Espectáculos reales

-El casu ye qu'a la xente, al pueblu llanu, présta-y la monarquía - dixe yo - por aquello de que de cuando en cuando dan espectáculos mui vistosos: una boda real, un nacimientu...


-Bueno - arrepostió V. - pero date cuenta de que, nun momentu dau, al pueblu tan pronto-y pue prestar eso como l'espectáculu que da una guillotina nel patiu de La Zarzuela.

(Esta conversación tuvo llugar el domingu día 8, enantes del casu Froilán, del elefante y de lo que ta por llegar que tovía nun sabemos)

Dedicao a la memoria de Román Gros, capitán del exércitu republicanu, veteranu de la Resistencia en Francia y superviviente de Mauthausen, fallecíu 81 años dempués de que se proclamara la República a la que xuró defender y que nunca llegó a ver reparada.

Alcuérdome de tener cinco años y tar sola delantre de la tele, xusto dempués de qu'acabaren los dibuxos y enantes de qu'entamaren les coses de mayores, nuna d'eses pauses onde amás d'anuncios echaben "vídeos musicales" en cuenta de videoclips, y de ver a una panda de rapazos con pinta quinquis bailando nuna estación de metro y al frente un rapaz rizosu con unos güeyos enormes y mui guapu a pesar de tener un poco cara ratonín. Pero lo meyor yera la música y la forma de movese, nun manera de tar viéndolo y nun intentar imitalos.

Alcuérdome de tener diez años y tar viendo un programa tituláu "Pasando", onde se cuntaben coses mui interesantes, y que pusieren el videoclip de "Black or white", otra vez con una música irresistible y un mensaxe tan inxenuamente cursiprogre que nun podía por menos que fascinar a una neña d'esa edá. Alcuérdome de dibuxar el logo de los zapatos negros y los calcetos blancos, de querer disfrazame d'él (nun llegué a facelo) y poner coleta dexando un rizu pela cara.

Alcuérdome de salir al poco d'eso les primeres acusaciones contra él y d'entrugá-y a mio ma "¿Tu dexaríes que me llevare Michael Jackson pa casa si te dan un millón de dólares?". Nótese que yo, nun enterándome de la misa la media, veía esa hipótesis como una situación win-win, too ventaxes, y nun entendí la prisa que se dio ella en dicir "¡De nenguna manera!".

Alcuérdome de que pesie a too, el discu de History sonó ensin descansu nel mio walkman (téngolu en cassette compráu, l'hermanu probe de los formatos d'audio) nel branu de 1996, anque nun me prestaba reconoce-y a mio pá qu'a mi tamien me paecíen abondo meyores les canciones vieyes. Alcuérdome de que me gustaba sobremanera Man in the mirror.

Alcuérdome de qu'un par d'años más tarde, cuando yá nun miraba pa él, una compañera de clase que yera del club de fans traxo al institutu unes fueyes pa recoyer firmes pa pidir que viniere de xira equí. Alcuérdome de qu'eses fueyes acabaron en manes del facha de la clase que-y les arrampuñó al gritu de "¡Que non, que nun quiero negros en España!" (anque d'aquella yá yera más blancu qu'él). Los demás ríimonos (sobre too de la rapaza, que yera la más pringá de la clase).

Alcuérdome de qu'hai unos años un compañeru de facultá me contó que tenía la enfermedá de Michael Jackson y que yo, nun arranque d'humor mierense, contesté: "¿Qué yes, pederasta?". Pero non, tenía vitíligo y quedáben-y manches blanques pel pelleyu, anque notábense-y poco porque yera pálidu a esgaya. Alcuérdome de que yo creí na enfermedá d'él pero non na de MJ, y seguí atribuyéndo-y la blancura a la tontería y el refalfiu.

Alcuérdome de toles veces que lu vi pela tele estos años cola máscara, sacando al guaje pela ventana, colos xuicios, con tola so decadencia física y moral.

