sarcasmu que-y espeté a Z por nun acertar con una entruga que "tenía que saber de sobra". Trabayu fácil, dicen.

Premiu Kreativu

Noticies: El blogue Coses que (me) pasen recibe un premiu Kreativu de la mano d'un home qu'allorió.

(asina s'esplica)

Sr Alloriáu, munches gracies pol detalle, sobre too porque aceptar esti premiu conlleva la redacción d'una entrada contando siete coses personales sobre l'autora y ésta siempre precisa un emburrión pa ponese a escribir, poro, cualquier "compromisu" en que la pongan ye bienveníu.

Ehí van les siete coses:

1. Nací y viví tola vida en Mieres del Camín, sacando'l cursu 2004-2005 que tuvi d'Erasmus en Leeds, un par de meses que tuvi trabayando en Santander y onde toi agora, anque vuelvo casique tolos fines de selmana.

2. La mio familia ye, por parte paterna, enteramente de la parte d'Uxo y per parte materna, caún d'un sitiu de fuera d'Asturies: madrileños castizos y vascos maketos.

3. Nesti momentu dedícome a la enseñanza, toi dando inglés en 3º y 4º d'ESO y l'ámbitu sociollingüísticu en diversificación. Préstame la enseñanza, pero la mio rellación colos adolescentes ye una montaña rusa. Cuando daba clase a adultos yera too sorrises y bon rollu y agora veome a veces como la malvada bruxa del oeste y tolos vienres m'atopo una cana más. Sé que me tengo que dar una oportunidá, pero si veo que nun valgo déxolo y yá veré qué faigo, naide va tener que pagar polos mios errores si m'enquivoqué al escoyer la carrera.

4. Soi una compradora compulsiva de material de papelería, especialmente llibretes, que compro cola esperanza d'enllenar con cuentos y poemes. Ehí tán, en caxón. Tamién guardo tou tipu de papeles que tean escritos solo por una cara "p'a sucio".

5. D'un tiempu a esta parte soi incapaz de llevantame más d'una hora enantes de tener que salir de casa pa la primera obligación de la mañana. Por esi motivu les mañanes de los sábados y los domingos pa min nun esisten.

6. Soi Aries dafechu, entamo les coses con tol entusiasmu del mundu y emociónome coles idees nueves, pero soi incapaz de mantener esa enerxía munchu tiempu y esos proyectos revolucionarios que me monto en cinco minutos lleguen a olvidáseme por completu. Eso sí, nesos cinco minutos yá-y lo tuve que contar a tol que se me cruzó per delantre.

7. Primero tuvi un blogue nel qu'alternaba castellán y asturianu, con predominiu del primeru, pero nel branu del 2005 tuvi una especie de cayida de caballu (non precisamente camín de Damasco) y fui escribiendo cada vez menos en castellán (con ánimu poéticu-espresivu). Ensin acritú. Tampoco lleo nesta llingua davezu: prefiero la lliteratura anglosaxona en VO o n'asturianu.


Y agora los mios premiaos, a los que convido a facer lo mesmo:

1. Lo que fizo la borona.
2. In tabierna quando summus.
3. Ventanes pequeñes.
4. La verdá ye mentira
5. Trayasgaya.
6. La paciencia del caracol
7. Escucando estrelles

Una rapacina de 26 años

Atención: escribo esta entrada cola sola intención d'aforrar en psicoanalista. Interés pa l'audiencia xeneral: baxu tirando a nulu.

Esta última temporada vengo faciendo coses que, miraes en conxuntu y con perspectiva, paez que nun tienen otru fin qu'asemeyame a la que yera yo va diez años (ai, si valiera tamién pa poder meteme nos vaqueros que gastaba daquella, o naquel petu de pana...). Atópome a mi mesma escuchando la música que me prestaba y descubro que me sigue prestando. Vuelvo a dexar el pelo llargo. Entamo coses que me recuerden a los enfotos que podía tener entós. Hasta'l tranlará paez que vuelve a ser como naquel tiempu (más información). Solo me falta volver a ser virxe (yá que tampoco faigo lo contrario, por desgracia).

