Tal como yéremos

Esta selmana tuve que baxar al Milán un par de veces, dempués de bastante tiempu. Pasar perhí produzme una sensación estraña. Vaiga per delantre que nun se m'ocurriría meteme n'otra carrera ni anque me fuera la vida nello. No no no no no no no, nin de coña, vamos. La universidá española (diría l'asturiana, pero xente que conozo qu'estudia n'otros llugares del Estáu confirmen la xeneralización) ye la peor manera d'estropia-y la vida a un post-adolescente incautu. Antayeri atopé un diariu de segundu de carrera y yera lliteralmente "morrer de dolor". Creo que nun conozo a una sola persona dafechamente contenta cola so formación universitaria. Da la impresión de que lo más que se pue esperar ye que la universidá te devuelva cinco alos más tarde (nel meyor de los casos) con una mínima capacidá d'adaptación a la vida civil (lléase llaboral y social, nel sentíu de participar nel to entornu). ¿Esaxero?



Pensar lo que yera yo en COU, la creatividá desbordante cola que Marta, Víctor y yo matábemos l'aburrición y el teenage angst mientres sacábemos sobresalientes... Y lo distinto que ye n'Inglaterra, por exemplu. Allí lo normal ye pensar que un rapaz o rapaza enllena vida que lleva tola ídem sentada nuna siella lo que necesita ye salir al mundiu, dir pal tercer mundiu a enseñar a neños pequeños a lleer o xugar a futbol o a construir una escuela. Aquí dí-ylo a to madre, que con 18 añiños quies dir pal Perú, que te manda p'allá d'una patada y dempués-y entra la llorera. Pa detrás podría falar de lo que ye la universidá ellí pero creo que paso, que me da la risa.



Aún así, echo un poco de menos la vida universitaria, magar que nun me falten estímulos intelectuales agora mesmo. L'añu pasáu, nun cursu d'estensión universitaria que tenía horariu de mañana intensivu, dime cuenta de que lo qu'echaba daveres de menos yera'l compañerismu, el pasar cinco o más hores al día con xente con un oxetivu (o enemigu) común. Ye una relación especial, que nun se fragua en nenguna otra circunstancia, pienso yo. Daquella nun tenía compañeros, solo alumnos, que anque ye otra relación prestosa (créalo quien quiera, pa mi sí) nun ye igual. Amás, estos yeren casi toos mayores que yo y la mayoría podíen ser los mios pas, y facíaseme bastante raro.



Güei tengo compañeros y préstame con ellos, pero la vida universitaria (máxime la vida universitaria Erasmus porque pa mi fue la única vez que tuvi fuera casa) dame señaldá. Nun quiero volver a la universidá, quiero volver a aquellos años, pero sabiendo lo que sé agora (caro, home, lo que nun quier naide, nun te digo). Prestaríame escribir un poema sobre aquel tiempu (... cuando comprábemos pitos sueltos /y nos creíemos mui llistos...) pero nun soi pa ello, paezme que nun ye lo mio.

... pero qué guapín ta'l Milán nes mañanines d'ochobre...