Dicía güei un amigu de la que tomábemos el café que-y jode qu'agora tol mundu paez que ye superfan de Michael Jackson y que siempre lo fue, cuando hai dos selmanes namás que se lu amentaba pa facer la risión. Dios nos llibre de la hora de les alabances, pero la verdá que pa los neños de los ochenta Jacko ye una constante nes nuestres vides, un símbolu: una especie de vanitas alvirtiéndonos que les perres nun dan la felicidá y de lo malos que son los escesos. Güei, visto con güeyos un poco más maduros lo que pueo dicir ye que me da muncha pena. Ye'l casu d'un ser humanu instrumentalizáu, creáu dende neñu namás pal espectáculu, ensin habilidaes sociales nin autoestima nenguna y con perres y afalagos entrando per toles puertes... hasta que dexaron d'entrar.

Apuntes del natural

Un xiblíu tresportó la noticia dende'l fondu de la plaza Requexo, multiplicándose nel aire de la tardiquina al so pasu. Pero, como si se reproduciere por mitosis, yá nun yera'l mesmu xiblíu, sinón munchos iguales, producíos por boques distintes. Al llegar estos soníos, les manes posaben los vasos nes meses de madera y les cabeces volvíense buscando l'aniciu de too aquello. La voz de "¡cabrones!" axuntosé a les notes de la melodía desfinada. Al cabu descubrióse l'oxetivu de la ira del pueblu en dos coches blancos con fraxes azules. El glayaríu aumentaba cola colaboración de los que sabíen de qué iba'l tema y la de los que sólo sabíen de los sos protagonistes, nesti casu los eternos villanos, presuntos culpables.

-¡A onde tenéis que dir nun vais, cabrones!

-¿Qué pasó? ¿Qué pasó?
- Que lleven a un morenín, tío, los hijos de puta.


[Requexo, 11 de xunu de 2009]

Reflexón post-electoral al estilu Pingarates

Tamos condergaos a que remanen el cotarru aquellos a los que nos val más compra-yos un traxe que convidalos a comer o viceversa.

Nosotres podemos, vosotros podéis

L'autora d'estes palabruques da la norabona a los practicantes y aficionaos a la ximnasia rítmica masculina pol reciente llogru de conseguir que s'afite la categoría pa homes nos campeonatos d'España, al tiempu que recuerda a tol mundu que pa consiguir la igualdá ente sexos nel deporte queda tovía muncho por andar y que les victories contra les torgues de xéneru nun son regalaes nin pa unos nin pa otres.

Porque la igualdá nel deporte inconscientemente identificábase con "que les muyeres faigan coses de paisanu, que son les interesantes", incorporándose estes a la competición n'actividaes que taben diseñaes pa otros cuerpos, nos que difícilmente puen batir récors; al tiempu que se pensaba "qué paisanu va querer facer eso" no que tocaba a los deportes afayaos a les condiciones físiques de la muyer (los pocos qu'hai).

Agora sólo falta dir equiparándose n'atención mediática y repercusión na sociedá. Hai que siguir.

Dedicao a la plantiya del Llosalín CF de La Ribera y a tolos que lluchen por facer lo que-yos presta, ensin más.

Publicidá dempués de Fukuyama

Taba yo viciándome na páxina d'Amazon y faciendome payes (¿deos?) mentales con escritores cantantes ingleses de la mio edá cuando, de repente, pela esquina del güeyu veo ceguñar una frase inquietante: ¡NAZ L'INTERNET COMUNISTA!

¿De cuándo p'acá comunista ye una palabra pa usar en publicidá? ¡Y con connotaciones positives!

Tamos perdíos... y con eso tará d'alcuerdu tanto los d'una ideoloxía como los de la contraria.

Agora solo falta l'anunciu de Mahou cola música de la internacional y la miles de chinos coreando: Mahou, Mahou, Mahou


P.D. Sres de Mahou: alviérto-yos que si veo un anunciu asemeyáu al arriba descritu en televisión pienso denuncialo por plaxu y qu'esti testu val de prueba al mio favor.

P.P.D En fin, doime cuenta de que si l'anunciu lo que quería yera llamar poderosamente l'atención, consiguiólo. Y yo pa detrás faciéndome ecu. Nun te digo.

Ascu

Acabo de ver el vídeo del asesinatu de Carlos Palomino en contra de la mio voluntá. ¡Gracies, Antena 3!
Gracies por retresmitir la muerte violenta d'una persona como si fuere un gol del Madrid.
Gracies por tratar al asesín pol nome y a les víctimes como "antisistemes" (xente chunga y belicoso qu'anda buscando guerra).
Gracies por recordame que a esi monu con navaya vosotros lu consideráis "del sistema" yo nun quiero ser parte d'él.
Gracies por recordame qué telediariu nun ver.