¿Qué quier dicir esto? ¿Que nun toi a gusto colo que fice na cabera década? Nun me paez. Quiero creer que lo que me pasa ye que nesta época de transiciones que toi pasando quiero recuperar aquella ilusión, aquella gana de facer coses, de viaxar, deprender, conocer xente y pasalo bien que tenía (anque a veces me quedara en casa estudiando tamién, eh, que tampoco yera Amy Winehouse). Y que si me viera aquella me reconociera orguyosa como la so personalidá adulta (con más arte pa la vida y perres).

Y si con dieciséis años colé pa París yo sola dos selmanes, ¿qué se pue poner per delantre agora?

Manual pa entender a la xente ( y a ti mesmu)

Una de les coses que más me presta de saber inglés ye navegar pela rede ente conteníos que d'otra manera son inaccesibles. Una de les coses que más me presten de falar asturianu ye poder avera-yles a otres persones.


El testu que vien darréu ta sacáu d'un blogue n'inglés que suel falar sobre cómo ser más eficiente nel trabayu y na vida en xeneral (filosofía GTD, get things done, por si vos interesa saber más). L'autor ye Scott Young, un americanu mui mozu qu'aspira a vivir del blogue; cosa por ciertu que pa mi, qu'escribo estes palabruques nuna llingua que malpenes esiste y pa quien tener venti visites diaries yá me paez "tener audiencia" quédame a años lluz y faime decatame de lo humilde (que non menos digno) de los mios "llogros".

En fin, al granu. Decídome a publicar esti artículu porque últimamente una persona que m'importa muncho ta pasando una racha regular no que cinca a relaciones humanes, y dempués de falar con él volví a topar esti testu, que me paez bastante afayadizu. Pero nun sólo ye pa él, paezme que pue ser de provechu pa munchos de nosotros, qu'en xeneral nun andamos mui sobraos de psicoloxía. Tampoco esperéis una panacea: en realidá ye un testu bastante básicu, nada científicu y tampoco cuenta nada de lo que una persona observadora nun se pudiera decatar, pero viéndolo asina espuesto d'esti mou, desgüesao en puntos clave (la manera de redactar que más casa cola filosofía esa GTD, que tolo manda partir en cachinos pa poder avanzar pasu ente pasu), resulta bastante esclarecedor. Perdonái polo chambono de la escritura: la traducción ye d'urxencia y en munchos casos la redacción orixinal tampoco ye pa tirar voladores.

Ehí va, espero que vos seya d'ayuda y vos ayude a meyorar les vuestres relaciones personales (y especialmente a ti, queríu Barón Samedi):

7 regles crítiques pa entender a la xente

Regla Un: Nun culpes a la malicia de lo que pue esplicase fácilmente col egoísmu.
A la xente nun-y da más por ti. Nun ye porque sean malos o dañinos, sinón simplemente porque tan mayormente centraos n’ellos mesmos. Considerando esti gráficu hipotéticu qu’amuesa la variedá de pensamientos que una persona normal tien:


Nesti exemplu, el 60% de los pensamientos van dirixíos a ún mesmu. Los mios enfotos. Los mios problemes. Los mios sentimientos. Otru 30% empobínense a les relaciones, pero na midida que-y afecten a ún. ¿Qué pensará María de mi? ¿Cómo me pondrá el xefe nel informe? ¿Quiérenme los mios amigos o pensarán que soi un cafiante?
Namái un 10% del tiempu nesti modelu s’emplega na empatía. La empatía ye un socesu raru nel que una persona siente de veres les emociones, los problemas y la perspectiva d¡otra persona. En vez de entregase qué piensa María de mi, entrúgome en qué piensa María.
Dientro d’esi 10% del tiempu, la mayoría de la xente divide la so atención entre munches de les persones que conocen. Poro, tu ocuparíes namás un cachín d’esi porcentaxe na mente de les más de les persones y sólo un par de puntos porcentuales nuna relación profunda. Incluso si la otra persona piensa en ti, pensará en cómo la relación-y afecta, non en ti.
¿Qué quier decir esto?
La vergoña nun tien munchu sentíu. Teniendo en cuenta que los demás namái dediquen un cachín pequeñu de los sos pensamientos a xulgate, el xuiciu que t’autoimpones ye descomanadamente mayor
La xente que paez ser malo o dañino nun lo fai intencionadamente. Hai excepciones, pero generalmente el dañu que sientes ye un efeutu secundariu, nun la causa principal.
Ye trabayu tuyu mantener les relaciones. Nun esperes a que te vengan a invitar a fiestas o a que la xente se t’avere.




