Tán llocos estos asturianos...

L'otru día, Gibrán atopó por dalgún requexu de la rede una llista escrita por un erasmus/estudiante d'intercambiu retornáu coles coses que-yos sorprenden de la vida n'Asturies (equí en V.O. inglesa). Ta simpático ver cómo nos ven los guiris que estuvieron equí básicamente de foryú (si non mirái cuántes referencies a la universidá, apenes 2 en 81 puntos que tien la llista). Voi comentar un poco les más llamatives (dalgunes nun merecen la pena porque son totalmente obvies: sidra, fabada, etc...), a ver qué vos paecen.

Coses que descubres viviendo n'Asturies

• Un bocadillu y patates ali-oli= el paraísu a les 4 de la mañana. (Nun pueo tar más d'alcuerdu, pero n'Inglaterra tamién comen kebabs a la hora de volver pa casa).
• Tienes visto xente con abrigu y bufanda a 20 graos de temperatura. (¡Por supuestu! Hasta'l cuarenta de mayu... Esta ye una estampa mui conocida nel campus del Milán: namás qu'en marzo sal una rayadina de sol, los erasmus salen a llucir carne nórdico pensando que ya llegó'l branu, mientres que nosotros vamos tapaos hasta arriba porque ayeri tuviera malísimo. Nun sé qué postura será más absurda, pero la realidá ye que les ingleses son mui aficionaes a quitar ropa y tán curtíes n'eso, y per otru llau, que yo sepa dir abrigáu nun mata nin produz catarros).
• Tienes andao per Xixón o Avilés hasta les seis de la mañana porque nun hai autobuses nin trenes primero. (Felicidaes. Realmente esperimentaste una parte fundamental de la esperiencia asturiana).
• Tienes visto vieyos y neños pequeños na cai a les 2 de la madrugada. (¿Y? ¿Qué ye, ho? ¿Nun tienen derechu a pasalo bien?).
• ¡Nun cuelgues una bandera española por nada del mundiu! (Esto sí que tien que ser sorprendente pa cualquier guiri. Reto a cualquier xeniu de la oratoria a que intente esplicá-ylo a un americanu y que lo entienda)
• Pegar berríes nun ye pegar berríes, ye namás charrar animadamente (¡Ehí ta! Acabes de descubrir el puntu númberu ún de la pragmática asturiana. Lo siguiente ye conocer lo que la xente-yos llama a los sos colegas nes cuenques).
• Tuvisti tomando chupitos colos chigreros del Asturianu/ Trabayasti nel Asturianu. (Cuartel xeneral erasmus n'Uviéu, pal que nun lo sepa).
• Tienes salío de casa a la 1 de la mañana pa salir. (Ye verdá, hasta a mi paezme un despropósitu pero, ¿a quien nun-y pasó?)

Y cuidadín, que hai hasta referencies a la nuesa llingua. Bueno, un par namás y bastante ruines, pero polo menos nun ye una realidá invisible:

• Asturianu = Xixón. (¿Qué quedrá dicir? ¿Qué ye la única pallabra que compón l'idioma? ¿Qué ye lo único qu'ellos saben? )
• ¡Puxa Asturies! (Folclorismu que nun falte)

A lo meyor a otra xente-yos paez un montón de topicazos prepotentes, pero nun los culpo. Siendo yo mesma ex-erasmus sé que ye difícil nun cayer na tentación de reíte de la cultura que t'agospia (por dicilo asina). Amás, qué coñu, nótase que lo pasaron como los indios, ¿non? Lo que se nota tamién ye que nun salieron de la zona central, o que si lo ficieron nun-yos dio muncho más. Una vez más, la imaxen de l'Asturies del triángulu urbanu Uviéu-Xixón-Avilés volvió a eclipsar a les otres Asturies.