Más claro, agua.

Mirái esti anunciu. Qué guapo, publicidá con mensaxe ecoloxista. Qué importante y saludable ye l'agua. Y que conste que nos dicen que beber agua del grifu ye igual de bono que lo de botella, pero lo d'ellos ye ecolóxico y natural a más nun poder. Cásique da la sensación de que si nun-yos compres a ellos tas faciendo-y mal al planeta.



¿Y cuándo teníen pensao dicir que fabricar una botella de plásticu d'eses gasta el triple d'agua o más de lo que lleven?

Lo más gordo ye que nos tienen por tontos o inorantes, colo que sabe'l Google y lo fácil que ye pregunta-y. Qué se pue esperar de Coca-cola.

Tenemos la suerte de vivir nun sitiu onde tenemos agua potable dientro casa, llibre d'enfermedaes y a la temperatura que queramos, por un preciu razonable y bono de beber (n'otros llugares, mesmamente en Santander, nun ye asina). Nun caigamos nestes engañifes.

Nun sigo más, otru día falo de la estafa del agua nos bares y restauranes y de cómo n'Inglaterra te lo dan del grifu gratis cola comida ensin mirate con despreciu.

Homes y muyeres

Ye qu'hai coses que solo una muyer pue llegar a conocer... Por exemplu la indescriptible sensación de despertase un domingu baxo los efectos combinaos del dolor menstrual y la resaca, alternando los sos síntomes de munchu fríu o munchu calor, o too ello xunto... Gloria. ¡Alegríes del metabolismu femeninu!

Agora en seriu. Hai quien diz que'l día de la muyer trabayadora ye'l 1 de mayu. Ye complicao. Lo que nun se pue negar ye que esti día ta convirtiéndose d'añu n'añu nuna historia cada vez más despolitizada, decorativa y sinsustancia (cosa de la que tampoco se llibra'l Primeru de mayu, por ciertu). Yo dende equí invítovos a toos y a toes a celebrar esti día dexando fuera lo que vien darréu:

• Análisis desfasaos que nun entiendan la lliberación de xéneru como cosa de los dos sexos


• Demagoxa institucional


• Simplificaciones interclasistes


• Palabros como "hembrista" o "feminazi"


• Los australopitecus que les acuñaron


• Mamonaes moxigates


• Alderiques oligofrénicos sobre l'usu de la palabra miembru.

Así qu'así, yo lo que más celebro ye l'nacimientu de la muyer más importante del mio mundiu, y la más trabayadora: mio ma.

Dudes que m'asaltaron lleendo "Los homes que nun queríen a les muyeres"

1. ¿Por qué hai xente que cree que gastar un ordenador Apple ye un rasgu de carácter, del que, amás, hai que tar orgullosu? ¡Mackeros, frikis!
2. (o ¿cuánto-y pagó Steve Jobbs pola publicidá subliminal?)
3. El mocín de la historia ¿nun debería tener dalgún defectu pa que nos lu creamos un poco? Nun sé, tirar dalgún peu de vez en cuando, por exemplu. Colos de la mocina bien que s'esplaya.
4. Dame la sensación de que los suecos "se quieren muncho" muncho más que los hispanofalantes ¿nun conoz el traductor les espresiones "téngote apreciu", "caesme bien" y otres pol estilu, que nun faen pensar que'l que les diz ye inocente perdíu?
5. ¿Por qué nun dexaron el títulu literal que ye "Los homes qu'odiaben a les muyeres"? A mi paezme que queda claro que los homes que nos ocupen facíen dalgo más que "nun querer" a les muyeres...
6. (Hasta la páxina 200) Qué aburríos son los suecos
7. (De la páxina 200 p'alantre) Qué retorcíos son los suecos
8. ¿Cómo se les apañó Larsson pa que l'editor nun tirare'l tochu a la basura nes 200 primeres páxines?
9. ¿Tan importante ye en Suecia'l fechu de tomar un café qu'hai que señalalo cada vez que los personaxes lo faen (cuidáu, y tamién si ye con lleche o solo)? ¿En cuántes páxines quedaría la novela si quiten toles veces que'l protagonista va al Konsum (Alimerka suecu)?
10. ¿Será verdá eso de qu'en Suecia hai periodismu fechu pa seres adultos y racionales?