Regla Dos: Los comportamientos en sociedá nun suelen ser esplícitos
Esto quier dicir básicamente que les más de les intenciones que tan detrás de los nuestros actos tan tapecíes. Si una persona ta deprimida o enfadada, polo xeneral el comportamientu que tien nun diz colos sos sentimientos.
El vieyu cuentu ye que les muyeres dicen “sí”, “val” y “failo” cuando piensen lo contrario. Pero téngome decatao de que los paisanos faen esto tamién en situaciones onde nun hai confianza, anque non siempre nel mismu sen.
La aplicación d’esta regla ye que ye necesario centrase na empatía, non solo escuchar a la xente. Demuestra confianza, afita una complicidá y aprende a calicatiar a les persones un poco. Centrándonos na empatía normalmente puen rompese estes alteraciones y dir al noyu de la cuestión más rápido.
La otra aplicación d’esta regla ye que lo más del tiempu, cuando te pasa dalgo, naide más lo sabe. Asina que nun t’enfades si la xente nun se decata o reacciona. Si contradices a los tos pensamientos coles tos acciones, nun t’enfades si la xente se tracamundia.



Regla Tres: El comportamientu ta dictáu mayormente pol “altruismu egoísta”.
Dicir que tol mundiu ye egoista ye una esaxeración qu’ignora tolos actos de bondá, sacrificiu y amor que faen que’l mundiu furrule. Pero yo diría que muncho (non too, pero muncho) del comportamientu funciona en base a los principios del altruismu egoísta.
Col altruismu egoísta ye too ganancia. Son les situaciones nes que ayudate a ti me beneficia directa o indirectamente. Hai unes cuantes situaciones onde esto se da:
1. Transacciones – Si merco un coche, tanto yo como’l vendedor nos beneficiamos. Yo gano un coche, que ye lo que quiero. El vendedor gana perres pa meyorar la so vida. Esti ye la forma mayoritaria de altruismu egoísta ente xente que nun tien llazos emocionales.
2. Familiar – El sangre ye más gordo que l’agua. Tamos diseñaos pa proteger a la xente que comparte los nuestros xenes. Esto a veces pue treslladase a amigos y seres queríos estremadamente cercanos.
3. Estatus – Ayudar a dalguién ye un signu de poder. Munches especies de primates ofrecen ayuda como signu de dominancia. La xente actúa de mou asemeyáu, ufiertando ayuda pa facer espoxigar la so autoestima y reputación.
4. Reciprocidá Implícita – Munches relaciones tan basaes na idea de que si yo t’ayudo, dalgun día tu tendrás qu’ayudame tamién.
Dacuando los comportamientos sálense d’estos grupos. Hai héroes anónimos que muerren por causes que nun tienen que ver cola so familia, etc. Pero esto ye una minoría. En cambiu, les más de les acciones puen esplicase por una forma o otra d’altruismu egoísta.
¿Cómo aplicamos esta regla? Pues con ella pues entender los motivos de la xente y apelar a ellos como si fueren pal so bien. Encuentra maneres d’ayudar a la xente dientro d’estes cuatro categoríes. Nun esperes que la xente t’ufierte ayuda más alló del egoísmu altruista, nun ye imposible, pero ye poco probable.



Regla Cuatro: La xente tien poca memoria
Otra regla del comportamientu humanu ye que la xente tien problemas pa recordar les coses, especialmente (ver regla un) lo que nun tien que ver con ellos. Ye más probable que la xente recuerde aquello que tenéis en común que les vuestres diferencies (nun siendo que-yos interese especialmente).
La xente ye olvidadizo por naturaleza asina que nun-ylo atribuyas a la maldá o al desinterés si s’escaecen de dalgo. La otra cara ye que tu pues demostrar que yes de fiar si tú si recuerdes les coses.