Amor normalizáu (o "Normalización pastelera")

P'aquellos que crean nes fiestes inventaes pol capitalismu pa reactivar el consumu dempués de la cuesta de xineru /mou cinicu off.

Visto na bombonería Flor de Cacao, C/Manuel Llaneza 13, Mieres del Camín.

El francés, llingua minorizada

Esti poema quedóme na alcordanza dende los mios tiempos na escuela d'idiomes (hai seis o siete años) pola empatía que llevantó en mi. Tradúzolu (les partes en francés) como buenamente pueo.

I will not speak French on the school grounds.
I will not speak French on the school grounds.
I will not speak French...
I will not speak French...
I will not speak French... A! Nun son tontos, estos castrones.
Depués de mille veces, entama a trescalar
Nel espíritu que seya.
Manca, da vergoña.
Y on ne speak pas French on the school grounds
Y nin anywhere else tampoco.
Enxamás colos estraños.
Nunca se sabe quien tien l'autoridá
De ponete escribir eses bendites llinies
A la edá que seya.
Sobre too non colos neños.
Ellos nun tienes por qué pasar el tiempu del recréu
Escribiendo eses bendites llinies.

I will not speak French on the school grounds.
I will not speak French on the school grounds.

Nun tienen qu'escribir eso
Porque nun tienen por qué falar francés pa nada.
Eso amuesa que nun somos más que Cadiens.
Don't mind us, we're just poor coonasses,
De clase baxa, hai que lo esconder.
Hai que lo superar.
Hai que falar inglés
Como bonos americanos.
Why not just go ahead and learn English.
Don't fight it, it's much easier anyway.
No bilingual bills, no bilingual publicity.
No danger of internal frontiers.
Deprendéi-yos inglés a los neños.
Ponéi-yoslo tol tiempu,
Tol tiempu hasta nes discoteques,
Hasta'l Million Dollar Man.
Ye qu'en realidá nun fai falta falar francés pa nada.
Esto ye Estaos Xuníos,
Land of the Free.
Siempre vamos ser poor coonasses y namái.

I will not speak French on the school grounds.
I will not speak French on the school grounds.

Coonass, non, non, nun ofiende.
Ye un nomatu namái.
Nun significa nada.
Ye broma, nun ofiende.
Préstanos, ye cute.
Nun nos enfoscamos.
Danos la risa,
Pero cuando hai que rir, ¿en qué llingua rimos?
Y pa llorar, ¿en qué llingua lloramos?
¿Y pa berrar?
¿Y pa cantar?
¿Y pa querer?
¿Y pa vivir?

Paez mentira qu'una llingua, como'l francés, falada en tol mundiu por millones de persones, respaldada por una consideración de llingua d'alta cultura a un nivel que mui poques llingües algamen, fuere perseguida al tiempu qu'impuesta n'otros llugares. Y nun me refiero solo a les colonies franceses: mientres a estos guah.es-yos cutíen en culo por decir "oui" otros millones d'americaninos lluchaben coles conxugaciones.

Nun sé cuantos falantes de francés habrá nos Estaos Xuníos (que por ciertu nun tán solo en Louisiana, tamién los hai en Maine, igualmente reprimíos). Comentaben n'un foru que l'huracán Katrina nun sólo traxo la muerte y destrucción material: tamién la de la llingua, porque la mayor parte de los francófonos vivíen na costa del Golfu de México y los que nun callaron pa siempre foron treslladaos, colo que quedaron ensin el so ambiente propiciu pa falalo.

Estos ellí siguen. Ellos alcuérdense d'Obama, nun sé si él s'alcordará d'ellos (little chance of change in linguistic policies, I presume).

Música: Zydeco, son tradicional de Louisiana onde la curdión ye la protagonista.

Si ye que cuando nos ponemos, somos mundiales

Camiento que vos llegaría a vosotros tamién, y a media Asturies. Dende'l martes lleven llegándome correos electrónicos con non menos d'ocho ringleres de destinatarios y un mensaxe: Vota por Asturies pa Capital Europea de la Cultura 2016. Y oye, dixo y fecho, en tres díes 60000 votos y encabezando la encuesta. ¡Uuueueueue! ¡Puxa Asturies!

Y digo yo:

• ¿Qué ye ser Capital Europea de la Cultura? Sonar suena de puta madre, pero ¿cuántos de los que votaron tienen idea de lo que ye, pa lo que val y lo que pue costar (y quién lo paga)?
• Hai que reconocer que ye almirable la capacidá de convocatoria que tuvo la iniciativa esta. Claro qu' axunta delles carauterísitiques que la faen irresistible: ye gratis, danos oportunidá de prauticar esi grandonismu faltusu que tantu presta per equí (véase'l foru de la páxina onde se vota) y amás vien revestida con esa palabra máxica de cultura, cultura, cultura... La cultura ye bueno ¿non?

Yo tengo que reconocer que voté por inercia, foi abrir el corréu, calcar nel link et voilà, a votar por Asturies, ensin echar más tres d'ello. En fin, nun dexo d'alcordame de la lletanía semi-pagana que me cruzaba la mente esti branu cuando fui a la Espo de Zaragoza: "Santina de Cuadonga, nun quieras nunca que s'entame una d'estes n'Asturies, p'autobombu de políticos y choricéu a gran escala yá nos val colo que tenemos".

Arriba, paria de la tierra (sí, tu, a ti te digo)

Güei ye'l Día de l'Aición Bloguera. Supónse que ye pa que tolos blogs que quieran falen del mesmu tema dende'l puntu de vista acostumáu nél. El tema d'esti añu ye la probeza, asina que si un blog fala normalmente de, por exemplu, moda, lo suyo yera que l'autor atopare la manera de amestar los dos temes, por exemplu analizando la esplotación de la industria de la moda nel tercer mundiu, o por qué la moda pue xenerar riqueza o por qué los probes tienen mal gustu vistiendo polo xeneral. Dalgo d'eso.



Nun acabo de comulgar del too con esti asuntu, de mano paezme una bona idea que podría asoleyar idees interesantes, pero mieu me da en que la mayor parte de la xente quede en publicar una entrada diciendo "ai, qué penina, los probes, habría que facer dalgo, bueno, yá amosé la mio solidaridá, hasta l'añu que vien". La verdá confieso que tovía nun vi nenguna entrada de nengún blogue participante nesti asuntu, pero paez que nun abunden nin n'asturianu nin en castellán. De momentu paez que la idea entusiasmó a los blogueros oficiales del PSOE y nun sé por qué me da que les conclusiones a les que llegarán serán les de unes llinies más p'arriba (tengo poques esperances na orixinalidá de los políticos, qué se va facer).



En fin, el casu ye qu'esti blog titúlase "Coses que (me) pasen" o seya, coses que pasen nel mundiu o que me pasen a mi personalmente, y como lo que pasa nesti mundiu globalizáu cola probeza ye de sobres conocío y muncha xente lo podrá esplicar meyor que yo, güei voi escribir namás de la mio relación personal con ella. O seya, la vuestra y la de muncha xente, cásique seguro.

Alcuérdome d'una frase d'un cantar de Bon Jovi (toos fuimos adolescentes) que dicía "we're two paychecks away from living out on the streets". Y quien non. A dos nómines de la cai. Ye una cosa que tengo mui presente. Munchos de nosotros saltamos con rede, pola familia que tenemos. Pero si imaxino por un momentu que mio pa y mio ma muerren o me dan de llau (nun quiera Dios o Mandinga que pase nenguna de les dos coses), ¿cómo me diba dir solo col mio sueldu quasi-mileurista? ¿Y si quedara ensin trabayu, yo que teo cotizáu l'estraordinariu periodu de 89 días en tola mio vida llaboral (a tiempu parcial, ¿eh?, que yo probe sí pero vaga non)? Eso nun ye vivir bien. Eso nun ye ser clase media. Nun nos engañemos. Soi tan probe como lo yera mio güelu, anque yo cague a sotechu y non detrás de la pitera y m'entretenga tecleando esto en vez d'una curdión.