Regla cinco: Tol mundu ye sentíu
Esto pue ser una esaxeración, pero’l fondu de la cuestión ye que la xente suel tener sentimientos más fuertes de lo qu’amuesen. Esto ye porque la mayor parte de les cultures desaprueben los estallíos d’enfadu, depresión o entusiasmu, especialmente nos homes.
La aplicación d’esta regla ye que nun supongas que too-y va bien a dalguién simplemente porque nun tenga un ataque de nervios. Toos tenemos los nuestros problemes, les nuestres ansiedaes y disgustos que contenemos. Nun ye necesario que-y saques a la xente los sos asuntos privaos, pero siendo sensible a eses corrientes subterránees date una ventaxa pa intentar ayudalos.
Otra aplicación amestada d’esta regla ye asemeyada a la regla dos. La xente polo xeneral asume que tas bien nun siendo que te vean dándolo a voces.




Regla seis: La xente siéntese solo
Esta ye otra xeneralización polo alto, pero ye ablucante cuánta xente que paez que lo tien too sufre momentos de soledá. Como animales sociales, creo que la xente ye especialmente sensible a que la escluyan. Nos tiempos de les cavernes, la exclusión significaba la muerte, asina que la soledá y el deséu de tar con otra xente ye mui fuerte.
La aplicación d’esta regla ye que la soledá ye bastante común, asina que nesi sentíu nun tas solu. [N.T. Camiento que nesti puntu l'autor quier dicir que'l sentise solu y lluchar contra eso ye un instintu común a la especie y poro parte de la condición humana, y non "mal de munchos, consuelu de tontos"].




Regla siete : ¿Dixi yá que la xente ta volcao en sí mesmo?
Esto pue sonar como una repetición de la regla un, pero creo que les aplicación van más p’allá de les relaciones y estaos emocionales. El fechu de que la xente tiende a tar demasiao preocupao por ellos mesmos como pa facete munchu casu, que la xente tiende a ser más sentío, a sentise más solo y a actuar distinto de lo que siente tien qu’aplicase a como ves el mundu.
En tou casu esta perspectiva debería facete más independiente y proactivu/a. Poniendo la to felicidá individual nes manes d’otra persona o persones, tas ignorando estes regles y lo faes pal to mal.
A mí préstame ser optimista, ensin dexar de ser realista, cola xente. Polo xeneral tol mundiu fai lo que pue, pero equivóquense y sufren ensin querer por mor de tar somorguiaos nellos mesmos. N’otres pallabres, son básicamente como tu.

Últimamente

Hai años yá qu'esti home nun ye santu de mio devoción, pero esti cantar siempre me prestó y amás da xustamente en clavu de cómo me siento estos díes...





... menos poles muyeres comprometíes.

Quiero la lluna, non la nueche y menos esta nueche.

Apúntate a la llista

Hala, yá ta, ya-y dixe a l'Alministración que me pue llamar pa dar clase d'asturianu en Secundaria cuando-y venga en gana, que voi; anque previsiblemente nun seya hasta dempués de les próximes oposiciones y pa entós espero yá llevar tiempu dando clase de la llingua de Shakespeare (el mio oficiu seriu).

Ye parajódico (d'estes paradoxes que joden) que los filólogos especialistes en llingua asturiana llevemos tres años comiendo los mocos, ensin topar sitiu en nengún llau, y agora venga too darréu: llista d'interinos y places en servicios municipales de normalización perdayuri (tres en tres meses y dalgunes más por llegar, hopefully).

En fin, becaria fui, personal llaboral soi y pasín a pasín llegaré a ser interina nesta carrera hacia'l cume de la pirámide evolutiva que ye'l funcionariáu, como dixo Milio Rodríguez Cueto.

Y pa quien nun s'enterare tovía hai de plazu hasta la selmana que vien.

Bat the situeision cheins

(Como dixera Fidel Castro)

Nun me diera cuenta, pero dende qu'entamó el blog hasta güei (un añu, cinco meses y cuarenta y picu entraes más tarde) nun camudara el mio perfil (lo que sal ehí a la derecha embaxo del títulu "Hola"). Y nun ye que nun seya una ciudadana desocupada y ocurrente, teniendo en cuenta que trabayo 17 hores y media a la selmana, pero de repente nun me siento identificada con esos axetivos.