Humor negro sotana

Hai unos doscientos ochenta años, un cura anglicanu publicó un panfletu que dicía que p'acabar cola miseria n'Irlanda lo meyor yera que los ricos comieren a los neños probes, cola ventaya amestada de reducir la población católica del país. ¡Negociu reúndu pa los ingleses!.

Esti día, otru cura anglicanu publicó nel so blog que los gais teníen que tatuase en culo una alvertencia como la de les caxes de tabaco que dixere que la sodomía pue matar. El reverendu alega que'l testu yera namás una actualización de la tradición satírica inglesa.

Pue que sea verdá, pero paezme que lo orixinal tenía más gracia.

Crónica d'una movilización inesperada

Non fíos, non, esto nun va ser un artículu sobre la manifestación del sábadu. Camiento que otros la fadrán, pero a mi nun me dan ganes, aparte de que'l títulu sedría una trafulla porque aquello foi de too menos inesperao.

Por primer vez, creo, voi da-y al mio blog esi aquel de periodismu ciudadanu que se-yos supón a estos bichos. Esto de lo que voi falar presenciélo yo al día siguiente, nel Festival de l'Ablana de Piloña. Fuera con unos collacios que se lo curren como pocos, pañando les ablanes, y faciendo por participar d'un mou de vida cada vez más difícil, sobre too porque en pocos llaos se pue yá vender nada de lo que da la tierra ensin que te desixan tres o cuatro carnés y dar cuentes al rei. Sicasí, nesti festival tovía pue dir ún a ufiertar con dignidá pero humildemente lo que te produz el llegáu de to güelu. El casu ye que too marchaba según lo previsto: mercáu, puestos d'ablanes, pasucáis de la banda gaites y la banda municipal y demás. Estrañábanos la bultable presencia de distintos representantes de los cuerpos y fuerces de seguridá, sobre too cuando la mio collacia escuchó a dos d'ellos comentar: "¿Qué fai menganito per equí?" "Ná, ta de secreta. Hai unos cuantos per equí". L'españíu vieno poco dempués .

Un tremendu estruendu de megáfonos y xiblatos amató l'intentu de proceder a la entrega de premios del certame. Na picota, la conseyera de Mediu Rural (mui conocida y apreciada por tracamundiar Nava con Navia nel Festival de la Sidra d'una de les mentaes localidaes) y la so xestión de la crisis de la llingua azul. La Migoya y l'Alcalde, cola sorrisa xelada na cara, ella tratando de facese la Hillary Clinton, faciendo que saludaba a conocíos dende l'escenariu. Dicía la mio collacia: "Míralos ehí, acostumbraos a que los aplaudan, nun saben qué cara poner". Nes pancartes lleíase: "La mosquita de Belén pica muy bien. Firmado: laboratorios farmacéuticos" y tamién...

Y munches más. El mio collaciu garró el cartelu de los precios de les ablanes, dio-y la vuelta a la cartulina y collaboró cola causa

Ehí quedó la cosa. Nun sé si la veréis nos periódicos, pero esistió. Que la xente yá ta farto d'aguantar. Que nun se creen los cuentos que-yos cuenten. Que queremos vivir equí, comer de la tierra y si cada vez nos lo ponen más difícil nun faltará quien, polo menos, -yos amargue la fiesta. Y esa xente, aparte de llingua azul, son los que más saben de llingua asturiana. Nun lo olvidemos.

Nun callo

Anque sigo secuestrada pol procesu selectivu d'accesu al cuerpu de profesores de secundaria (especialidá 011 Inglés), hai coses que nun puen quedar ensin respuesta. Anímovos a facer lo mesmo.

http://www.elcomerciodigital.com/gijon/20080708/opinionarticulos/todos-casi-somos-felix-20080708.html

N'otru mundu, nel mesmu mundu

Sigue la temporada cinéfila de Caxastur. ¡Cómo me presta esto de nun dar más clase particular y poder facer coses peles tardes si me da la gana, pesie a la reducción d'ingresos!




Güei tocó Buda españó de vergoña. Esta ye una peli que nos fai ver el mundiu dende un metru d'altura y unos güeyinos rasgaos embaxo d'un pañuelu. Baktay, una neña con una voluntá de fierro, decide un día que quier dir a la escuela "a deprender cuentos simpáticos", y colos sos cinco o seis años alcuentra la manera de arreblagar percima de los mil problemes qu'atopa, y d'escapar de los neños con kalashnikov fechos con palos que sólo saben xugar a matase y a maltratar a les neñes, neños que tan pronto son talibanes "entamándo-yos un nuevu Vietnam a los americanos" como americanos a la gueta terroristes: faen perbién los dos papeles.

La principal virtú de la película, fecha ciertamente por manes de primeriza, ye que te mete na historia y t'envuelve nesos paisaxes afganos d'ocre, ñeve y cielu azul y cares curtíes de tolos colores imaxinables, onde si nun fuere pol helicópteru podría pensase que tamos a primeros del sieglu XX; y te vuelve, por un momentu, tan inocente como la so heroína, que podría ser hermana de les protagonistes de Nin unu menos o El globu blancu.

En definitiva, ye una película de les que te faen querer siguir mirando al mundu.

Los males del primer mundu

(Autopláxome del fotolog porque m'apetez actualizar equí tamién y nun doi pa tanto).



Dempués de "El declive del imperiu americanu" (que nun vi) y la maraviyosa "Les invasiones bárbares" llega "La edá de la inorancia" pa completar la triloxía de Denys Arcand sobre les miseries de la sociedá moderna nel marcu de la percivilizada y pseudoprogre Canadá francófona.



Esta peli tien más de comedia que "Les invasiones bárbares", que partía d'una premisa yá dramática como ye una enfermedá terminal, pero repasando l'argumentu llego a dubialo. Equí nárrense les desventures d'un funcionariu de servicios sociales atrapáu nun trabayu onde nun ve namás que desgracies y onde lu obliguen a facer cursinos de risoterapia y otres chorraes, con dos fíes adolescentes que nun miren pa el, una muyer que fala pel móvil 18 hores al día y la madre nuna residencia con alzheimer. Con esti panorama ¿cómo nun diba a tar tol día soñando con torturar a la xefa cual César a los cristianos, ganar el premiu lliterariu más importante de la francofonía, ser actor d'exitu o tener un harén formáu por una estrella del cine, una periodista, la compañeru de curro llesbiana y la propia xefa tocacoyones, too ello con eróticu resultáu? La verdá que les coses que-y pasen a Jean Marc Leblanc (l'home esti de los güeyos arremellaos) nun son pa reíse pero consigue que lo faigas y a carcaxada llimpia, asina que di-y a vela a Caxastur si podéis porque merez muncho la pena. A ver si consigo agora ver la primera de la serie.

Resurreición

Día de resaca del Conciertu pola Oficialidá, que ye ún d'esos momentos del añu que podríen ser máxicos nun siendo porque ye la constatación anual de la parálisis que sufre la situación: reencuentros esperaos ya inesperaos, ánimu folixeru, sidra corriendo ensin tasa, música que va dende los himnos xeneracionales hasta lo que sirve de fondu pa les conversaciones, empanada de bonitu... A mi lo que más me presta ye, nos momentos más paraos, dar vueltes pel recintu observando tolo anterior y pasando llista mentalmente de quién me falta por besar, abrazar y pidir un breve resume de lo que-yos pasó caberamente. Porque pa mi hai mui pocos actos qu'axunten a tantu conocíu y amigu embaxo un mesmu techu (quiciabes podíemos pensar nos cursos d'Ibias) y la verdá ye que non tol mundiu tien ocasiones asina una vez al añu y por un preciu asequible, non como un casoriu, por poner un exemplu.
Bono, el casu ye que too perbién, xente a mamplén a pesar de valir 10 euros la entrada y tar el sitiu onde cristo perdió la madreña (asina toi de mayaína) y güei llevántome pa lleer esta noticia en periódicu. Y digo yo... ¿nun taremos subestimando la importancia d'esti fechu pa la supervivencia del asturianu en comparanza cola oficialidá?

La resaca dexóme la boca seca y esta noticia (conocida por demás, per otru llau) un sabor amargu.

Por ciertu, yo yá dende febreru que nun soi lleenda urbana y nun cuento volver a selo pronto. Lo que pasa ye qu'entré nuna época vaga y nun m'apeteció escribir nestos meses. Doi-yos les gracies a tolos que m'animaron a volver a facelo. ¡Hasta bien llueu!